រាជធានីភ្នំពេញ ៖ យុវជនម្នាក់ស្លាប់ភ្លាមៗនៅកន្លែងកើតហេតុ ក្នុងសភាពបែកក្បាលធ្លាយខួរ បាក់ដៃ បាក់ជើងខ្ទេច បន្ទាប់ពីជួបនូវឧប្បត្តិហេតុគ្រោះថ្នាក់ចរាចរណ៍ ដោយជនរងគ្រោះបើកម៉ូតូបោះពួយវ៉ាជែងរថយន្តខាងមុខ ហេតុការណ៍ខាងលើកើតឡើងកាលពីវេលាម៉ោង៦និង១០នាទីព្រលប់ថ្ងៃទី១៤ ខែវិច្ឆិកា ឆ្នាំ២០១៧ ភូមិព្រៃបឹង សង្កាត់កន្ទោក ខណ្ឌពោធិសែនជ័យ ។
ជនរងគ្រោះឈ្មោះ ចាន់ណា អាយុ២០ឆ្នាំ មុខរបរជាត់កាត់កញ្ចក់ ស្នាក់នៅសង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅស្រុកកោះធំ ខេត្តកណ្តាល ។
ក្រោយពីសមត្ថកិច្ចទំនាក់ទំនងតាមរយៈលេខទូរស័ព្ទ ទើបលេចមុខនារីវ័យក្មេងម្នាក់ឈ្មោះ គុយ ចិន្តា អាយុ១៩ឆ្នាំ មុខរបរ កម្មការនីរោងចក្រ ស្នាក់នៅផ្ទះជួល ភូមិបែកចាន ឃុំបែកចាន ស្រុកអង្គស្នួល ខេត្តកណ្តាល ត្រូវជាសង្សារជនរងគ្រោះគ្រាន់តែប្រាប់ឲ្យដឹងថា ជនរងគ្រោះជិះម៉ូតូមួយគ្រឿង ស៊េរី២០១៦ ពណ៌ខ្មៅ ស្លាកលេខ ភ្នំពេញ ១FQ-៣៥២២ ។
នារីជាសង្សារបានឲ្យដឹងនៅកន្លែងកើតហេតុថា ពួកគេជាសង្សារនឹងគ្នាស្គាល់គ្នាបានជាង១ខែកន្លងមកហើយ តាមរយៈលេងហ្វេសប៊ុក ហើយយុវជនខាងលើក៏សុំស្នេហ៍សុំស្រឡាញ់ ។ នាងបន្តទៀតថា ជនរងគ្រោះបានទៅលេងនាងចំនួន៤ថ្ងៃជាប់ៗគ្នាមកហើយនៅបន្ទប់ជួល តាំងពីបន្ទប់ជួលរបស់គេនៅសង្កាត់ស្ទឹងមានជ័យ ទៅលេងដល់បន្ទប់របស់នាងសារជាថ្មី លុះពេលល្ងាចជនរងគ្រោះក៏បានវិលត្រឡប់ចាកចេញទៅស្ទឹងមានជ័យវិញ តែដោយសារភ្លេចកូនសោបន្ទប់ ទើបជនរងគ្រោះជិះម៉ូតូត្រឡប់មកយកដែលភ្លេចនៅបន្ទប់របស់នាងឯភូមិបែកចាន ពីកើតទៅលិច មកដល់ចំណុចខាងលើជួបហេតុការណ៍នេះតែម្តង ។
ប្រជាពលរដ្ឋបានឲ្យដឹងថា មុនកើតហេតុជនរងគ្រោះ ជិះម៉ូតូលឿន ពីកើតទៅលិចវ៉ាជែង ជាមួយរថយន្តដឹកកម្មករជាបន្តបន្ទាប់ លុះដល់ចំណុចកើតហេតុ ជែងរថយន្តខាងមុខចូលទៅបំណែកផ្លូវម្ខាង ត្រូវបានរថយន្តមួយគ្រឿងមិនស្គាល់ម៉ាក បើកពីលិចទៅកើតច្រាសទិសគ្នាបុកពេញទំហឹង ផ្លោងខ្ទាតជិត១០ម៉ែត្រ បណ្តាលឲ្យបែកក្បាលធ្លាយខួរស្លាប់ភ្លាមៗនៅកន្លែង ម៉ូតូរងការខូចខាតខ្ទេចស្ទើរតែទាំងស្រុង រីឯរថយន្ត បន្ថែមល្បឿនបើករត់គេចទៅបាត់ ។
អត្តសញ្ញាណជនរងគ្រោះពុំមានអ្នកណាស្គាល់ជាផ្លូវការឡើយ ទើបសមត្ថកិច្ចសម្រេចដឹកសាកសពយកទៅតម្កល់ទុកនៅវត្តទឹកថ្លា រួចបន្តធ្វើការស្រាវជ្រាវស្វែងរកសាច់ញាតិ ។ ចំណែកម៉ូតូ ត្រូវបានសមត្ថកិច្ចដឹកយកទៅរក្សាទុក ដើម្បីកសាងសំណុំរឿងតាមនីតិវិធី ៕
ចែករំលែកព័តមាននេះ