ខេត្តកណ្តាល ៖ យុវជនម្នាក់បានរងរបួសយ៉ាងធ្ងន់ធ្ងរក្នុងហេតុការណ៍គ្រោះថ្នាក់ចរាចររវាងម៉ូតូ និងរថយន្តកាលពីវេលាម៉ោង០៣និង៣០នាទីរសៀល ថ្ងៃទី១៤ ខែវិច្ឆិកា ឆ្នាំ២០១៧ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ ៤៦-៤៧ ស្ថិតក្នុងភូមិសំរោងក្អែ២ ឃុំសំរោងធំ ស្រុកកៀនស្វាយ ខេត្តកណ្តាល ។
ជនរងគ្រោះឈ្មោះ ហេង ជីលាង ភេទប្រុស អាយុ១៨ឆ្នាំ ជនជាតិខ្មែរ (មុខរបរជាងឡាន) មានទីលំនៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល ជិះម៉ូតូម៉ាកសង់កូរ៉េ ពណ៌ក្រហម ពាក់ស្លាកលេខ កណ្តាល ១M-៣១២១ បានរងរបួសធ្ងន់ធ្ងរត្រូវក្រុមគ្រួសារដឹកបញ្ជូនយកទៅព្យាបាលនៅមន្ទីរពេទ្យ ។
ចំណែករថយន្តបង្កពណ៌ស ប្រភេទដឹកទំនិញចំណុះ៣តោនកន្លះ ពាក់ស្លាកលេខ ភ្នំពេញ ៣B-៧៣០២ បើកបរដោយឈ្មោះ ឌួក សៀប ភេទប្រុស អាយុ៣៧ឆ្នាំ ជនជាតិខ្មែរ (មុខរបរបើកបរ) មានទីលំនៅភូមិថ្មសរ ឃុំស្នំក្រពើ ស្រុកគងពិសី ខេត្តកំពង់ស្ពឺ ។
ប្រភពព័ត៌មានបានឲ្យដឹងថា មុនពេលកើតហេតុ គេឃើញរថយន្តបង្កបើកបរទិសដៅពីភ្នំពេញទៅអ្នកលឿង ក្នុងល្បឿនលឿនមធ្យម ។ លុះបើកមកដល់ចំណុចខាងលើ រថយន្តបង្កបានបើកគេចពីរថយន្តក្រុង ដែលបើកមកពីមុខ ក៏ជ្រុលចង្កូតមកកៀរម៉ូតូជនរងគ្រោះ ដែលកំពុងជិះតាមចិញ្ចើមផ្លូវស្របគ្នា បណ្ដាលឲ្យបោកទៅនឹងថ្នល់ជាតិរងរបួសធ្ងន់តែម្តង ។
ក្រោយកើតហេតុ កម្លាំងនគរបាលចរាចរណ៍ស្រុកកៀនស្វាយ សហការជាមួយកម្លាំងនគរបាលប៉ុស្តិ៍សំរោងធំ ចុះអន្តរាគមន៍ និងធ្វើការវាស់វែងចាត់ការតាមនីតិវិធី ៕
ចែករំលែកព័តមាននេះ