រាជធានីភ្នំពេញ ៖ នារីម្នាក់ចេញពីសាលារៀនត្រលប់ទៅផ្ទះវិញលុះជិះម៉ូតូជិតដល់ផ្ទះទៅហើយ ក៏ស្រាប់តែមានបុរសជាជនសង្ស័យ២នាក់ បានជិះម៉ូតូចំនួន២គ្រឿង បានធ្វើសកម្មភាពភ្ជង់ប្លន់យកកាបូបលុយបានសម្រេច តែបន្សល់ទុកម៉ូតូរបស់ជនសង្ស័យមួយគ្រឿងនៅកន្លែងកើត។ ហេតុការណ៍នេះបានកើតឡើងនៅវេលាម៉ោង៨ និង៣០នាទីយប់ ថ្ងៃទី១៤ ខែវិច្ឆកា ឆ្នាំ២០១៧ ត្រង់ចំណុចផ្លូវបេតុងអត់លេខ ក្បែរនឹងតេប៉ូប្រេងឥន្ធនៈតេលា ភូមិភ្នាត សង្កាត់ស្ទឹងមានជ័យ២ ខណ្ឌមានជ័យ។ ជនរងគ្រោះមានឈ្មោះ ឈាវ វិច្ឆិកា ភេទស្រី អាយុ២២ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅផ្ទះលេខ១២ ផ្លូវលេខបេតុង១៨ ភូមិភ្នាត សង្កាត់ស្ទឹងមានជ័យ២ ខណ្ឌមានជ័យ។
សម្ភារដែលជនសង្ស័យប្លន់យកទៅនៅក្នុងកាបូបមាន ទូរសព្ទ័ចំនួន២គ្រឿងម៉ាក iphon5 មួយ និង iphon 7 មួយគ្រឿង កាតATM ចំនួន៤សន្លឹក កាតវីងមួយសន្លឹក និងលុយមួយចំនួន។ តាមសម្តីជនរងគ្រោះ បានឲ្យដឹងថា មុននៅមុនពេលកើតហេតុ រូបនាងបានជិះម៉ូតូម៉ាក ស៊ុយហ្សុយគីឡែត ពណ៌ស ពាក់ស្លាកលេខ ភ្នំពេញ 1GF-9978 ចេញពីសាលា ច្បាប់ នៅបឹងត្របែក គោលបំណងត្រលប់ទៅផ្ទះវិញជិតកន្លែងកើតហេតុ។
ខណៈដែលធ្វើដំណើរមកដល់ចំណុចកើតហេតុ ក៏ស្រាប់តែមានជនសង្ស័យ២នាក់ បានជិះម៉ូតូពីគ្រឿងមកឈប់ចាំតាំងពីពេលណានោះទេ ហើយពេលឃើញរូបនាងជិះម៉ូតូទៅដល់ ស្រាប់តែជនសង្ស័យទាំងនោះបានដកកាំភ្លើងខ្លីមួយដើមមិនស្គាល់ម៉ាក់ មកភ្ជង់គំរាមរូបនាងឲ្យចុះពីលើម៉ូតូ តែពេលនោះរូបនាងបានឆោរឡោឡើងស្រែកថាចោរៗផ្អើលដល់ប្រជាពលរដ្ឋនោះចេញមកព្រោងព្រាត ធ្វើឲ្យជនសង្ស័យភ័យពេក ក៏បានយកកាបូបស្ពាយពីរូបនាង ហើយជិះម៉ូតូគេខ្លួនបាត់ តែជនសង្ស័យបានបន្សល់ទុកម៉ូតូរបស់ពួកគេមួយគ្រឿង ម៉ាក AIR BLACK ពណ៌ស ពាក់ស្លាកលេខ ភ្នំពេញ 1L-5648 នៅកន្លែងកើតហេតុ ។ ក្រោយក្រោយពេលកើតហេតុ រូបនាងជាជនរងគ្រោះ ត្រូវបានក្រុមគ្រួសារដឹកយកទៅដាក់ពាក្យបណ្តឹងនៅប៉ុស្តិ៍នគរបាល ស្ទឹងមានជ័យ២៕
ចែករំលែកព័តមាននេះ