ខេត្ដព្រះវិហារ ៖ កាលពីថ្ងៃទី២៩ ខែឧសភា កន្លងទៅថ្មីៗនេះ សមត្ថកិច្ចបានចុះរុករក និងបង្ក្រាបបទល្មើសព្រៃឈើនៅតាម បណ្ដោយជួរភ្នំដងរែក ដឹកនាំដោយលោក ថុល គឹមហឹង ព្រះរាជអាជ្ញារងអមសាលា ដំបូងខេត្ដព្រះវិហារ រួមជាមួយលោក ស ថាវី អភិបាលរងខេត្ដ លោកប៉ុល ខាំណារ៉េ នាយ ខណ្ឌរដ្ឋបាលព្រៃឈើខេត្ដ លោកឧត្ដមសេ នីយ៍ត្រី សោម បុបា្ពរ័ត្ន មេបញ្ជាការសឹករង ព្រះវិហារ ព្រមទាំងសមត្ថកិច្ច កងកំលាំងជា ច្រើននាក់ដែលពាក់ព័ន្ធ ។ មន្ដ្រីផ្លូវការឱ្យដឹងថា មានសេចក្ដីរាយ ការណ៍ថា នៅមានការដឹកជញ្ជូនឈើគ្រញូង ទំលាក់ពីលើខ្នងភ្នំដងរែកក្បែរច្រកអានសេះ ភាគខាងកើត ដែលសេចក្ដីរាយការណ៍នេះ ទទួលបានពីកងទ័ពវរសេនាតូចលេខ២របស់ សឹករងខេត្ដឈរជើងលើភូមិសាស្ដ្រនោះ ដែលដើរល្បាតកាលពីថ្ងៃទី២៨ ឧសភា តាម បណ្ដោយជួរភ្នំដងរែកតាមចំណុចផែនទី ៤៩៦.៥៥៦-១៥៨៧.៨៩៣ ខ្នងភ្នំដងរែក ហើយបានចាប់ឃាត់ខ្លួនប្រជាពលរដ្ឋចំនួន ៧នាក់បញ្ជូនទៅអធិការដ្ឋានប៉ូលិសស្រុក ជាំក្សាន្ដ ។
លោកប៉ុល ខាំណារ៉េ នាយខណ្ឌរដ្ឋបាល ព្រៃឈើខេត្ដឱ្យកោះសន្ដិភាពដឹងអំពីករណី បទល្មើសនោះកាលពីថ្ងៃទី៣០ ឧសភា ថា សមត្ថកិច្ចដែលបានទៅដល់គោលដៅបាន បង្ក្រាបជនល្មើសដែលនៅតែបន្ដរកស៊ី អូសឈើប្រណីតទំលាក់ពីលើភ្នំដងរែក។ នៅថ្ងៃទី២៩ ឧសភា នៅតំបន់អានសេះ សមត្ថកិច្ចបានរកឃើញឈើគ្រញូងប្រមាណ ៥២ដុំ ដែលឈ្មួញលាក់ទុកនៅចំរាក់ភ្នំ។ តាម ការពិនិត្យឈើគ្រញូងដែលឈ្មួញលាក់ទុក នៅក្នុងចំរាក់ភ្នំនោះ គឺប្រហែលពី៤ទៅ៥ ខែមុន។ បច្ចុប្បន្នឈើដែលរកឃើញនោះ ត្រូវបានប្រគល់ឱ្យកងទ័ពវរសេនាតូចលេខ២ សឹករងខេត្ដព្រះវិហារដឹកជញ្ជូនទៅរក្សាទុក នៅទីបញ្ជាការវរសេនាតូចលេខ២ស្ថិតក្នុងចំណុចទួលឈើក្រំក្បែរច្រកអានសេះក្រោម ការឧបត្ថម្ភពីខណ្ឌរដ្ឋបាលព្រៃឈើខេត្ដដូចជា កៅឡាក់ និងរថយន្ដ ។ ចំណែកប្រជាពល រដ្ឋ៧នាក់ដែលត្រូវបានឃាត់ខ្លួនជាបណ្ដោះ អាសន្នកាលពីថ្ងៃទី២៨ ឧសភា ដោយកងទ័ព ហើយបញ្ជូនទៅកាន់អធិការដ្ឋានប៉ូលិស ស្រុកជាំក្សាន្ដនោះត្រូវបានមន្ដ្រីរដ្ឋបាលព្រៃ ឈើខេត្ដនាំខ្លួនទៅកាន់ស្នាក់ការខណ្ឌរដ្ឋ បាលព្រៃឈើខេត្ដដើម្បីកសាងសំណុំរឿង ចាត់ការតាមច្បាប់កាលពីថ្ងៃទី២៩ ឧសភា ។
