រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី១៤ វិច្ឆិកា បានលើកយកសំណុំរឿងកូនប្រុសនាយហុងដា និងសង្សារ ក្នុងបទសម្លាប់ម្តាយចុងប្លន់យកទ្រព្យសម្បត្តិ មកបើកសវនាការជំនុំជម្រះទោស ។…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី១៤ វិច្ឆិកា បានលើកយកសំណុំរឿងកូនប្រុសនាយហុងដា និងសង្សារ ក្នុងបទសម្លាប់ម្តាយចុងប្លន់យកទ្រព្យសម្បត្តិ មកបើកសវនាការជំនុំជម្រះទោស ។ ប៉ុន្តែដោយសារលោក សួស ចិន្តា មេធាវីការពារក្តីឱ្យជនជាប់ចោទដាក់ពាក្យស្នើសុំពន្យារពេល ទើបសវនាការត្រូវបានលើកទៅថ្ងៃក្រោយវិញ ដោយមិនកំណត់ ។
សំណុំរឿងឃាតកម្មដែលធ្វើឱ្យមានការភ្ញាក់ផ្អើល កាលពីប៉ុន្មានខែមុននេះ មានជនជាប់ចោទឈ្មោះ ខា សុខេន ហៅ និច ភេទប្រុស អាយុ១៨ឆ្នាំ ជាកូនប្រុសបង្កើតរបស់នាយហុងដា និងឈ្មោះ នេត រស្មីកន្និកា ភេទស្រី អាយុ១៧ឆ្នាំ ត្រូវជាសង្សាររបស់កូននាយហុងដា។ពួកគេជាប់ចោទពីបទឃាតកម្ម តាមមាត្រា១៩៩នៃក្រមព្រហ្មទណ្ឌ ។
ជនជាប់ចោទទាំង២នាក់ ត្រូវបានកម្លាំងការិយាល័យព្រហ្មទណ្ឌអាវុធហត្ថរាជធានីភ្នំពេញ សហការជាមួយសមត្ថកិច្ចមូលដ្ឋាន អាវុធហត្ថខណ្ឌដង្កោ និងខណ្ឌជ្រោយចង្វា ឃាត់ខ្លួនកាលពីថ្ងៃទី១២ ខែឧសភា ឆ្នាំ២០១៧ កន្លងទៅ ។
យោងតាមរបាយការណ៍របស់សមត្ថកិច្ចគឺឈ្មោះ ខា សុខេន បានសារភាពថា រូបគេពិតជាបានសម្លាប់ម្តាយចុងឈ្មោះ ស៊ឹម ចន្ធី អាយុ១៩ឆ្នាំ ប្រាកដមែន ដោយធ្វើសកម្មភាពតែម្នាក់ឯង កាលពីយប់ថ្ងៃទី១០ ឧសភា ឆ្នាំ២០១៧ នៅបន្ទប់ខុនដូរបស់ឪពុកបង្កើត(នាយហុងដា) ។
ក្រោយពេលសម្លាប់រួច ដោយសង្សាររបស់ខ្លួនមកពីធ្វើការវិញទាន់ ខ្លួនក៏អង្វរសង្សារកុំឲ្យឆោឡោ និងជួយយកភួយមករុំសពអូសទៅទុកនៅបន្ទប់ទឹក ព្រមទាំងដោះយកកងដៃ២១វង់ ចិញ្ចៀន១វង់ ទូរស័ព្ទណូគៀ១គ្រឿង និងម៉ូតូ១គ្រឿងចាកចេញតែម្តង ដែលរឿងនេះបានបង្កឲ្យមានការភ្ញាក់ផ្អើលតាមបណ្តាញសង្គមហ្វេសប៊ុក ។
ជនឈ្មោះ ខា សុខេន រៀបរាប់ថា រូបគេបានមករស់នៅខុនដូជាមួយឪពុកនិងម្តាយចុងប្រហែល៤ទៅ៥ខែមកហើយ ព្រោះម្តាយបង្កើតឈ្មោះ រ៉េន សុធារី ហៅឃ្មឹប ដែលត្រូវជាប្រពន្ធមុនរបស់នាយហុងដាមានប្តីថ្មី ។ ក្នុងពេលមករស់នៅជាមួយឪពុក គឺខ្លួនបាននាំសង្សារឈ្មោះ នេត រស្មីកន្និកា មកនៅជាមួយដែរ ហើយខ្លួនមិនសូវចូលចិត្តម្តាយចុងទេ ដោយសារនៅពេលដែលឪពុកខ្លួនមិននៅផ្ទះ ម្តាយចុងតែងតែស្តីបន្ទោសឲ្យខ្លួនជាញឹកញាប់ ធ្វើឲ្យខ្លួនមានគំនុំរហូតមក ។
ក្រោយពេលសម្លាប់ម្តាយចុងរួចហើយ ខ្លួនបានទៅសម្រាកនៅផ្ទះម្តាយសង្សារ១យប់ នៅខណ្ឌឫស្សីកែវ លុះព្រឹកឡើងទើបនាំសង្សារមកដេកស្នាក់នៅជក់ថ្នាំញៀននៅផ្ទះគ្មានលេខ ក្នុងភូមិ១ សង្កាត់ជ្រោយចង្វា ខណ្ឌជ្រោយចង្វា ។ រីឯគ្រឿងអលង្ការដែលខ្លួនប្លន់បាន គឺយកទៅបញ្ចាំបាន៤ម៉ឺនរៀល ព្រោះអ្នកបញ្ចាំប្រាប់ថាជារបស់កាឡៃ ហើយម៉ូតូបញ្ចាំបាន១០០ដុល្លារ រួចយកលុយនោះទិញថ្នាំញៀនប្រើប្រាស់ ៕
ចែករំលែកព័តមាននេះ