រាជធានីភ្នំពេញ ៖ បន្លែលើទឹក ឬហៅថា បន្លែ Hydroponics ចាប់តាំងពីមានការនាំចូលបច្ចេកទេសនេះមក គឺមានរយៈពេលជិត១០ឆ្នាំហើយ ប៉ុន្ដែទីផ្សារបន្លែនេះហាក់ស្ងប់ស្ងាត់ បើទោះបីជាការដាំដុះគ្មានការប្រើជីគីមីក៏ដោយ…
រាជធានីភ្នំពេញ ៖ បន្លែលើទឹក ឬហៅថា បន្លែ Hydroponics ចាប់តាំងពីមានការនាំចូលបច្ចេកទេសនេះមក គឺមានរយៈពេលជិត១០ឆ្នាំហើយ ប៉ុន្ដែទីផ្សារបន្លែនេះហាក់ស្ងប់ស្ងាត់ បើទោះបីជាការដាំដុះគ្មានការប្រើជីគីមីក៏ដោយ ។ ទោះជាយ៉ាងណា សព្វថ្ងៃ មានប្រជាពលរដ្ឋកាន់តែច្រើនឡើងកំពុងចាប់អារម្មណ៍ចង់ចេះដាំដុះបន្លែលើទឹកនេះ ។
បើតាមអ្នកជំនាញដាំបន្លែលើទឹក អ្នកស្រី ប៉ា វីណា បានប្រាប់កោះសន្ដិភាពថា សម្រាប់បច្ចេកទេសដាំបន្លែលើទឹកនេះ គឺកំពុងមានការចាប់អារម្មណ៍ខ្លាំង ។
អ្នកស្រីបន្ដថា បច្ចុប្បន្ន កសិដ្ឋានរបស់អ្នកស្រី មិនបាននាំចេញបន្លែនេះទេ គឺគ្រាន់តែលក់ជូនភ្ញៀវ និងទុកសម្រាប់ផ្គត់ផ្គង់តាមការបញ្ជាទិញនៅតាមភោជនីយដ្ឋានប៉ុណ្ណោះ ព្រោះកសិដ្ឋានរបស់អ្នកស្រីផ្ដោតទៅលើការបណ្ដុះបណ្ដាលជំនាញដាំដុះ ។ បើទោះបីជាទីផ្សារមិនទូលំទូលាយ ប៉ុន្ដែមានអ្នកមកចូលរៀនពីបច្ចេកទេសដាំដុះច្រើនគួរឲ្យកត់សម្គាល់ ។ ចំណែកបន្លែមានច្រើនមុខ ដូចជា ស្ពៃ សាឡាត់ ការ៉ុត ខាត់ណា និងបន្លែផ្សេងទៀត ។
អ្នកស្រីបញ្ជាក់ថា ៖« ចំពោះការដាំដុះ យើងធ្វើការដាំជារង ដោយប្រើទុយោនៅតាមកន្លែងផ្សេងៗ និងប្រើទឹកជំនួសដី ជាពិសេស មានទទួលបង្រៀនសិស្សដោយតម្លៃសមរម្យទៅតាមវគ្គនីមួយៗ » ។
គ្រូបង្រៀនសាលាបច្ចេកទេស ដុន បូស្កូ ខេត្តកែប ផ្នែកផលិតកម្ម និងបសុព្យាបាល បានឲ្យដឹងថា ការដាំបន្លែលើទឹក ជាបច្ចេកទេសថ្មីដែលបាននាំចូលមកកម្ពុជាក្នុងអំឡុងឆ្នាំ២០១១ដោយសារការមើលឃើញនៃភាពជឿនលឿន និងចំណាយពេលតិចក្នុងការដាំដុះ ។
លោក សំ ផាណា គ្រូបង្រៀនផ្នែកបច្ចេកទេសនេះ បានបន្ដថា ៖« បច្ចេកទេសនៃការដាំបន្លែលើទឹកនេះ វាអាចថាជាវិធីសាស្ត្រថ្មី ដែលប្រទេសកម្ពុជាយើងចាប់ផ្ដើមក្នុងអំឡុងឆ្នាំ២០១១ ។ ចំណែកប្រទេសដទៃ ការប្រើបច្ចេកទេសដាំបន្លែលើទឹកនេះ គឺប្រហែលជាមុនឆ្នាំ២០០០ » ។
លោកបន្តថា ការដាំបន្លែលើទឹក គឺវាងាយស្រួលក្នុងការគ្រប់គ្រង ដូចជា សត្វល្អិត ទីកន្លែង កម្លាំងពលកម្ម និងឆាប់ទទួលបានផលជាងការដាំលើដី ។ ប៉ុន្តែសម្រាប់ការផ្គត់ផ្គង់ទីផ្សារវិញ មិនទាន់អាចនាំចេញបានទេ ។
លោកបញ្ជាក់ថា ៖« សព្វថ្ងៃ យើងដាំដុះបន្លែនេះ គ្រាន់តែផ្គត់ផ្គង់នៅក្នុងសាលាប៉ុណ្ណោះ ប៉ុន្ដែអ្វីសំខាន់ សាលាយើងចង់ឲ្យសិស្សដែលចាប់យកជំនាញនេះ ចេះប្រើបច្ចេកទេសដាំដុះដូចបណ្ដាប្រទេសជឿនលឿនដទៃទៀត » ៕
ចែករំលែកព័តមាននេះ