ខេត្តស្វាយរៀង ៖ កម្មករកម្មការិនីរោងចក្រកាត់ដេរ យូលី រាប់ពាន់នាក់នាំគ្នាធ្វើកូដកម្មតវ៉ាថៅកែចិនចាប់កម្មការិនីបង្ខាំងក្នុងទ្រុង ហើយដាក់ទណ្ឌកម្មឲ្យធ្វើការតាមលក្ខណ្ឌរបស់រោងចក្រខុសពីច្បាប់ការងារ និងរើសអើងចំពោះស្ត្រីមានផ្ទៃពោះ និងស្ត្រីសម្រាលកូនរួច ធ្វើឲ្យកម្មករ កម្មការិនីខឹងសម្បានាំគ្នាធ្វើកូដកម្មតវ៉ាទាមទារឲ្យថៅកែរោងចក្រកាត់ដេរ យូលី អនុត្តតាមច្បាប់កាងារដោយដាក់លក្ខខណ្ឌ០៥ចំណុច សុំឲ្យមន្ទីរការងារ និងបណ្តុះបណ្តាលវិជ្ជាជីវៈដោះស្រាយ។ ការធ្វើកូដកម្មនេះកើតឡើងនៅព្រឹកថ្ងៃទី១៣ វិច្ឆិកា២០១៧ វេលាម៉ោង៧ និង៣០នាទីព្រឹក នៅខាងមុខរោងចក្រ យូលី នៅក្នុងតំបន់សេដ្ឋកិច្ចពិសេសសានតុង ស្ថិតនៅភូមិជ្រៃធំ សង្កាត់ព្រៃអង្គុញ ក្រុងបាវិត រហូតដល់វេលាម៉ោង១២ថ្ងៃត្រង់ ទើបបំបែកគ្នាត្រឡប់ទៅផ្ទះវិញមិនព្រមចូលធ្វើការ។
បើតាមកម្មករ កម្មការិនីបានឲ្យដឹងថា ថៅកែចិនបានរឹតបន្តឹងការងារទៅលើកម្មករ កម្មការិនីរយៈពេលបីខែមកហើយ គឺចាប់តាំងពីផ្លាស់ប្តូរថ្នាក់ដឹកនាំ ជនជាតិចិនមកថ្មី មានការើសអើងលើស្ត្រីមានផ្ទៃពោះ និងស្ត្រីសម្រាលកូនរួចដាក់ទណ្ឌកម្មចំពោះកម្មការិនីណាដែលដេរយឺត មិនគ្រប់តាមលក្ខខណ្ឌដែលក្រុមហ៊ុនកំណត់ បើមានស្ត្រីម្នាក់ ឬពីរនាក់ដេរយឺតត្រូវមេការចិនចាប់យកទៅបង្ខាំងក្នុងទ្រុង ហើយដាក់ទណ្ឌកម្មឲ្យធ្វើការដេរឲ្យបានភាគរយខ្ពស់ទើបឲ្យចូលក្រុមធ្វើការវិញ។ ហើយបើស្ត្រីណា នៅតែធ្វើការយឺត ឬឃើញថាមានកំហុស ត្រូវដាក់ទណ្ឌកម្មដាក់ក្នុងទ្រុងបង្អត់អាហារ បង្អត់ទឹកមួយថ្ងៃ រួចដេញចេញពីការងារបញ្ឈប់កុងត្រា។ ទាក់ទិនករណីថៅកែចិនចាប់បង្ខាំង និងដាក់ទណ្ឌកម្មលើកម្មករ កម្មការិនីរោងចក្រកាត់ដេរ យូលី នេះ លោក អ៊ូ សុខឿន អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត និងជាតំណាងក្រសួងការងារប្រចាំនៅតំបន់សេដ្ឋកិច្ចពិសេស បានឲ្យដឹងថា កម្មករ កម្មការិនី រោងចក្រកាត់ដេរ យូលី នាំគ្នាធ្វើកូដកម្មនេះតវ៉ាទាមទារលក្ខខណ្ឌ០៥ចំណុច និងប្តឹងក្រុមហ៊ុនកាត់ដេរ យូលី ពីបទមិនអនុវត្តន៍ច្បាប់ស្តីពីការងារ ហើយចោទថាក្រុមហ៊ុនយូលី កំពុងអនុវត្តលក្ខខណ្ឌការងារមួយចំនួនដែលមិនស្របតាមច្បាប់ការងារ។
