ខេត្តបាត់ដំបង ៖ នៅវេលាព្រឹកថ្ងៃទី១៤ ខែវិច្ឆិកា ឆ្នាំ២០១៧នេះ នៅក្នុងទីបញ្ជាការដ្ឋានយោធភូមិភាគទី៥ បានបើកកិច្ចប្រជុំផ្សព្វផ្សាយច្បាប់ស្តីពីចរាចរណ៍ផ្លូវគោក ដល់នាយ ពលទាហាន ដោយមានសមាសភាពចូលរួមចំនួន២៩៧នាក់ មកពីតាមបណ្តាអង្គភាពតំបន់ប្រតិបត្តការសឹករងបាត់ដំបង ពោធិសាត់ ប៉ៃលិន និងបន្ទាយមានជ័យ បណ្តាកងពលលេខ៥១៥២ និង៥៣ វរការពារព្រំដែនចំណុំឲ្យយោធភូមិភាគទី៥ ក្រោមអធិបតីភាពលោកឧត្តមសេនីយ៍ឯក ម៉ម សុផាត អគ្គលេខាធិការរង នាយក នាយកដ្ឋាននិតិកម្មក្រសួងការពារជាតិ ព្រមទាំងមន្ត្រីជំនាញមួយចំនួនទៀតបានចូលរួម។ លោកឧត្តមសេនីយ៍ទោ ឯក សំអូន មេបញ្ជាការស្តីទីយោធភូមិភាគទី៥ បានមានមតិស្វាគមន៍ និងបង្ហាញអំពីសកម្មភាពគ្រោះថ្នាក់ចរាចរណ៍បណ្តាលមកពីការបើកបរនៅក្នុងគ្រប់អង្គភាពនេះ មានការថយចុះ ដោយសារមានការនៃនាំពីថ្នាក់ដឹកនាំតែងតែដាស់តឿនក្រើនរំលឹកជាប្រចាំក្នុងការបើកបរលើតាមដងផ្លូវ ទោះបីគ្មានគ្រោះថ្នាក់អ្វីកើតឡើងក៏ដោយ ការប្រុងប្រយ័ត្ន ត្រូវគោរពតាមច្បាប់បានកំណត់ គោរពស្លាកសញ្ញាឲ្យបានត្រឹមត្រូវ ហើយសំខាន់មានការអធ្យាស្រ័យឲ្យគ្នាទៅវិញទៅមក និងប្រុងប្រយ័ត្នរាល់គ្រោះថ្នាក់ផ្សេងៗទៀតដែលបានមកប៉ះពាល់ដល់យើងវិញ ព្រមទាំងអ្នកដទៃទៀតផងដែរ។
បន្តមកលោកឧត្តមសេនីយ៍ឯក ម៉ម សុផាតអគ្គលេខាធិការរង នាយក នាយកដ្ឋាននិតិកម្ម បានមានមតិបើកកម្មវិធីដោយបានរំលឹកថា ពិតមែនតែគ្រោះថ្នាក់មានការថយចុះតែនៅមានបុគ្គលមួយចំនួនមិនទានបានយល់ជ្រួតជ្រាបអំពីច្បាប់ និងការគោរពស្លាកសញ្ញាចរាចរណ៍ផ្លូវគោកឲ្យបានគ្រប់គ្នានៅឡើយ ព្រោះចំនួនមានការកើនឡើងជារៀងរាល់ថ្ងៃក្នុងការបើកបរលើគ្រប់មធ្យោបាយ ដូច្នោះក្នុងជួរកងកម្លាំងប្រដាប់អាវុធគឺជាចំណែកមួយសំខាន់ក្នុងការបើកបរដែលមានច្រើនបែបទាំងឯកជន និងក្នុងក្បួនជារួមក្នុងការដឹកនាំចុះបេសកកម្មក្នុងការងារគ្រប់ទីកន្លែងត្រូវតែផ្សព្វផ្សាយបន្តបន្ថែមទៀតគ្រប់តាមបណ្តាអង្គភាពឲ្យកាន់តែមានការគោរព ប្រុងប្រយ័ត្នខ្ពស់បន្ថែមទៀត។
បន្ទាប់មកលោកឧត្តមសេនីយ៍ទោ ទេព ចាន់តារា នាយករង នាយកដ្ឋាននិតិកម្ម ក្រសួងការពារជាតិបានឡើងធ្វើបទឧទ្ទេសនាម បទបង្ហាញផ្សព្វផ្សាយអំពីច្បាប់ចរាចរណ៍ផ្លូវគោក ដែលត្រូវគោរព តាមល្បឿនបានកំណត់ ត្រូវស្គាល់គ្រប់ស្លាកសញ្ញាបង្ហាញ និងគំនូសតាមទ្រូងផ្លូវ ត្រូវស្គាល់សញ្ញាភ្លើងបញ្ជាកំណត់យានយន្តគ្រប់ប្រភេទ កំណត់អាយុនៃការបើកបរ មាត្រាច្បាប់នៃការពិន័យ និងត្រូវមានទោសតាមកម្រិតនៃការបើកបរដែលមានគ្រឿងស្រវឹង និងខុសលក្ខណៈបច្ចេកទេស។ល។ បន្តមក
សំណួរចម្លើយដើម្បីស្ទាប់ស្ទង់នេះចំណេះដឹងក្នុងកម្មវិធី ហើយបន្តការផ្សព្វផ្សាយច្បាប់ជាបន្តទៅទៀតតាមគ្រប់អង្គភាពរៀងៗខ្លួនវិញឲ្យកាន់តែទទួលបានការចេះដឹងអំពីច្បាប់ចរាចរណ៍នេះឲ្យបានជ្រួតជ្រាបគ្រប់ទីកន្លែង៕
ចែករំលែកព័តមាននេះ