ខេត្តត្បូងឃ្មុំ ៖ ជងឺទឹកនោមផ្អែមនៅកម្ពុជាមានការកើនឡើងគួរឱ្យកត់សម្គាល់ ដែលពីមុនគឺមានត្រឹមតែជាង២០ម៉ឺននាក់កើតជំងឺនេះ។ តែមកដល់បច្ចុប្បន្នវាបានកើនដល់ទៅជិត១លាននាក់នៅក្នុងប្រទេសកម្ពុជា។ នេះបើតាមការឱ្យដឹងរបស់លោក វេជ្ជបណ្ឌិត សុខ គង់ អនុប្រធានការិយាល័យប្រយុទ្ធជំងឺមិនឆ្លងនៃក្រសួងសុខាភិបាល ថ្លែងនៅព្រឹកថ្ងៃទី១៤ វិច្ឆិកា ២០១៧ ក្នុងពិធីទិវាជំងឺទឹកនោមផ្អែមពិភពលោក នៅក្នុងបរិវេណការិយាល័យស្រុកប្រតិបត្តិស្រុកមេមត់។
លោកវេជ្ជបណ្ឌិត សុខ គង់ បន្ថែមថា៖ «ប្រសិនបើបណ្តោយឲ្យកើត មិនទទួលការព្យាបាលឲ្យបានទាន់ពេលវេលានោះទេ វានឹងបណ្តាលឲ្យយើងងងឹតភ្នែកទៀតផង»។ លោក ផៃ ច័ន្ទសុភី អភិបាលរងនៃគណៈអភិបាលស្រុកមេមត់ ថ្លែងឲ្យដឹងថា ជំងឺទឹកនោមផ្អែមគឺជាជំងឺមួយក្នុងចំណោមជំងឺដែលកំពុងរាតត្បាតយ៉ាងស្ងៀមស្ងាត់ ហើយបានឆក់យកអាយុជីវិតមនុស្សកាន់តែច្រើនឡើងៗ ពោលគឺឃាតកលាក់មុខដែលបានសម្លាប់មនុស្ស ដោយស្ងាត់កំបាំង និងដ៏គ្រោះថ្នាក់សម្រាប់សុខភាព និងសុខុមាលភាពមនុស្សជាតិ។
លោក ផៃ ច័ន្ទសុភី បន្តថា ជំងឺទឹកនោមផ្អែមនេះបានឲ្យមានបន្ទុកយ៉ាងធ្ងន់ធ្ងរសម្រាប់បុគ្គលអ្នកមានជំងឺផ្ទាល់សម្រាប់ក្រុមគ្រួសារ និងសង្គមជាតិ ដោយប៉ះពាល់សកម្មភាពការងារផលិតភាពរបស់គ្រួសារ និងខាតបង់ពេលវេលា ក្នុងការថែទាំអ្នកជំងឺបណ្តាលឲ្យបាត់បង់ចំណូលគ្រួសារ និងបាត់បង់ថវិកាជាតិផងដែរ។ ហើយជំងឺទឹកនោមផ្អែមនេះជាជំងឺរ៉ាំរៃ មិនអាចព្យាបាលឲ្យជាសះស្បើយបានឡើយ។ លោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តបានថ្លែងថា ប្រធានបទនៅឆ្នាំនេះគឺផ្តោតសំខាន់ទៅលើជំងឺទឹកនោមផ្អែម និងស្ត្រី។ មានមូលហេតុជាច្រើនទាក់ទងនឹងប្រធានបទនេះ។
សព្វថ្ងៃនេះមានស្ត្រីជាង១៩៩លាននាក់ នៅលើពិភពលោកដែលមានជំងឺទឹកនោមផ្អែម ហើយបើគ្មានវិធានការការពារទេចំនួននេះនឹងកើនដល់ទៅ៣១៣លាននាក់ក្នុងឆ្នាំ២០៤០ខាងមុខ។ មូលហេតុដែលពិធីនេះបានធ្វើឡើងនៅស្រុកមេមត់ ក្នុងចំណោម៧ស្រុកក្រុង គឺមានចំនួនច្រើនជាងគេ ហើយតាមរយៈការធ្វើតេស្តឈាមក្នុងពលរដ្ឋជាង១ម៉ឺននាក់ មានអ្នកកើតជំងឺជាង៣០០០នាក់នៅក្នុងខេត្តត្បូងឃ្មុំ ដោយឡែកសម្រាប់នៅស្រុកមេមត់វិញ មានពលរដ្ឋចំនួន៣៧២នាក់បានមកទទួលសេវាថ្នាំព្យាបាលជំងឺទឹកនោមផ្អែមនោះ៕
https://www.youtube.com/embed/wwQsv5Ax_ls
ចែករំលែកព័តមាននេះ