ខេត្តបាត់ដំបង ៖ មន្ត្រីកងរាជអាវុធហត្ថបានឲ្យដឹងថា មន្ត្រីជំនាញបានបើកកិច្ចប្រតិបត្តិការតាមបង្ក្រាបមុខសញ្ញាជួញដួរថ្នាំញៀនចំនួន៣នាក់ ក្នុងរយៈពេល២ថ្ងៃ ក្នុងសំណុំរឿងតែមួយ ដែលឃាត់ខ្លួនជនសង្ស័យបានចំនួន៣នាក់ និងរឹបអូសបានវត្ថុតាងថ្នាំញៀនជាច្រើនទៀត ។
សេចក្ដីរាយការណ៍បានឱ្យដឹងថា កិច្ចប្រតិបត្តិការដំបូង បានធ្វើឡើងកាលពីយប់ថ្ងៃ
ទី១៣ វិច្ឆិកា ស្ថិតនៅចំណុចភូមិ២០ឧសភា សង្កាត់ស្វាយប៉ោ ក្រុងបាត់ដំបង ដោយឃាត់ខ្លួនជនសង្ស័យម្នាក់ឈ្មោះទិត្យ ចន្ទ្រា ហៅម៉ៅ និងរឹបអូសវត្ថុតាងថ្នាំញៀនមួយចំនួន ។ ក្រោយពីសួរនាំ ជននេះបានសារភាពប្រាប់ពីបក្សពួករបស់ខ្លួន ទើបមន្ត្រីជំនាញធ្វើការស្រាវជ្រាវឃាត់ខ្លួនជនសង្ស័យចំនួន២នាក់ ជាបន្តបន្ទាប់ទៀត ដែលម្នាក់ឈ្មោះកែវ វណ្ណនុច ឃាត់ខ្លួនកាលពីម៉ោង១១ថ្ងៃត្រង់ថ្ងៃទី១៤ វិច្ឆិកា នេះ ស្ថិតនៅចំណុចភូមិដង្កោទាប សង្កាត់ទូលតាឯក រឹបអូសវត្ថុតាងថ្នាំញៀនមួយចំនួន ។ លុះកន្លះម៉ោងក្រោយ មន្ត្រីជំនាញបានឃាត់ខ្លួនបក្សពួកម្នាក់ទៀត ឈ្មោះលាប ហេង នៅភូមិជ្រៃកោង សង្កាត់ស្កាកែត ក្រុងបាត់ដំបង និងដកហូតបានវត្ថុតាងមួយចំនួនទៀត។
បើតាមរបាយការណ៍របស់កងរាជអាវុធហត្ថក្រុងបាត់ដំបងបានឱ្យដឹងថា ជាមួយនឹងការកិច្ចប្រតិបត្តិការបង្ក្រាបមុខសញ្ញាជួញដូរថ្នាំញៀនបំពានច្បាប់នេះ មន្ត្រីជំនាញបានរឹបអូសថ្នាំញៀន ដែលគេសង្ស័យថា ជាប្រភេទមេតំហ្វេតាមីនICE (ម៉ាទឹកកក) សរុបចំនួន៤៥កញ្ចប់ ស្មើនឹងទម្ងន់១៤,៤០ក្រាម ទូរស័ព្ទដៃ៦គ្រឿង និងសម្ភារះប្រើប្រាសថ្នាំញៀនមួយចំនួនទៀត។
មន្ត្រីជំនាញបានបញ្ជាក់ថា ក្រោយពីតាមឃាត់ខ្លួនជនសង្ស័យបានចំនួន៣នាក់ និងរឹបអូសវត្ថុតាងបានមួយចំនួន ពេលនេះ លោកមេបញ្ជាការកងរាជអាវុធហត្ថខេត្តបានបញ្ជាឲ្យមន្ត្រីជំនាញ សួរនាំជនសង្ស័យ ដើម្បីកសាងសំណុំរឿងបញ្ជូនទៅតុលាការហើយ។
ចែករំលែកព័តមាននេះ