ខេត្តបន្ទាយមានជ័យ ៖ ដើម្បីបង្កា និងទប់ស្កាត់ ការធ្វើបាតុកម្មប្រឆាំងនឹងចំណាត់ការរបស់តុលាការរឿងក្តីប្តឹងរលាយគណបក្សសង្គ្រោះជាតិរបស់តុលាការ ដែលគ្រោងនឹងបើកសវនាការនាថ្ងៃទី១៦ ខែវិច្ឆិកា ឆ្នាំ២០១៧ខាងមុខនេះ។ នៅថ្ងៃទី១៤ ខែវិច្ឆិកា ឆ្នាំ២០១៧នេះ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានបើកការប្រជុំបន្ទាន់មួយ ដោយក្នុងនោះមានការចូលរួមពីលោកឧត្តមសេនីយ៍ វរសេនីយ៍ជាស្នងការរង នាយការិយាល័យជំនាញ លោកអធិការគ្រប់ ស្រុក-ក្រុង លោកមេបញ្ជាការវរសេនាតូចទាំង៤ ចូលរួម។ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានថ្លែងថា៖ ការប្រជុំថ្ងៃនេះ គឺគោលបំណង ដើម្បីរក្សាការពារស្ថិរភាពសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងបរិបទនយោបាយថ្មី ដែលគណបក្សសង្គ្រោះជាតិនឹងត្រូវរំលាយដោយតុលាការ ដោយបង្កា ទប់ស្កាត់មិនទុកឲ្យមានការញុះញុង់ បំផុសកៀងគរ ប្រជាពលរដ្ឋប្រមូលផ្តុំ បង្កចលាចលសង្គមបាន។
ក្តាប់ឲ្យបានទាន់ពេលវេលា និងវិភាគវាយតម្លៃឲ្យបានត្រឹមត្រូវ នូវរាល់ឧបាយកលរបស់កម្លាំងអមិត្ត ជាពិសេសគោលការណ៍ផ្ទៃក្នុងរស់គណបក្សសង្គ្រោះជាតិ ចំពោះដំណើរការសវនាការតុលាការកំពូលថ្ងៃទី១៦ ខែវិច្ឆិកា ឆ្នាំ២០១៧ ដើម្បីដាក់ចេញនូវវិធានការបង្កា ទប់ស្កាត់សមស្រប និងមានប្រសិទ្ធភាព។ ត្រូវក្តាប់ឲ្យបាន រាល់ការប្រមូលផ្តុំមនុស្ស ដើម្បីធ្វើបាតុកម្មប្រឆាំងនឹងចំណាត់ការរបស់តុលាការកំពូលចំពោះរឿងក្តី ប្តឹងរំលាយគណបក្សប្រឆាំងនេះ ដោយត្រូវមានវិធានការរំសាយតាំងពីដំបូង ព្រមទាំងធ្វើការទប់ស្កាត់រាល់ការបញ្ជូនមនុស្ស មកពីតាមបណ្តាស្រុក មកខេត្ត និងឆ្ពោះទៅភ្នំពេញ ដើម្បីប្រមូលផ្តុំតវ៉ាប្រឆាំង។
លោកឧត្តមសេនីយ៍ស្នងការ បានបន្តថា៖ គ្រប់អធិការដ្ឋាននគរបាលស្រុក-ក្រុង និងវរសេនាតូចការពារព្រំដែនគោកទាំង៤ ត្រូវប្រមូលផ្តុំមន្ត្រីក្រោមឱវាទប្រជុំជាបន្ទាន់ ដើម្បីផ្សព្វផ្សាយ អប់រំឲ្យបានដឹងពីសភាពការណ៍ថ្មី ចូលរួមអនុវត្តការងារអប់រំដល់សាច់ញាតិ មិត្តភក្តិ និងត្រៀមខ្លួនអនុវត្តភារកិច្ចរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។ ត្រូវមានវិធានការត្រួតពិនិត្យតាមផ្លូវជាតិ និងផ្លូវសំខាន់ៗមួយចំនួនសំដៅរារាំង ទប់ស្កាត់ការធ្វើដំណើរចូលទៅភ្នំពេញ ដើម្បីចូលរួមធ្វើបាតុកម្ម។ ក្រោយពីទទួលបាននូវផែនការនេះ គ្រប់ថ្នាក់ដឹកនាំអង្គភាពទាំងអស់ ត្រូវទទួលខុសត្រូវ តាមផែនការដែលបានប្រគល់ជូន។ ជាមួយគ្នានោះដែរ លោកឧត្តមសេនីយ៍ស្នងការបានផ្តាំផ្ញើដល់គ្រប់ថ្នាក់ដឹកនាំ អធិការដ្ឋានស្រុក-ក្រុង វរសេនាតូវតូចទាំង៤ ត្រូវប្រើប្រាស់នូវវិធានការសរុប កម្លាំងសរុប និងមធ្យោបាយសរុប ដើម្បីត្រៀមដោះស្រាយនូវបញ្ហាកើតឡើង។ នៅក្នុងកិច្ចប្រតិបត្តិការនេះដែរ ស្នងការដ្ឋានក៏បានឧត្ថម្ភអង្ករ១អង្គភាព៥០០គីឡូក្រាម ក្នុងរយៈពេល៥ថ្ងៃនេះ ដែលមានចំនួន២៤ ឈរជើងតាមគោលដៅ៕
ចែករំលែកព័តមាននេះ