ខេត្តសៀមរាប ៖ ដោយយោងតាមសេចក្តីជូនដំណឹងរបស់រដ្ឋបាលក្រុងសៀមរាបស្តីពីការចុះបោះបង្គោលកំណត់ព្រំដីជម្លោះនៅផ្លូវស៊ីវត្ថា ស្ថិតក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប ខេត្តសៀមរាប កាលពីរសៀលថ្ងៃទី១៤ ខែវិច្ឆិកា ឆ្នាំ២០១៧ ដោយមានកិច្ចសហការពីរដ្ឋបាលខេត្តសៀមរាបមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត និងសមត្ថកិច្ចពាក់ព័ន្ធបានចុះបោះបង្គោលកំណត់ព្រំដីជម្លោះរវាងម្ចាស់ក្បាលដីលេខ១០៩ មានឈ្មោះ សេន រី ដែលជាម្ចាស់មានប័ណ្ណកម្មសិទ្ទិ និងម្ចាស់ក្បាលដីលេខ១០៧ មានឈ្មោះ ឡៃ ហាង តែពុំទាន់មានប័ណ្ណកម្មសិទ្ធិឡើយ ។
ក្នុងសកម្មភាពនៃការបោះបង្គោលកំណត់ព្រំដីជម្លោះនេះម្ចាស់ក្បាលដីលេខ១០៧ ឈ្មោះ ឡៃ ហាង បានមកធ្វើការរារាំងកម្លាំងសមត្ថកិច្ច អាជ្ញាធរ ចាប់តាំងពីម៉ោង០៣រសៀលរហូតដល់ម៉ោង០៦និង៣០នាទី ទើបអាជ្ញាធរ សម្រេចអនុវត្តបោះបង្គោលព្រំដីរួចរាល់បើទោះបីជាមានការមាក់ងាយ និងធ្វើការ Live វីដេអូតាមប្រព័ន្ធ Facebook ពីសំណាក់ម្ចាស់ក្បាលដីលេខ១០៧ ឈ្មោះ ឡៃ ហាង ក៏ដោយ អាជ្ញាធរនៅតែអត់ធ្មត់ដដែលក៏ព្រោះតែដើម្បីបញ្ចប់នូវភាពទំនាស់នេះ ប៉ុន្តែប្រសិនបើភាគីក្បាលដីលេខ១០៧ ឈ្មោះ ឡៃ ហាង មិនមានឯកភាពទេនោះគាត់ក៏អាចបន្តក្តីនេះទៅលើតាមផ្លូវច្បាប់បន្តទៀតបាន ។
សូមបញ្ជាក់ថា ម្ចាស់ក្បាលដីលេខ១០៧ ឈ្មោះ ឡៃ ហាង នេះ បាននឹងកំពុងសាងសង់សំណង់ដោយគ្មានច្បាប់អនុញ្ញាតព្រមទាំងរំលោភព្រំដីលើសំណង់ដីដែលបានចាត់ជាបេតិកភ័ណ្ឌរបស់ជាតិដោយមិនព្រមស្តាប់តាមការហាមឃាត់របស់អាជ្ញារធរជាច្រើនលើកច្រើនសារមកហើយ ប្រសិនបើម្ចាស់ក្បាលដីលេខ១០៧ ឈ្មោះ ឡៃ ហាង នៅតែល្មើសច្បាប់ មិនព្រមស្តាប់អាជ្ញាធរ ហើយនៅបន្តល្មើសច្បាប់យ៉ាងធ្ងន់ធ្ងរទៀតនោះអាចនឹងត្រូវប្រឈមចំពោះមុខច្បាប់ដែលអាជ្ញារធរនឹងចាត់វិធានការជាបន្ទាន់ ៕
ចែករំលែកព័តមាននេះ