កម្ពុជាត្រៀមចរចាបើកទីផ្សារតាង៉ែនទៅប្រទេសចិននៅចុងឆ្នាំនេះ
- ភ្នំពេញ
រាជធានីភ្នំពេញ ៖ មន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ខណៈនេះ ក្រសួងកំពុងចាត់ចែងស្វែងរកទីផ្សារមៀនប៉ៃលិន (តាង៉ែន) ជូនប្រជាកសិករ…
រាជធានីភ្នំពេញ ៖ មន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ខណៈនេះ ក្រសួងកំពុងចាត់ចែងស្វែងរកទីផ្សារមៀនប៉ៃលិន (តាង៉ែន) ជូនប្រជាកសិករ…
រាជធានីភ្នំពេញ ៖ មន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ខណៈនេះ ក្រសួងកំពុងចាត់ចែងស្វែងរកទីផ្សារមៀនប៉ៃលិន (តាង៉ែន) ជូនប្រជាកសិករ ហើយនៅខែធ្នូ ខាងមុខនេះ ក្រសួងនឹងចរចាបើករបាំងទីផ្សារនៅប្រទេសចិន (អនាម័យ និងភូតគាមអនាម័យ) ដើម្បីនាំចេញ ។
លោកបណ្ឌិត ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ៖«យើងមិនត្រឹមតែនិយាយជាមួយភាគីថៃប៉ុណ្ណោះទេ នៅខែធ្នូខាងមុខនេះ ថ្នាក់ដឹកនាំក្រសួងនឹងទៅចរចាបញ្ហាអនាម័យ និងភូតគាមអនាម័យដើម្បីបើកទីផ្សារនៅប្រទេសចិន » ។
លោកសង្កត់ធ្ងន់ថា ៖« សព្វថ្ងៃនេះ របាំងទីផ្សារដែលធំបំផុតនោះ គឺអនាម័យ និងភូតគាមអនាម័យ » ។
លោកបណ្ឌិតបញ្ជាក់ថា ៖« នៅពេលយើងចរចាបើករបាំងអនាម័យ និងភូតគាមអនាម័យរួចហើយនោះ កសិករមិនត្រឹមតែពង្រីកផ្ទៃដីដាំដុះមៀនប៉ៃលិនប៉ុណ្ណោះទេ កសិករត្រូវតែគោរពតាមគោលការណ៍បច្ចេកទេស ធ្វើយ៉ាងណា នៅពេលប្រមូលផល កុំបន្សល់នូវជាតិពុលផ្សេងពីការប្រើប្រាស់ក្នុងផលិតកម្ម ជាពិសេស ថ្នាំកម្ចាត់សត្វល្អិត ដើម្បីកុំឱ្យវាមានអ្វីមួយរារាំងទៅនឹងអ្វីដែលយើងខំប្រឹងប្រែងនេះ » ។
ប្រធានក្រុមប្រឹក្សាភិបាលសហគមន៍មៀន ប៉ៃលិន បានឱ្យដឹងថា បច្ចុប្បន្ន កសិករដាំដំណាំនេះ បានយល់ដឹងប្រហែល៦០% ហើយម្នាក់ៗកំពុងព្យាយាមកែប្រែការប្រើប្រាស់ទាំងជី ថ្នាំគីមី ធនធាន និងរូបមន្តនៃការប្រើប្រាស់ ។
លោក ស្រេង ស្រៀង ប្រធានក្រុមប្រឹក្សាភិបាលរូបនេះបានឱ្យដឹងកាលពីថ្ងៃទី១១ វិច្ឆិកា ថា មៀនប៉ៃលិនភាគច្រើននាំចេញទៅប្រទេសថៃ ហើយមិនបាននាំចេញដោយផ្ទាល់ទៅកាន់ប្រទេសចិននោះទេ ។ បញ្ហានេះ បានធ្វើឱ្យខាតបង់ទៅលើច្រកព្រំដែន និងតម្លៃដឹកជញ្ជូន ដែលនាំឲ្យមានការប្រែប្រួលតម្លៃនៅលើទីផ្សារ។ នៅថ្ងៃខាងមុខ ប្រសិនបើថ្នាក់ដឹកនាំក្រសួងកសិកម្ម អាចចរចាបើកទីផ្សារនៅប្រទេសចិនបានជាផ្លូវការ វានឹងអាចជួយដល់កសិករដាំមៀនបាននៅទូទាំងប្រទេស ។
លោកបន្តថា ៖« ឆ្នាំនេះ ការប្រមូលផលមៀនប៉ៃលិនល្អជាងឆ្នាំមុន ហើយយើងមិនត្រឹមតែចែករំលែកចំណេះដឹងបច្ចេកទេសនៅក្នុងខេត្តប៉ៃលិនប៉ុណ្ណោះទេ តែសហគមន៍បានចែករំលែកទៅដល់អ្នកដាំមៀននៅខេត្តបាត់ដំបង និងបន្ទាយមានជ័យផងដែរ ហើយថែមទាំងជួយរកទីផ្សារជូនពួកគាត់ទៀត » ។
លោកបញ្ជាក់ថា ៖« គិតមកដល់ពេលនេះ ទំហំផ្ទៃដីដាំដុះមៀនប៉ៃលិនរបស់សហគមន៍ មានចំនួនជាង១ពាន់ហិកតា និងនៅក្រៅសហគមន៍ដែលមិនទាន់ចូលជាសមាជិក ប្រហែល២ពាន់ហិកតា » ។
យោងតាមរបាយការណ៍របស់អគ្គនាយកដ្ឋានកសិកម្មបានបង្ហាញថា កម្ពុជាមានផ្ទៃដីដាំមៀនប៉ៃលិនប្រមាណ៨.៨១៦ហិកតា ក្នុងនោះខេត្តប៉ៃលិនមាន៤០%, បាត់ដំបង៤០%, កំពត៨% និងខេត្តពោធិ៍សាត់ ៣% ។ ចំណែកខេត្តផ្សេងៗមានផ្ទៃដីដាំដុះតិចតួចប៉ុណ្ណោះ ។
របាយការណ៍បញ្ជាក់ថា ក្នុងឆ្នាំ២០១៦-២០១៧ កម្ពុជាអាចប្រមូលផលមៀនប៉ៃលិនបានប្រមាណ១៩.២១៨តោន ៕
ចែករំលែកព័តមាននេះ