រាជធានីភ្នំពេញ៖ ថ្នាក់ដឹកនាំប្រទេសចិន ក្នុងជំនួបពិភាក្សាការងាររវាងសម្ដេចតេជោ ហ៊ុន សែន ថ្មីៗនេះបានសន្យាថា ប្រទេសចិននឹងជួយឲ្យអស់លទ្ធភាពដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះឲ្យបានរហ័សនៅក្នុងប្រទេសកម្ពុជា ។
យោងតាមបណ្តាញសង្គមហ្វេសប៊ុកសម្តេចតេជោ ហ៊ុន សែន បានឲ្យដឹងថា ជំនួបពិភាក្សាកាលពីថ្ងៃទី១៣ វិច្ឆិកា លក្ខណៈទ្វេរភាគីរវាង សម្តេចតេជោ ជាមួយលោក លី កឺឈៀង នាយករដ្ឋមន្ត្រីនៃសាធារណរដ្ឋប្រជាមានិតចិន នៅក្នុងឱកាសនៃការអញ្ជើញចូលរួមកិច្ចប្រជុំកំពូលអាស៊ានលើកទី៣១ និងកិច្ចប្រជុំពាក់ព័ន្ធនៅទីក្រុងម៉ានីល ប្រទេសហ្វីលីពីននោះ លោកលី កឺឈៀង បានសម្តែងសេចក្តីរីករាយដែលបានជួបសម្តេចតេជោនាយករដ្ឋមន្ត្រីជាថ្មីម្តងទៀត ក្នុងនាមជាមិត្តចាស់របស់ចិន។
លោកបន្តថា នេះគឺបានបង្ហាញបង្ហាញច្បាស់អំពីទំនាក់ទំនងយ៉ាងជិតស្និទ្ធកាន់តែល្អប្រសើរជាលំដាប់រវាងកម្ពុជា និងប្រទេសចិន ជាពិសេសគឺរវាងសម្តេចតេជោនាយករដ្ឋមន្ត្រី និងថ្នាក់ដឹកនាំជាន់ខ្ពស់ចិន។
លោកលី កឺឈៀង បានបញ្ជាក់ឡើងវិញនូវការប្តេជ្ញារួមគ្នាជំរុញទំនាក់ទំនងមិត្តភាពរវាងប្រទេសទាំងពីរឱ្យដល់កម្រិតកាន់តែខ្ពស់ថែមទៀត។ ភាគីមិត្តចិនបានជម្រាបជូនសម្តេចតេជោថា ការដោះមីន និងយុទ្ធភ័ណ្ឌមិនទាន់ផ្ទុះ ជាសកម្មភាពអទិភាពដ៏សំខាន់មួយរបស់រដ្ឋាភិបាលចិនក្នុងការជួយប្រទេសនានា ដែលកំពុងជួបប្រទះនូវបញ្ហានេះ។
បើតាមបណ្តាញសង្គមហ្វេសប៊ុកសម្តេចតេជោហ៊ុនសែនបានឲ្យដឹងថា៖ «ភាគីមិត្តចិនសន្យាថានឹងជួយឱ្យអស់លទ្ធភាពដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះឱ្យបានឆាប់រហ័ស និងស្នើឱ្យស្ថាប័នពាក់ព័ន្ធនៃប្រទេសទាំងពីរធ្វើការពិភាក្សាលើទិដ្ឋភាពជាក់ស្តែង ហើយដាក់ជូនថ្នាក់ដឹកនាំទាំងពីរពិនិត្យ និងសម្រេចឱ្យបាន មុនពេលទស្សនកិច្ចផ្លូវការរបស់លោកនាយករដ្ឋមន្ត្រីចិននៅកម្ពុជានាពេលខាងមុខនេះ»។
ចែករំលែកព័តមាននេះ