រាជធានីភ្នំពេញ ៖ កិច្ចព្រមព្រៀងទិញលក់អង្កររវាងកម្ពុជា និងប្រទេសបង់ក្លាដែស ដែលបានចុះហត្ថលេខាកាលពីពាក់កណ្ដាលឆ្នាំនេះ ត្រូវបានពន្យារពេល ដោយសារតែកម្ពុជាមិនទាន់បានត្រៀមខ្លួនរួចរាល់ដើម្បីរកផលិតផលសម្រាប់នាំចេញ និងកត្តាមួយចំនួនទៀត។ ទោះបីយ៉ាងណា កិច្ចព្រមព្រៀងនៅតែមានសុពលភាព…
រាជធានីភ្នំពេញ ៖ កិច្ចព្រមព្រៀងទិញលក់អង្កររវាងកម្ពុជា និងប្រទេសបង់ក្លាដែស ដែលបានចុះហត្ថលេខាកាលពីពាក់កណ្ដាលឆ្នាំនេះ ត្រូវបានពន្យារពេល ដោយសារតែកម្ពុជាមិនទាន់បានត្រៀមខ្លួនរួចរាល់ដើម្បីរកផលិតផលសម្រាប់នាំចេញ និងកត្តាមួយចំនួនទៀត។ ទោះបីយ៉ាងណា កិច្ចព្រមព្រៀងនៅតែមានសុពលភាព និងអាចចរចាឡើងវិញ ។ នេះបើតាមអនុប្រធានសហព័ន្ធស្រូវអង្ករកម្ពុជាបានបញ្ជាក់ ។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា បានលើកឡើងថា អនុស្សរណៈយោគយល់គ្នា (MOU) រវាងកម្ពុជានិងបង់ក្លាដែស ស្ដីពីការទិញលក់អង្ករនៅតែមានសុពលភាពដដែល ព្រោះក្នុងកិច្ចព្រមព្រៀងនោះ មានសុពលភាពរហូតដល់៥ឆ្នាំឯណោះ ។
លោកបញ្ជាក់ថា ៖« យើងមិនបានលុបចោលនូវកិច្ចព្រមព្រៀងនេះទេ តែយើងគ្រាន់តែពន្យារពេលក្នុងការទិញលក់ប៉ុណ្ណោះ ព្រោះក្រោយពិធីចុះ MOU មក យើងបានចរចាជាមួយភាគីបង់ក្លាដែសជាច្រើន តែដោយសារពេលវេលាយើងសម្រាប់ធ្វើកិច្ចការនេះ វាហាក់ដូចជាលឿន និងប្រថុចញ៉ុចពេក ទើបយើងមិនទាន់កំណត់ពេលប្រគល់ទំនិញទៅបង់ក្លាដែសបាន » ។
លោកឧកញ៉ាបន្តថា កម្ពុជាបានចុះ MOUជាមួយបង់ក្លាដែស កាលពីពេលពាក់កណ្ដាលឆ្នាំនេះ ហើយតាំងពីនោះមក កម្ពុជាបានចរចាជាមួយភាគីខាងបង់ក្លាដែសជាច្រើនចំណុច ព្រមទាំងត្រៀមផលិតផលសម្រាប់គេផងដែរ ប៉ុន្តែដោយសារតែមិនមានពេលគ្រប់គ្រាន់ និងមានចំណុចខ្លះដែលភាគីទាំងពីរមិនទាន់ត្រូវរ៉ូវគ្នា ទើបភាគីខាងបង់ក្លាដែសបង្វែរការទិញអង្ករពីកម្ពុជា ទៅទិញពីបណ្ដាប្រទេសផ្សេងសិន ។
លោកឧកញ៉ាបញ្ជាក់ថា ៖« ពេលណាកម្ពុជាត្រៀមខ្លួនរួចរាល់ ហើយចរចាត្រូវគ្នាពេលណានោះ កិច្ចសន្យាថ្មីមួយទៀតរវាងភាគីទាំងពីរនឹងកើតឡើងម្ដងទៀត ហើយពេលនោះ អង្កររបស់កម្ពុជា នឹងត្រូវបាននាំចេញទៅកាន់ប្រទេសដែលបានចុះហត្ថលេខាទិញពីកម្ពុជាយើង » ។
លោកឧកញ៉ាបន្ថែមថា ចំណុចដែលកម្ពុជាត្រូវចរចាជាមួយភាគីបង់ក្លាដែសនោះ គឺការប្រមូល និងការទូទាត់រាល់ឯកសារនានាពាក់ព័ន្ធនឹងកិច្ចព្រមព្រៀងរបស់ប្រទេសទាំងពីរ តែបង់ក្លាដែសគេចង់បានភ្លាមៗ ដែលកម្ពុជាមិនអាចផ្ដល់ជូនបានទៅតាមការចង់បានភ្លាមទេ ។
សូមបញ្ជាក់ថា ដើម្បីលើកកម្ពស់វិស័យស្រូវអង្ករនៅក្នុងប្រទេសកម្ពុជាឲ្យកាន់តែប្រសើរឡើង រាជរដ្ឋាភិបាលកម្ពុជា ដែលមានក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍ជនបទ បានបញ្ចេញទុនបន្ថែមទៀត ដើម្បីផ្ដល់ហិរញ្ញប្បទានដល់វិនិយោគិនក្នុងវិស័យនេះ សង់ឡសម្ងួត និងឃ្លាំងស្តុកស្រូវបន្ថែមទៀត ក្នុងគោលបំណងទប់ស្កាត់ការលក់ស្រូវសើម និងតម្លៃទាបទៅឈ្មួញបរទេសជិតខាង ។
កាលពីចុងខែមុននេះ ធនាគារអភិវឌ្ឍន៍ជនបទ ក៏បានផ្ដល់កម្ចីចំនួន១៥លានដុល្លារអាមេរិក ដើម្បីសង់ឡសម្ងួត និងឃ្លាំងស្តុកស្រូវ៣ទីតាំងក្នុងខេត្ត៣ផ្សេងគ្នា ។ ក្រោយឡសម្ងួតសង់រួច កម្ពុជារំពឹងថា នឹងអាចសម្ងួតស្រូវបានកាន់តែច្រើន និងអាចរក្សាស្រូវក្នុងឃ្លាំងបានបន្ថែមទៀត ហើយនៅពេលនោះ កម្ពុជានឹងសល់ស្រូវអង្ករក្នុងឃ្លាំងកាន់តែច្រើន ដើម្បីនាំទៅកាន់បណ្ដាប្រទេសដែលមានតម្រូវការ ដូចករណីប្រទេសបង់ក្លាដែសនេះ ។
គួរបញ្ជាក់ថា កាលពីថ្ងៃទី១៣ វិច្ឆិកា ម្សិលមិញនេះដែរ ក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាជាមួយភាគីចិន ក្នុងការលើកកម្ពស់វិស័យស្រូវអង្ករកម្ពុជាផងដែរ ។ នៅក្នុងអនុស្សរណៈរវាងទាំងពីរប្រទេសនោះ នឹងសាងសង់ប្រព័ន្ធឡសម្ងួតស្រូវបន្ថែមចំនួន១៥ទីតាំង នៅក្នុងខេត្តសក្ដានុពលផលិតស្រូវចំនួន១១ ដែលអាចសម្ងួតស្រូវបានរហូតដល់១៩.៥០០តោនក្នុង១ថ្ងៃ ព្រមទាំងអាចស្តុកស្រូវអង្ករបានរហូតដល់១លានតោន ៕
ចែករំលែកព័តមាននេះ