រាជធានីភ្នំពេញ ៖ បច្ចុប្បន្ន បច្ចេកវិទ្យា កាន់តែរីកចម្រើន និងបានដើរតួនាទីយ៉ាងសំខាន់ក្នុងវិស័យសាធារណៈ និងឯកជន។ យ៉ាងណាមិញ ការរីកចម្រើននៃប្រព័ន្ធបច្ចេកវិទ្យានេះ ជនល្មើសក៏បាននិងកំពុងប្រើប្រាស់វាសម្រាប់ប្រព្រឹត្តបទល្មើសផងដែរ ។
លោក ង៉ែត ជូ ទីប្រឹក្សាសេដ្ឋកិច្ចនៃក្រុមហ៊ុន Emerging Market Consulting មានប្រសាសន៍ថា បច្ចេកវិទ្យាកាន់តែរីកចម្រើន ល្បិចលួចហែក (Hack) ចូលក្នុងគណនីក្រុមហ៊ុនឯកជន ក៏ដូចជាស្ថាប័នសាធារណៈ ក៏កើតមានច្រើនផងដែរ ។
លោកបន្តថា បទល្មើសតាមប្រព័ន្ធអ៊ីនធើរណេតបានកើតឡើងច្រើន មិនមែនមានតែក្នុងប្រទេសកម្ពុជាទេ ។ បញ្ហានៃការប្រើប្រាស់បច្ចេកវិទ្យាទំនើបសម្រាប់ប្រព្រឹត្តបទល្មើសផ្សេងៗ កំពុងក្លាយជាកង្វល់លើពិភពលោក សូម្បីតែប្រទេសរីកចម្រើន ដែលមានបច្ចេកវិទ្យាទំនើបយ៉ាងណា ក៏គេចមិនផុតដែរ។ ដូច្នេះ វាទាមទារឱ្យរាជរដ្ឋាភិបាលកម្ពុជាមានច្បាប់មួយ ដើម្បីគ្រប់គ្រងទៅលើការប្រើប្រាស់បច្ចេកវិទ្យានេះ ។
លោក ង៉ែត ជូ បន្ថែមថា ៖«បទល្មើសអាចកើតមានច្រើន ប្រសិនបើយើងគ្មានច្បាប់គ្រប់គ្រងត្រឹមត្រូវ ។ ប៉ុន្តែច្បាប់នេះ ត្រូវតែធានាឱ្យបាននូវសិទ្ធិសេរីភាព ជាពិសេស សិទ្ធិជាបុគ្គលឯកជន ពីព្រោះករណីកើតឡើងថ្មីៗនេះ មានជនជាតិចិន បានប្រព្រឹត្តបទល្មើសទាក់ទងនឹងអុីនធើរណេតក៏ច្រើនដែរ ហើយបើយើងអត់មានទេ ចលនាហ្នឹងនៅតែបន្តធ្វើឱ្យមានបញ្ហាច្រើន » ។
បទល្មើសតាមប្រព័ន្ធអ៊ីនធើរណេត គឺរាជរដ្ឋាភិបាលកម្ពុជាកំពុងយកចិត្តទុកដាក់បង្ក្រាប។ កាលពីពេលកន្លងទៅ គេហទំព័ររបស់គណៈកម្មាធិការជាតិរៀបចំការបោះឆ្នោត (គ.ជ.ប) រួមទាំងក្រសួងមួយចំនួន ត្រូវបានជនអនាមិក Hack ចូលបំផ្លាញទិន្នន័យ។ ជាងនេះទៀត ទំព័រហ្វេសប៊ុកសម្តេចនាយករដ្ឋមន្ត្រី ហ៊ុន សែន ក៏ធ្លាប់ត្រូវគេ Hack ចូលម្តងដែរ កាលពីមុនពេលបោះឆ្នោតឃុំ-សង្កាត់ឆ្នាំ២០១៧។ ជាមួយគ្នានេះ ទំព័រហ្វេសប៊ុករបស់តំណាងរាស្ត្រ និងសកម្មជនគណបក្សប្រឆាំង ក៏ត្រូវបានជនអនាមិក Hack ចូលជាច្រើនហូរហែផងដែរ ។
