រាជធានីភ្នំពេញ ៖ ការប្រជុំតាមប្រព័ន្ធវីដេអូនៃខនហ្វឺរិន (Video Conference)ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាដែលបន្ទាប់ពីបានដឹកនាំអង្គប្រជុំគណៈរដ្ឋមន្រ្តី និងបន្ទាប់ពីអង្គប្រជុំស្មឹងស្មាធិ៍១នាទីគោរពព្រះវិញ្ញាណក្ខន្ធព្រះបរមសពព្រះមហាវីរក្សត្ររួចមក ជាមួយនឹងការថ្លែងអំណរគុណ និងកោតសរសើរចំពោះអាជ្ញាធររាជធានី ខេត្តក្នុងការចូលរួមគោរព និងរៀបចំសណ្ដាប់សម្រួលដល់ប្រជាពលរដ្ឋ ដើម្បីគោរពព្រះវិញ្ញាណក្ខន្ធក្នុងរយៈពេលកាន់ព្រះរាជមរណទុក្ខជាផ្លូវការ សម្ដេចតេជោបានផ្ដល់អនុសាសន៍ដល់សាលារាជធានី និងស្ថាប័នដែលពាក់ព័ន្ធឱ្យសិក្សាពិនិត្យរកទីតាំងនៅចន្លោះសួនច្បារពីវិមានឯករាជ្យដល់នាគបាញ់ទឹកដើម្បីរៀបចំធ្វើទីតាំងសម្រាប់តម្កល់រូបសំណាកព្រះមហាវីរក្សត្រដើម្បីទុកជូនប្រជាពលរដ្ឋ និងគណៈប្រតិភូអន្តរជាតិនានាគោរព ។
ទន្ទឹមនឹងអនុសាសន៍ឱ្យធ្វើការសិក្សារកទីតាំងសម្រាប់តម្កល់រូបសំណាកនេះ សម្តេចតេជោក៏បានណែនាំឱ្យរៀបចំត្រៀមសម្រាប់ការប្រារព្ធពិធីបូជាព្រះបរមសពដែលអាចនឹងធ្វើនៅក្រោយពិធីបុណ្យចូលឆ្នាំចិន នាដើមឆ្នាំ២០១៣ ខាងមុខនេះផងដែរ ។
ទោះបីការកាន់ព្រះរាជមរណទុក្ខ៧ថ្ងៃបានកន្លងផុតទៅហើយក្តី តែដោយសារព្រះបរមសពកំពុងត្រូវបានតម្កល់មិនតិចជាង៣ខែនោះ ក្នុងព្រះបរមរាជវាំង ប្រជាពលរដ្ឋដែលនៅតែក្តុកក្តួលនិងអាឡោះអាល័យចំពោះព្រះករុណាសម្តេចឪ សម្តេចតា សម្តេចតាទួត ដែលព្រះអង្គយាងចូលទិវង្គតនៅតែនាំគ្នាទៅអុជធូប ទៀន និងថ្វាយផ្កាភ្ញីនៅមុខព្រះឆាយាល័ក្ខណ៍ព្រះមហាវីរក្សត្រដែលបានតាំងនៅលើប្រាសាទច័ន្ទឆាយា ។ ការសោកស្តាយចំពោះការបាត់ព្រះវត្តមាននៃអង្គព្រះមហាវីរក្សត្រតែងបានស្ថិតនៅក្នុងដួងចិត្តប្រជារាស្ត្រខ្មែរទូទៅ ។ ការប្រមូលផ្តុំគ្នាទាំងព្រះសង្ឃគ្រប់ឋានានុក្រមនិងប្រជាពលរដ្ឋ២លើកមុខព្រះបរមរាជវាំង រាប់ម៉ឺននាក់និងអង្គកន្លងមកនេះពិតជាបានបង្ហាញថា ព្រះមហាវីរក្សត្រគឺជាក្សត្រមួយអង្គដែលទទួលបានការគោរពស្រឡាញ់ពីកូនចៅ ចៅទួតរបស់ព្រះអង្គ ។
គេនៅចាំថា ក្នុងឱកាសប្រារព្ធខួប២០ឆ្នាំនៃការយាងនិវត្តន៍របស់ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ និងសម្តេចព្រះមហាក្សត្រី ព្រះវររាជមាតាជាតិខ្មែរ ព្រះរាជពិធីបុណ្យចម្រើនព្រះជន្មរបស់ព្រះអង្គក្នុងគម្រប់៨៩យាងចូល៩០ព្រះវស្សារបស់ព្រះករុណាព្រះមហាវីរក្សត្រ ព្រះវររាជបិតាជាតិខ្មែរ និងខួបអនុស្សាវីរីយ៍លើកទី៥៨ នៃទិវាបុណ្យឯករាជ្យជាតិ៩ វិច្ឆិកា និងទិវាកំណើតកងយោធពលខេមរភូមិន្ទ ពិតជាព្រះរាជពិធីថ្វាយដល់ព្រះករុណាជាលើកចុងក្រោយពេលដែលព្រះអង្គនៅមានព្រះជន្ម ។
ដោយមនោសញ្ចេតនារំភើបរីករាយ អបអរសាទរ ប្រកបដោយកតញ្ញតាធម៌ដ៏ជ្រាលជ្រៅបំផុតថ្វាយចំពោះសម្តេចឪ សម្តេចម៉ែ ជាទីគោរពសក្ការៈដ៏ខ្ពង់ខ្ពស់ដែលព្រះអង្គជាព្រះរាជបិតាសន្តិភាព ព្រះបិតាបង្រួបបង្រួមជាតិ និងផ្សះផ្សាជាតិ ទ្រង់បានលះបង់ព្រះកាយពល ព្រះបញ្ញាញាណភ្លឺថ្លា ឈ្លាសវៃ ពោរពេញដោយបទពិសោធន៍ចាស់ទុំ ទ្រង់មានព្រះតម្រិះរិះរកគន្លឹះដោះស្រាយបញ្ហាកម្ពុជា ប្រកបដោយគតិបណ្ឌិត ទេពកោសល្យ និងសិល្ប៍វិធីស្របទៅតាមមាគ៌ាដ៏ត្រឹមត្រូវនៃព្រះពុទ្ធបរមគ្រូ ធ្វើឱ្យភាគីកម្ពុជាទាំងឡាយទទួលយកបានដោយស្ងប់ចិត្ត ស្ងប់អារម្មណ៍ រួមរស់ជាមហាគ្រួសារតែមួយក្រោមដំបូលឆត្រតែមួយ គឺរដ្ឋធម្មនុញ្ញនៃព្រះរាជាណាចក្រកម្ពុជា ។
ព្រះករុណាព្រះមហាវីរក្សត្រ ព្រះវររាជបិតាជាតិខ្មែរ គឺជាអង្គក្សត្រប្រកបដោយទសពិធរាជធម៌កម្ររកបាននៅក្នុងសតវត្សរ៍ទី២១នេះ ៕
ចែករំលែកព័តមាននេះ