យើងទាំងអស់គ្នាដឹងហើយថា ជំងឺពុកឆ្អឹងគឺជារឿងធម្មតាចំពោះមនុស្សវ័យចំណាស់ ។ ទោះជាយ៉ាងណាក្តី មិនមានមនុស្សច្រើននាក់ដឹងទេថា ស្ត្រីវ័យក្មេងជាច្រើនកំពុងរងផលប៉ះពាល់ដោយសារជំងឺនេះ រួមទាំងស្ត្រីមុនអាយុអស់រដូវដែលមានអាយុជាង២០ឆ្នាំ ៣០ឆ្នាំ និង ៤០ឆ្នាំ…
យើងទាំងអស់គ្នាដឹងហើយថា ជំងឺពុកឆ្អឹងគឺជារឿងធម្មតាចំពោះមនុស្សវ័យចំណាស់ ។ ទោះជាយ៉ាងណាក្តី មិនមានមនុស្សច្រើននាក់ដឹងទេថា ស្ត្រីវ័យក្មេងជាច្រើនកំពុងរងផលប៉ះពាល់ដោយសារជំងឺនេះ រួមទាំងស្ត្រីមុនអាយុអស់រដូវដែលមានអាយុជាង២០ឆ្នាំ ៣០ឆ្នាំ និង ៤០ឆ្នាំ ។ ទោះបីជាស្តាប់ទៅមិនគួរឲ្យជឿ តែមានករណីមួយចំនួនដែលស្ត្រីវ័យក្មេងមានដង់ស៊ីតេឆ្អឹងទាបដែលបង្កើនឱកាសនៃជំងឺពុកឆ្អឹងនៅពេលក្រោយ ។
ហេតុអ្វីបានជាមានហានិភ័យនៃជំងឺពុកឆ្អឹងចំពោះស្ត្រីវ័យក្មេង ?
ស្ត្រីវ័យក្មេងដែលមាននិន្នាការកំណត់នូវអ្វីដែលពួកគេបរិភោគដើម្បីសម្រកទម្ងន់ គឺមានហានិភ័យខ្ពស់ក្នុងការកើតជំងឺពុកឆ្អឹង និងការប្រេះឆ្អឹង ។ បញ្ហានេះក៏រាប់បញ្ចូលទាំងស្ត្រីមានផ្ទៃពោះផងដែរនៅពេលដែលទារកលូតលាស់នៅក្នុងស្បូនរបស់ម្តាយត្រូវការជាតិកាល់ស្យូមច្រើនសម្រាប់សុខភាពឆ្អឹង និងការអភិវឌ្ឍ ជាពិសេសក្នុងរយៈពេល៣ខែដំបូង ។ ក្នុងករណីមួយចំនួនស្ត្រីមានជំងឺពុកឆ្អឹងអំឡុងពេលមានផ្ទៃពោះ ឬពេលបំបៅដោះកូន ទោះបីជាវាកម្រក៏ដោយ ។ ស្របគ្នានេះដែរ មានករណីជាច្រើនដែលម្តាយដែលបានបាត់បង់ម៉ាសឆ្អឹងនឹងមានភាពប្រសើរឡើងវិញបន្ទាប់ពីពួកគេឈប់បំបៅដោះកូន ។ ទោះបីជាយ៉ាងណាក្តី គេមិនច្បាស់ទេថាតើការបាត់បង់ម៉ាស់ឆ្អឹងរបស់អ្នកម្តាយវ័យក្មេងអាចមានភាពប្រសើឡើងវិញ រឺយ៉ាងណានោះទេ ។
រោគសញ្ញាមួយចំនួនដែលអ្នកត្រូវចងចាំ៖
-ឈឺចង្កេះបណ្តាលមកពីឆ្អឹងកងខ្នងប្រេះ ឬបាក់
-ការបាត់បង់កម្ពស់
-ឥរិយាបថអោនទៅមុខ
-ការប្រេះឆ្អឹងអាចកើតមានឡើងច្រើនជាងការរំពឹងទុក
គន្លឹះមួយចំនួនដែលអ្នកត្រូវតែអនុវត្តតាមដើម្បីរក្សាសុខភាពឆ្អឹងឲ្យបានល្អក្នុងអំឡុងពេលមានផ្ទៃពោះ ពេលបំបៅដោះកូន និងមុនអស់រដូវ ។
