រាជធានីភ្នំពេញ ៖ ក្នុងរយៈពេលប៉ុន្មានខែកន្លងទៅ ជាពិសេស ពេលមានភ្លៀងធ្លាក់ម្តងៗ យើងកត់សម្គាល់ឃើញមានអ្នកប្រើប្រាស់ទោចក្រយានយន្ត (ម៉ូតូ) មួយចំនួនធំនៅលើដងផ្លូវ ពេញនិយមប្រើប្រាស់របាំងម៉ូតូការពារកម្ដៅថ្ងៃ និងភ្លៀង ។ យ៉ាងណាមិញ ម្ចាស់អាជីវកម្មដែលលក់ដូររបាំងបំពាក់លើម៉ូតូនេះ បានត្អូញត្អែរពីការលក់ធ្លាក់ចុះរបស់ខ្លួន។
លោក រ៉ាង ធូដា ម្ចាស់ហាងលក់របាំងការពារម៉ូតូតាមអនឡាញ បានប្រាប់សារព័ត៌មានកោះសន្តិភាព នាថ្ងៃទី១៥ វិច្ឆិកា ថា មួយរយៈចុងក្រោយនេះ គាត់មិនសូវលក់ដាច់ប៉ុន្មានទេ បើទោះបីជាភ្លៀងនៅបន្តធ្លាក់ក៏ដោយ ។
លោកនិយាយថា ៖« កាលពីមុន ខ្ញុំអាចលក់បានច្រើនដែរ គឺភ្ញៀវគាត់ធ្វើការកុម្មង់តាមអនឡាញជាហូរហែ តែមួយរយៈនេះ សូម្បីតែជាខែនៅមានភ្លៀងក៏ដោយ ក៏ខ្ញុំលក់មិនសូវដាច់សោះ ប្រហែលជាពួកគាត់ឃើញទំនង និងមើលទៅប្លែក ទើបនាំគ្នាទិញទៅប្រើកាលពីពេលកន្លងទៅ » ។
ចំណែកហាង Hong Kong Shop ដែលមានលក់របាំងការពារម៉ូតូ ប្រាប់ថា ហាងរបស់គាត់នាំចូលរបាំងបំពាក់លើម៉ូតូពីប្រទេសចិនដោយផ្ទាល់ ព្រោះម្ចាស់ហាងជាជនជាតិចិន ប៉ុន្តែចំនួនលក់ក្នុងហាងមួយនេះ ក៏បានធ្លាក់ចុះផងដែរ ។
កញ្ញា ពៅ លីន អ្នកត្រួតពិនិត្យក្នុងហាងនេះ បានប្រាប់ថា ៖« ប៉ុន្មានខែមកនេះ មិនសូវមានភ្ញៀវមកទិញទេ ។ ក្នុង១ខែ លក់បានត្រឹមតែ២០ ទៅ៣០របាំងប៉ុណ្ណោះ » ។ កញ្ញាបន្ថែមថា របាំងការពារម៉ូតូ គឺអាចការពារភ្លៀង ខ្យល់ និងធូលីបាន ។ គ្មានអ្វីថា ប៉ះពាល់ដល់អ្នកប្រើប្រាស់ទេ គ្រាន់តែថា ពិបាកទុកដាក់ពេលដែលគាត់មិនចង់ប្រើ ព្រោះវាត្រូវភ្ជាប់ជាមួយម៉ូតូ ។ អីចឹង វាពិបាកបន្តិចក្នុងការដំឡើង ប៉ុន្តែរបាំងនេះមានតម្លៃសមរម្យ ដែលអ្នកបើកបរអាចទិញប្រើប្រាស់បាន ដោយក្នុងរបាំង១ តម្លៃចាប់ពី១១ ទៅ១៥ដុល្លារអាមេរិក ។ យ៉ាងណាមិញ មូលហេតុនៃការប្រើប្រាស់របាំងម៉ូតូធ្លាក់ចុះនេះ មិនត្រូវបានគេដឹងពិតប្រាកដទេ ។
លោក ងួន ចាន់ដារ៉ា និស្សិតនៅរាជធានីភ្នំពេញ បានប្រាប់ថា ការបំពាក់របាំងការពារកម្តៅថ្ងៃលើម៉ូតូ មើលទៅប្លែក ដោយសារវាមានច្រើនពណ៌ ។ ហេតុដូច្នេះហើយ ទើបគាត់ពិចារណានឹងទិញវាប្រើដែរ ព្រោះផ្ដល់ គុណសម្បត្តិច្រើនជាងគុណវិបត្តិ ។
និស្សិតរូបនេះបន្តថា ៖« របាំងការពារម៉ូតូ បានផ្តល់ប្រយោជន៍ច្រើន គឺអាចការពារដូចជា ពេលមេឃភ្លៀង យើងអត់សើម ហើយពេលរដូវក្ដៅ វាជួយការពារកម្ដៅថ្ងៃ និងធូលីដី មិនឲ្យចូលភ្នែក និងប្រឡាក់សម្លៀកបំពាក់របស់យើងបានមួយចំនួន ។ ទន្ទឹមនឹងនេះ វាក៏ការពារម៉ូតូ នៅពេលចតចោលក្រោមភ្លៀងផងដែរ ។ ជាក់ស្ដែង ពួក Scoopy ប្រើប្រព័ន្ធភ្លើងច្រើន អីចឹង វាអាចការពារម៉ូតូកុំឲ្យមានបញ្ហាចរន្តភ្លើងមួយចំនួនកើតឡើង»។
ទោះជាយ៉ាងណា ការដាក់របាំងលើម៉ូតូ យើងមិនអាចបើកបរក្នុងល្បឿនលឿនបានទេ។ នេះជាការលើកឡើងរបស់លោក សួន និស្ស័យ ដែលបានបំពាក់របាំងម៉ូតូការពារកម្តៅថ្ងៃ និងភ្លៀង ។ លោកបន្តថា ការដាក់របាំងធ្វើឲ្យស្ទះខ្យល់ និងបើកលឿនមិនបាន ។
មួយវិញទៀត វាពិបាកបត់ឆ្វេង ឬបត់ស្តាំ ដោយសារតែរបាំងនេះត្រូវចងនឹងដៃចង្កូតម៉ូតូ និងកែបខាងក្រោយ។ អីចឹង ទាមទារឱ្យអ្នកបើកបរត្រូវប្រុងប្រយ័ត្នខ្លាំងក្នុងការទប់ដៃចង្កូតម៉ូតូពេលបត់ម្តងៗ ។
លោក សួន និស្ស័យ បន្តថា ៖« ការពិត របាំងនេះ វាជួយបានខ្លះសម្រាប់ទប់កម្តៅថ្ងៃពេលស្ទះផ្លូវម្តងៗ និងមិនសូវរងកម្តៅខ្លាំង ។ ប៉ុន្តែបើនិយាយពីរឿងភ្លៀងវិញ គឺជួយមិនបានទាំងស្រុងទេ វានៅតែសាចទឹកភ្លៀងត្រូវខ្លះៗដដែល » ៕
ចែករំលែកព័តមាននេះ