រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ថា មានមនុស្សមួយក្រុមតូច ដែលមាននិន្នាការប្រឆាំងជាមួយនឹងរាជរដ្ឋាភិបាលបច្ចុប្បន្ននេះ បាននិយាយថា លទ្ធិប្រជាធិបតេយ្យ នៅកម្ពុជាខ្សោយ មិនមានតម្លាភាព ព្រោះតែកម្ពុជាទើបមានសុខសន្តិភាពមានរយៈពេល១៩ឆ្នាំប៉ុណ្ណោះ ហើយយកកម្ពុជាទៅប្រៀបជាមួយនឹងអាមេរិក ដែលមានលទ្ធិប្រជាធិបតេយ្យជាង២៥០ឆ្នាំមកហើយ។ លោក ឃួង ស្រេង មានប្រសាសន៍បែបនេះ នៅក្នុងពិធីបើកការដ្ឋានដាក់លូនៅអមសងខាងផ្លូវ១៩៦២ ស្ថិតក្នុងខណ្ឌសែនសុខ កាលពីព្រឹកថ្ងៃទី១៣ វិច្ឆិកា ២០១៧នេះ។ លោក ឃួង ស្រេង មានប្រសាសន៍ទៀតថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានស្វែងរកសន្តិភាព ជូនប្រជាជនកម្ពុជា ហើយប្រទេសកម្ពុជាមានសន្តិភាពពេញលេញនៅត្រឹមឆ្នាំ២០០៨ រហូតមកដល់ថ្ងៃនេះ មានរយៈពេល១៩ឆ្នាំហើយ។
លោកបានបញ្ជាក់ថា មានក្រុមមនុស្សមួយចំនួន ចេះតែនិយាយថាលទ្ធិប្រជាធិបតេយ្យ នៅកម្ពុជាខ្សោយណាស់ បើមិនខ្សោយ ពីព្រោះតែកម្ពុជាទើបតែមានសុខសន្តិភាពមានរយៈពេល១៩ឆ្នាំប៉ុណ្ណោះ ហើយយកកម្ពុជាទៅប្រៀបជាមួយនឹងអាមេរិក ដែលមានលទ្ធិប្រជាធិបតេយ្យជាង២៥០ឆ្នាំមកហើយ ដែលប្រជាធិបតេយ្យប្រទេសគេ បានពួនជ្រំ២៥០ឆ្នាំមកហើយ ហើយពួកគេបានយកប្រជាធិបតេយ្យមួយផ្ទាំង មកឲ្យកម្ពុជាធ្វើតាមគេភ្លាម ធ្វើវាអត់បានភ្លាមទេ វាមិនដែលយកកូនក្មេងទៅរៀនភ្លាម ហើយឲ្យប្រឡងបាក់ឌុបនោះទេ ដូច្នេះត្រូវតែរៀនចាប់ពីថ្នាក់ទី១ឡើងទៅ គឺនៅលើលោកមិនដែលមាននរណាយកប្រជាធិបតេយ្យមកដាក់ចាប់ហែកចែកគ្នាបែបនេះទេ ហើយយើងត្រូវមានមោទនភាពជាតិរបស់យើង ដែលមានដូចសព្វថ្ងៃនេះ ហើយគ្មាននរណានឹកឃើញថាប្រទេសកម្ពុជាមានសុខសន្តិភាពដូចសព្វថ្ងៃនេះទេ ហេតុនេះហើយ យើងត្រូវរួមគ្នាការពារសុខសន្តិភាពនេះឲ្យបានជារៀងរហូត ដើម្បីទទួលបាននូវការអភិវឌ្ឍន៍។
លោក ឃួង ស្រេង មានប្រសាសន៍ទៀតថា នៅស្រុកយើងសម្បូរអ្នកប្រាជ្ញច្រើនណាស់ ហើយនៅពេលពួកគេកំពុងជាប់ពិភាក្សាគ្នា គឺមិនមើលមុខស្តេចនោះទេ ហើយស្តេចបានប្រាប់ស្នំថាកុំប្រកាន់អ្នកប្រាជ្ញអី ព្រោះប្រាជ្ញគេជជែកគ្នាតែអីចឹង។ ប៉ុន្តែអ្នកប្រាជ្ញមិនមែនសុទ្ធតែពូកែទាំងអស់នោះទេ តែក៏មានអ្នកប្រាជ្ញខ្លះ បើតាមធម៌ព្រះបានបញ្ជាក់ថា បែកកម្មឋាន ហើយអ្នកប្រាជ្ញដែលមិនបែកកម្មឋានគឺល្អធ្វើអ្វីដើម្បីប្រជាពលរដ្ឋ។ លោកបញ្ជាក់ថា “អ្នកប្រាជ្ញទាំងអស់កុំខឹងខ្ញុំ ពីព្រោះអ្នកប្រាជ្ញល្អបានគិតត្រឹមត្រូវ គិតពីប្រយោជន៍ជាតិ ដែលខុសពីអ្នកប្រាជ្ញមួយចំនួនតូច គិតតែមួយជ្រុងតូច។ លោក ឃួង ស្រេង បានបញ្ជាក់ថា សម្តេចបានមានប្រសាសន៍ហើយថា សមិទ្ធផលដែលបាននាពេលនេះ អត់មានបាតដៃបក្សប្រឆាំងណាមួយមកជួយទេ ប៉ុន្តែមានបងប្អូនមួយចំនួនមានការយល់ច្រឡំ នៅពេលដែលឃើញគេនិយាយល្អក៏បោះឆ្នោតឲ្យគេ គឺអ្នកដែលចាំតែនិយាយអត់មានអីពិបាកទេ ត្រូវទាំងអស់ ប៉ុន្តែអ្នកធ្វើ គឺមានខុសមានត្រូវ និងមានការមានឆកល្វែង ហើយអ្នកដែលល្អបំផុត គឺអ្នកមិនដែលធ្វើ និយាយអ្វីក៏ត្រូវ ព្រោះមានអណ្តាតចាំតែគ្រលាស់។ លោកបន្ថែមថា មន្ត្រីរាជការទាំងអស់ចាប់ពីឆ្នាំភូមិឡើងទៅ ក្លាយខ្លួនជាអ្នកបម្រើប្រជាពលរដ្ឋ យ៉ាងពិតប្រាកដ ប៉ុន្តែក៏មានមន្ត្រីខ្លះខិលខូចដែលបញ្ហានេះ ត្រូវមានការកែលម្អជាបន្ទាន់៕
watch?v=OzN4xuEMaTY
ចែករំលែកព័តមាននេះ