រាជធានីភ្នំពេញ៖ ស្ថានទូតសហរដ្ឋអាមេរិកប្រចាំនៅកម្ពុជានឹងធ្វើពិធីអបអរខួបលើកទី ៥០ នៃទស្សនកិច្ចរបស់លោកជំទាវ Jacqueline Kennedy នៅកម្ពុជា (ឆ្នាំ ១៩៦៧-២០១៧) ។…
រាជធានីភ្នំពេញ៖ ស្ថានទូតសហរដ្ឋអាមេរិកប្រចាំនៅកម្ពុជានឹងធ្វើពិធីអបអរខួបលើកទី ៥០ នៃទស្សនកិច្ចរបស់លោកជំទាវ Jacqueline Kennedy នៅកម្ពុជា (ឆ្នាំ ១៩៦៧-២០១៧) ។ នេះបើយោងតាមសេចក្តីប្រកាសព័ត៌មានរបស់ទូតអាមេរិកចុះថ្ងៃទី១៣ វិច្ឆិកា។ ស្ថានទូតសហរដ្ឋអាមេរិកនៅរាជធានីភ្នំពេញនឹងប្រារព្ធពិធីអបអរសាទរខួបលើកទី៥០ នៃទស្សនកិច្ចរបស់អតីតស្ត្រីទី១ អាមេរិក លោកជំទាវ Jaqueline Kennedy នៅក្នុងប្រទេសកម្ពុជា ក្នុងឆ្នាំ១៩៦៧។
ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក William Heidt នឹងកាត់ខ្សែបូរបើកពិធី តាំងពិព័រណ៌រូបថតនៅសណ្ឋាគារនេះ ស្តីពីទស្សនកិច្ចរបស់លោកជំទាវនៅក្នុងព្រះរាជាណាចក្រកម្ពុជា។
សេចក្តីប្រកាសព័ត៌មានរបស់ទូតអាមេរិកបន្តថា៖ «ពិធីនេះ គឺជាឱកាសសំរាប់ធ្វើការអបអរស្តីពីសារសំខាន់នៃទំនាក់ទំនងការទូត រវាងសហរដ្ឋអាមេរិកនិងប្រទេស កម្ពុជា»។
សូមបញ្ជាក់ថា កាលពី ៥០ ឆ្នាំមុន លោកជំទាវ Jaqueline Kennedy បានមកធ្វើទស្សនកិច្ចនៅកម្ពុជា ដើម្បី បំពេញនូវ «សុបិន្តក្នុងមួយជីវិត កាលពីនៅក្មេង» ក្នុងការបានមើលប្រាសាទអង្គរ ដែលជាប្រាសាទបូរាណខ្មែរ។ ទស្សនាវដ្តីដ៏ល្បីរបស់អាមេរិកឈ្មោះ «Life» បានសរសេរពីដំណើរទស្សនកិច្ចរបស់លោកជំទាវមកកាន់ប្រទេសកម្ពុជា។ ពិធីនេះនឹងប្រព្រឹត្តទៅនៅម៉ោង ៥និង៣០ ល្ងាច ថ្ងៃទី ១៤ ខែវិច្ឆិកា នៅសណ្ឋាគារ Raffles Hotel Le Royal ក្នុងរាជធានីភ្នំពេញ។
ចែករំលែកព័តមាននេះ