ខេត្តកំពត ៖ សំណង់អាគារសិក្សា១ខ្នង ៥បន្ទប់ទុកជាចំណងដៃដ៏ថ្លៃថ្លា របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុនសែន ជូនដល់លោកគ្រូអ្នកគ្រូចៅៗសិស្សានុសិស្សសាលាបឋមសិក្សាវត្តអង្គពន្លឺ ស្ថិតនៅឃុំតានី ស្រុកអង្គរជ័យ ខេត្តកំពត ត្រូវបានប្រារព្ធពិធីបញ្ចុះបឋមសិក្សាសាងសង់នាព្រឹកថ្ងៃទី១១ ខែវិច្ឆិកា ឆ្នាំ២០១៧ ក្រោមអធិបតីភាព ឯកឧត្តមបណ្ឌិតប៉ែន ស៊ីម៉ន ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន នាយករដ្នមន្ត្រីនៃព្រះរាជាអាណាចក្រកម្ពុជា ឯកឧត្តមជឹង ផល្លា ឯកឧត្តម នៃ គង់ អភិបាលនៃគណអភិបាលរងខេត្តកំពតជាង១០០នាក់ ក្នុងពិធីនេះដែរ ។
បន្ទាប់ពីក្រុងពាលីបួងសួងសុំម្ចាស់ទឹកម្ចាស់ដីព្រៃប្រឹក្សា អ្នកតាភ្នំ សុំការអនុញ្ញាតិសាងសង់តម្រង់ផ្លូវទៅរកសុខ ចម្រើនតាមគន្លងប្រពៃណីព្រះពុទ្ធសាសនាផង ព្រហ្មសាសនាផង គម្រប់គ្រប់កាលកំណត់ ។
ឯកឧត្តមបណ្ឌិត ប៉ែនស៊ីម៉នមានប្រសាសន៍ថា តបតាមសំណូមពររបស់លោកគ្រូអ្នកគ្រូ មាតាបិតា អាណាព្យាបាលសិស្សទាំង៣ភូមិ មានភូមិត្រពាំងរុន ត្រពាំងរាំង និងភូមិតាព្រាហ្ម ឃុំតានី ក្នុងស្រុកអង្គរជ័យ ស្តីពីតម្រូវការចាំបាច់នៃការរៀនសូត្ររបស់ចៅៗសិស្សានុសិស្សបឋមសិក្សាវត្តអង្គពន្លី ទើបសម្តេចតេជោហ៊ុន សែន និងសម្តេចកិត្តិព្រឹទ្ធប៊ុន រានីហ៊ុនសែន សម្រេចផ្ដល់ជូនតាមរយៈឯកឧត្តមផ្ទាល់ ។ ដោយកំណត់អោយហើយរួចរាល់ ជាស្ថាពរក្នុងរយៈពេលតែ១០០ថ្ងៃប៉ុណ្ណោះ ។ ឯកឧត្តម បានក្រើនរំលឹកដល់ក្រុមជាងសាងសង់ត្រូវគិតពីគុណភាព សោភណ្ឌភាពស្របតាមស្តង់ដាកំណត់ ។ ឯកឧត្តម បណ្ឌិតបានប្រគេនបច្ច័យ១០លានរៀល សម្រាប់ការកសាងវត្តយសមេត្រីថ្មី ប្រគល់ថវិការចំនួន៤លាន៥សែនរៀល ដល់អនុវិទ្យាល័យអង្គភ្នំតូច ផ្ដល់ថវិការ៦០ម៉ឺនរៀល ដល់ក្រុមភ្លេងពិណពាទ្យចែកជូនចៅសិស្សានុសិស្សបឋមសិក្សាវត្តអង្គពន្លឺចំនូន៣៤៩នាក់ ម្នាក់ៗថវិកា៥ពាន់រៀល នំបង្កង១កំប៉ុង ទឹកដោះគោ១ប្រអប់និង សូកូឡា១កញ្ចប់ ។
គួរបញ្ជាក់ថា នេះជាសំណង់អាគារសិក្សាទី២ហើយ ដែលសម្តេចតេជោ ហ៊ុន សែន ផ្តល់ជូនសាលាបឋមសិក្សាវត្តអង្គពន្លឺតាមរយៈឯកឧត្តមបណ្ឌិត ប៉ែន ស៊ីម៉ន និងលោកជំទាវក្នុងរយៈពេលកន្លងមកនេះ ៕
ចែករំលែកព័តមាននេះ