សហរដ្ឋអាមេរិក ៖ កើតមានសោកនាដកម្មថ្មីមួយទៀត ហើយនៅសហរដ្ឋអាមេរិកទាក់ទិននឹងការប្រើកាំភ្លើង ។ មនុស្សយ៉ាងតិច៤នាក់បានត្រូវស្លាប់ ហើយកុមារ៣នាក់រងរបួសដោយគ្រាប់កាំភ្លើងកាលពីថ្ងៃទី១៤ វិច្ឆិកា ដោយសារការបាញ់ប្រហារក្នុងសាលាបឋមសិក្សាមួយនាភាគខាងជើងកាលីហ្វ័រនីញ៉ា ។
យោងតាមប្រមុខរងនៃប៉ូលិសក្រុង TEHAMA ថា ស្នូរកាំភ្លើងលាន់ឮនាវេលាម៉ោង៨ព្រឹកម៉ោងក្នុងស្រុកក្នុងផ្ទះមួយ ហើយបន្តរហូតដល់សាលាបឋមសិក្សា RANCHO TEHAMA មុនពេលខ្មាន់កាំភ្លើងត្រូវប៉ូលិសបាញ់សម្លាប់ ។ ប្រុមុខប៉ូលិសរូបនេះអះអាងថា ខ្ញុំដឹងថា សិស្សសាលាមួយចំនួនជម្លៀសចេញតាមឧទ្ធម្ភាគចក្រ ។ សាលារៀនត្រូវបានការពារសន្តិសុខ ហើយបណ្តាកុមារៗត្រូវនាំទៅកាន់កន្លែងមានសន្តិសុខមួយ ។ ប៉ូលិសប្រមាណជា១០០នាក់ត្រូវបានបញ្ជូនទៅ ។ កាំភ្លើងពាក់កណ្តាលស្វ័យប្រវត្តិមួយដើមត្រូវបានរកឃើញ ។
អ្នកជិតខាងម្នាក់និយាយថា អ្នករស់នៅក្បែរគ្នាម្នាក់ត្រូវខ្មាន់កាំភ្លើងបាញ់សម្លាប់ ហើយជននេះជាអតីតអ្នកទោសម្នាក់ ។ គេជាមនុស្សឆ្កួតដែលដើរគំរាមគេឯង ។ គេបាញ់ជាច្រើនគ្រាប់ ។ ចំណែកសាក្សីម្នាក់ទៀត រៀបរាប់ប្រាប់អ្នកកាសែតថា បានឃើញខ្មាន់កាំភ្លើង បើករថយន្តហើយបាញ់ពាសវាលពាសកាលពីរថយន្តរបស់គេ ។
សោកនាដកម្មថ្មីនេះកើតមាន១០ថ្ងៃ បន្ទាប់ពីបុរសម្នាក់បាញ់ប្រហារសម្លាប់មនុស្ស២៦នាក់នៅតិចសាស់ក្នុងព្រះវិហារគ្រឹស្តមួយឯទីក្រុង SUTHERLAND SPRINGS ។ ការបាញ់ប្រហារតែងកើតមានក្នុងគ្រឹះស្ថានសិក្សានានារបស់សហរដ្ឋអាមេរិក ជាប្រទេសមួយដែលមនុស្សប្រមាណជា៩០នាក់ត្រូវស្លាប់ដោយគ្រាប់កាំភ្លើងក្នុង១ថ្ងៃៗ ៕
ចែករំលែកព័តមាននេះ