ដោយឡែក កាលពីថ្ងៃទី១៣ វិច្ឆិកា កន្លងមក យុវតីវ័យ១៦ឆ្នាំម្នាក់ ទើបនឹងត្រូវបានចាប់ខ្លួន ហើយតុលាការខេត្តបាត់ដំបងបានសម្រេចឃុំខ្លួនបណ្តោះអាសន្ន ក្រោមបទ «ឆបោក» យកប្រាក់រាប់ពាន់ដុល្លារពីភ្នាក់ងារលីហួរ វេរលុយ បន្ទាប់ពីនាងបានលួច Hack ចូលក្នុងគណនីហ្វេសប៊ុករបស់ភ្នាក់ងារលីហួរ វេរលុយ ។ ក្រៅពីយុវតីរូបនេះ និស្សិតវិទ្យាស្ថានស៊ីតិច ២រូបទៀត ក៏ត្រូវបានចាប់ខ្លួនកាលពីឆ្នាំ២០១៤ បន្ទាប់ Hack ចូលគេហទំព័ររបស់ក្រសួង និងស្ថាប័នរដ្ឋសំខាន់ជាង៣០ ។
ដោយឡែក ជនបរទេស ជាពិសេស ជនជាតិចិន ត្រូវបានសមត្ថកិច្ចកម្ពុជាចាប់ខ្លួនរាប់រយនាក់ និងបញ្ជូនទៅប្រទេសដើមវិញ ព្រោះពួកគេប្រព្រឹត្តបទល្មើសនៅកម្ពុជា ដោយការចាប់ជម្រិតតាមប្រព័ន្ធអុីនធើរណេត (VOIP) ។
ថ្លែងក្នុងសិក្ខាសាលាត្រួតពិនិត្យប្រព័ន្ធបច្ចេកវិទ្យាថ្នាក់ជាតិនៅក្រសួងមហាផ្ទៃ កាលពីថ្ងៃទី១៣ វិច្ឆិកា លោក សៀង ឡាប្រេស្ស ទីប្រឹក្សារាជរដ្ឋាភិបាល មានប្រសាសន៍ថា សព្វថ្ងៃនេះ បញ្ហាសង្គមមានច្រើន ជាពិសេស បណ្តាញសង្គម បច្ចេកវិទ្យា មិនថាមនុស្សតូចធំ ឬចាស់ក្មេង សុទ្ធតែកំពុងប្រឈមខ្លាំងក្នុងរឿងនេះ ដូចជា ការបោកបញ្ឆោតតាមបណ្តាញសង្គមហ្វេសប៊ុកជាដើម ។ ហេតុនេះ កម្ពុជាត្រូវការសិក្សាបន្ថែមដើម្បីដោះស្រាយបញ្ហានេះ ។
លោកបន្តថា ៖ «ឥឡូវនេះ មានជនខិលខូចច្រើនបានប្រើបច្ចេកវិទ្យាទំនើបប្រព្រឹត្តបទល្មើសក្នុងការឆបោកពីបុគ្គលមួយទៅបុគ្គលមួយ លួចលុយតាមធនាគារ ឬក្រុមហ៊ុនឯកជន តាមសកម្មភាពនានា » ។
លោក សៀង ឡាប្រេស្ស បានសំណូមពរដល់ក្រសួងអប់រំ ឱ្យជួយផ្សព្វផ្សាយនូវបញ្ហានេះដល់គ្រឹះស្ថាននានា ចាប់ពីថ្នាក់បឋមដល់ឧត្តម ដើម្បីយល់ដឹងពីអត្ថប្រយោជន៍ និងគុណវិបត្តិនៃការប្រើប្រាស់បច្ចេកវិទ្យានានា ព្រោះបទល្មើសបច្ចេកវិទ្យាកើតមានច្រើននៅក្នុងតំបន់អាស៊ាន និងពិភពលោក ។ លោកបញ្ជាក់ថា នៅពេលប្រជាពលរដ្ឋ ឬសិស្ស-និស្សិតយល់ដឹងបានល្អពីវានោះ បទល្មើសនឹងកាត់បន្ថយ ឬធ្លាក់ដល់កម្រិតទាបបំផុតដែលអាចធ្វើទៅបាន ៕
ចែករំលែកព័តមាននេះ