១-ស្នើសុំឲ្យក្រុមហ៊ុនយូលី ឈប់រើសអើងចំពោះកម្មការនីមានផ្ទៃពោះនិងអ្នកសម្រាលកូនរួច។ ២-សុំឲ្យក្រុមហ៊ុនយូលី កុំឲ្យមានការអនុវត្តន៍កុងត្រាខ្លី រយៈពេលមួយខែ ដែលផ្ទុយពីច្បាប់ការងារ។ ៣-សុំឲ្យក្រុមហ៊ុនយូលី ធ្វើការណែនាំថ្នាក់ដឹកនាំជនជាតិចិនទាំងអស់ ឲ្យមានសីលធម៌ល្អ រាល់ការជជែក ឬណែនាំកម្មករ។ ៤-ក្រុមហ៊ុនយូលី ត្រូវពិនិត្យមើលឡើងវិញលើការកំណត់ចំនួនភាគរយខ្ពស់ (ដាក់កំណត់ការផលិតច្រើន) ហួសពីសមត្ថភាពរបស់កម្មករ កម្មការិនី។ ៥-សុំក្រុមហ៊ុនធ្វើការទូទាត់កម្រៃពលកម្ម ដែលកន្លងមកទូទាត់ពុំបានត្រឹមត្រូវជូនកម្មករកម្មការនីបាត់ខែណាត្រូវទូទាត់ខែនឹង។ លោក អ៊ូ សុខឿន ក៏បានមានប្រសាសន៍ថា ចំពោះករណីកម្មករចោទប្រកាន់ថៅកែក្រុមហ៊ុនយូលី បង្ខាំងកម្មករក្នុងទ្រុងដាក់ទណ្ឌកម្មឲ្យធ្វើការបង្អត់អាហារនោះ គឺពិតជាមានមែន ដាក់ទណ្ឌកម្មចំពោះកម្មការិនីណាធ្វើការយឺត មិនគ្រប់តាមការកំណត់របស់ក្រុមហ៊ុន ដោយក្រុមហ៊ុននិយាយថា ក្រុមហ៊ុនទទួលកុងត្រាពីក្រុមហ៊ុនបញ្ជាទិញដែរ ដូច្នេះត្រូវតែជំរុញឲ្យកម្មករផលិតឲ្យទាន់តាមអ្នកបញ្ជាទិញគឺ៖
គ្រាន់តែយកកម្មករ កម្មការិនីដែលធ្វើការដេរយឺត ទៅធ្វើការដាច់ដោយឡែកពីកម្មការិនីដទៃងាយស្រួល មេការតាមដាន និងជំរុញការដេរឲ្យបានច្រើនតាមការកំណត់ពុំមានដាក់ទណ្ឌកម្មទេ។ លោក អ៊ូ សុខឿន បន្តទៀតថា លទ្ធផលការប្រជុំដោះស្រាយតំណាងក្រុមហ៊ុនព្រមទទួលយកតាមសំណើររបស់កម្មករកម្មការនីទាមទារទាំង៥ចំណុច។ ហើយចំពោះរបាដែកដាក់បង្ខាំងកម្មការិនីនោះក្រុមហ៊ុនសន្យាថា ហៅជាងឲ្យមករុះរើចេញវិញនៅវេលាម៉ោង២រសៀល ថ្ងៃទី១៣ វិច្ឆិកា ២០១៧នេះ។ ចំណែកកម្មករ កម្មការិនីដែលនាំគ្នាកូដកម្មមិនចូលធ្វើការនោះបាននិយាយថា ពួកគេមិនជឿលើថ្នាក់ដឹកនាំចិនទេ លុះត្រាតែមានចេញជាលិខិត លាយលក្ខណ៍អក្សរបិទប្រកាសជាសាធារណៈ ទើបជឿ និងចូលធ្វើការវិញ៕
https://youtu.be/i0v1tGoWUFI
ចែករំលែកព័តមាននេះ