រាជធានីភ្នំពេញ៖ ប្រធានាធិបតីសហរដ្ឋអាមេរិកលោក ដូណាល់ ត្រាំ បានស្នើឱ្យអាស៊ាន បង្កើនកិច្ចសហប្រតិបត្តិការលើវិស័យសេដ្ឋកិច្ចឱ្យកាន់តែខ្លាំងក្លាជាងមុន ។ នេះបើយោងតាមព័ត៌មាននៅលើគណនីហ្វេសប៊ុករបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
សម្តេចតេជោបានបង្ហោះសារដោយសរសេរថា លោក ត្រាំ បានថ្លែងបែបនេះនៅឯកិច្ចប្រជុំកំពូលកំពូលលើកទី៥ ដើម្បីរំលឹកខួបអនុស្សាវរីយ៍លើកទី៤០ នៃទំនាក់ទំនងសន្ទនា អាស៊ាន-សហរដ្ឋអាមេរិកនៅមជ្ឈមណ្ឌលសន្និសីទវប្បធម៌ម៉ានីល ទីក្រុងម៉ានីល សាធារណរដ្ឋហ្វីលីពីន ។
សម្តេចតេជោបញ្ជាក់ថា៖ «លោកប្រធានាធិបតីអាមេរិកបានស្នើឲ្យអាស៊ានបង្កើនកិច្ចសហប្រតិបត្តិការលើវិស័យសេដ្ឋកិច្ច ពោលគឺកាលពីឆ្នាំ២០១៦កន្លងទៅ ទំហំសេដ្ឋកិច្ចអាស៊ាន អាមេរិកជាង ២១១ពាន់លានដុល្លារអាមេរិក ហើយឯកឧត្តម គឺនៅតែគាំទ្រនូវតួនាទីស្នូលរបស់អាស៊ាន»។
មេដឹកនាំអាស៊ាន អាមេរិក បានប្តេជ្ញាខ្ពស់លើការអនុវត្តផែនការសកម្មភាព ទាំងពេលបច្ចុប្បន្នទៅអនាគត លើយន្តការដែលមានស្រាប់ និងលើគ្រប់វេទិកាទាំងអស់ ព្រមទាំងបានឈានទៅដល់ការអនុម័តលើសេចក្តីថ្លែងការណ៍ នៃការប្រារព្ធខួបលើកទី៤០ឆ្នាំ នៃទំនាក់ទំនងដៃគូសន្ទនារវាងអាស៊ាន អាមេរិក និងទិសដៅទៅអនាគតមេដឹកនាំនៃប្រទេសអាស៊ានទាំង១០ រួមទាំងឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក បានយាង និងអញ្ជើញចូលរួមកិច្ចប្រជុំកំពូលដ៏មានសារសំខាន់នេះ។ មេដឹកនាំនៃប្រទេសអាស៊ាន និងសហរដ្ឋអាមេរិក បានចូលរួមអបអរសាទរយ៉ាងកក់ក្តៅបំផុត ចំពោះខួបអនុស្សាវរីយ៍៤០ឆ្នាំ នៃទំនាក់ទំនងដៃគូសន្ទនាអាស៊ាន សហរដ្ឋអាមេរិក ពិសេសបានគាំទ្រការអនុម័តសេចក្តីប្រកាសរួម នៃកិច្ចប្រជុំកំពូលរំលឹកខួបអនុស្សាវរីយ៍អាស៊ាន សហរដ្ឋអាមេរិក។
នៅក្នុងកិច្ចប្រជុំកំពូលនោះដែរ មេដឹកនាំអាស៊ានបានលើកទឹកចិត្តដល់សហរដ្ឋអាមេរិក បន្តពង្រឹងភាពជាអ្នកដឹកនាំវ័យក្មេង និងការកសាងសមត្ថភាពយុវជន និងស្ត្រីតាមរយៈការផ្តល់នូវអាហារូបករណ៍បន្ថែមដល់សិស្ស និងនិស្សិតបណ្តាប្រទេសអាស៊ាន និងស្វាគមន៍ ចំពោះការបញ្ជាក់ពីការប្ដេជ្ញាចិត្តរបស់សហរដ្ឋអាមេរិក ដើម្បីជំរុញភាពជាដៃគូយុទ្ធសាស្ត្រអាស៊ាន សហរដ្ឋអាមេរិក និងការគាំទ្ររបស់សហរដ្ឋអាមេរិក ដល់ការកសាងសហគមន៍អាស៊ាន ជាពិសេសការគាំទ្រចំពោះតួនាទីស្នូលរបស់អាស៊ាន នៅក្នុងនិម្មាបនកម្មតំបន់៕
ចែករំលែកព័តមាននេះ