កាល់ស្យូម ៖ តម្រូវការជាតិកាល់ស្យូមក្នុងរាងកាយអំឡុងពេលមានផ្ទៃពោះកើនឡើងយ៉ាងខ្លាំង ។ National Academy of Sciences បានណែនាំឲ្យស្ត្រីមានផ្ទៃពោះ ឬស្ត្រីបំបៅដោះកូនគួរតែទទួលទានជាតិកាល់ស្យូម១.០០០មីល្លីក្រាមរាល់ថ្ងៃ ។ ចំពោះអ្នកម្តាយវ័យក្មេង ការទទួលទានជាតិកាល់ស្យូមគឺ១.៣០០មីលី្លក្រាមក្នុង១ថ្ងៃ ។ អាហារសម្បូរជាតិកាល់ស្យូមមានដូចជាផលិតផលទឹកដោះគោមានជាតិខ្លាញ់ទាប បន្លែស្លឹកមានពណ៌បៃតងចាស់ ត្រីកំប៉ុង តៅហ៊ូ គ្រាប់អាល់ម៉ុន និងអាហារដែលមានជាតិកាល់ស្យូមគួរតែទទួលទានឲ្យបានញឹកញាប់ ។
ធ្វើលំហាត់ប្រាណ ៖ វេជ្ជបណ្ឌិតស្ទើរតែទាំងអស់បានណែនាំឲ្យស្ត្រីមានផ្ទៃពោះធ្វើលំហាត់ប្រាណ ។ ទោះជាយ៉ាងណាក្តី ការធ្វើលំហាត់ប្រាណនេះត្រូវតែធ្វើតាមការណែនាំរបស់អ្នកជំនាញ ។
យោងតាមការសិក្សារបស់ American College of Obstetricians and Gynecologists ការមានសកម្មភាពអំឡុងពេលមានផ្ទៃពោះអាចជួយកាត់បន្ថយការឈឺចង្កេះ ទល់លាមក ហើមពោះ និងហើមលើរាងកាយ និងការពារ ឬព្យាបាលជំងឺទឹកនោមផ្អែមអំឡុងពេលមានផ្ទៃពោះ ។ វាក៏ជួយបង្កើនថាមពល ធ្វើឱ្យអារម្មណ៍ និងឥរិយាបថកាន់តែប្រសើរឡើង និងជួយឲ្យអ្នកគេងលក់ស្រួល ។ វាជួយលើកកម្ពស់ដល់សាច់ដុំ កម្លាំង និងការស៊ូទ្រាំ និងជួយឲ្យអ្នកមានរាងស្អាតបន្ទាប់ពីសម្រាលកូន ។
របៀបរស់នៅដែលល្អចំពោះសុខភាព ៖ ការជក់បារីមានផលអាក្រក់សម្រាប់សុខភាពរបស់អ្នកក៏ដូចជាកូនរបស់អ្នក ។ វាត្រូវបានគេបង្ហាញថាមិនល្អចំពោះសុខភាពបេះដូង សួត និងឆ្អឹង ។ សារធាតុអាល់កុលក៏មិនល្អចំពោះស្ត្រីមានផ្ទៃពោះ និងស្ត្រីបំបៅដោះកូន ព្រមទាំងទារករបស់ពួកគេ ហើយការផឹកស្រាច្រើនពេកមិនល្អចំពោះសុខភាពឆ្អឹង ។
ដូច្នេះត្រូវប្រាកដថាអ្នកមានរបៀបរស់នៅដែលល្អចំពោះសុខភាពដើម្បីកាត់បន្ថយហានិភ័យនៃការពុកឆ្អឹង និងជំងឺពុកឆ្អឹងក្នុងអំឡុងពេលដែលអ្នករាំងរដូវ ៕
ចែករំលែកព័តមាននេះ