ប្រជាជន៧នាក់ដែលស៊ីឈ្នួលអូសឈើ ទំលាក់ពីលើភ្នំដងរែកនោះត្រូវសមត្ថកិច្ច ឃាត់ខ្លួនពីលើភ្នំដងរែកនៅវេលាម៉ោង១២ ថ្ងៃត្រង់ ថ្ងៃទី២៨ ឧសភា ខណៈពេលពួកគេ កំពុងអូសឈើទំលាក់ពីលើភ្នំ។ អ្នកទាំងនោះ ១-ឈ្មោះ រស់ សំបូរ ភេទប្រុស អាយុ២២ឆ្នាំ រស់នៅភូមិអូររំដួល ឃុំព្រះប្រឡាយ ស្រុក ត្រញំងប្រាសាទ ខេត្ដឧត្ដរមានជ័យ, ២-ឈ្មោះមឿន សង្ហា ភេទប្រុស អាយុ២២ឆ្នាំ រស់នៅភូមិអូររំដួល ឃុំព្រះប្រឡាយ ស្រុក ត្រញំងប្រាសាទ ខេត្ដឧត្ដរមានជ័យ, ៣-ឈ្មោះម៉ៅ វុទ្ធី ភេទប្រុស អាយុ២០ឆ្នាំ រស់នៅភូមិ-ឃុំជាមួយគ្នា, ៤- ឈ្មោះធាន ដេត ភេទប្រុស អាយុ២១ឆ្នាំ រស់ នៅភូមិ-ឃុំជាមួយគ្នា, ៥-ឈ្មោះរឿន រ៉ូ ភេទប្រុស អាយុ៣៥ឆ្នាំ រស់នៅភូមិជាមួយគ្នា, ៦-ឈ្មោះសាយ ធី ភេទប្រុស អាយុ២២ឆ្នាំ រស់នៅភូមិត្រាំចាន ឃុំព្រះប្រឡាយ ស្រុក ត្រញំងប្រាសាទ ខេត្ដឧត្ដរមានជ័យ និង៧-ឈ្មោះស៊ូ សុជាតិ ភេទប្រុស អាយុ២៥ឆ្នាំ រស់នៅភូមិត្រាំចាន ឃុំព្រះប្រឡាយ ស្រុក ត្រញំងប្រាសាទ ខេត្ដឧត្ដរមានជ័យ ។
ជនជាប់ចោទទាំង៧នាក់ឆ្លើយសារភាព ថា ពួកគេសំរេចចិត្ដទៅស៊ីឈ្នួលអូសឈើ ទំលាក់ពីលើភ្នំដងរែកឱ្យឈ្មួញនោះដោយ សារតែពួកគេមានជីវភាពក្រីក្រពេក ហើយ ម្យ៉ាងទៀតនៅតំបន់ពួកគេកំពុងរស់នៅនោះពុំមានទឹកភ្លៀងធ្វើស្រែចំការ។ ពួកគេសំរេច ចិត្ដទៅស៊ីឈ្នួលអូសឈើទំលាក់ពីភ្នំដង រែកឱ្យឈ្មួញ ដោយគិតតំលៃ៣០០ដុល្លារ ក្នុង១ម៉ែត្រគូបដែលប្រើរយៈពេលមួយ សបា្ដហ៍ទើបបាន១ម៉ែត្រគូប។ ក្នុងខណៈ ពេលដែលកងទ័ពឃាត់ខ្លួនពួកគេនោះ គឺ ពួកគេទើបតែជញ្ជូនឈើគ្រញូងបាន៦ដុំចុះ ពីលើភ្នំដងរែកកណ្ដាលថ្ងៃត្រង់ ហើយពួក គេទាំងអស់គ្នាពុំទាន់ទទួលលុយពីថៅកែនៅ ឡើយទេ ។ ដោយសារតែមានឈ្មួញបង្កើតការរក ស៊ីឈើគ្រញូងខុសច្បាប់នៅតំបន់នោះហើយ ទើបជនជាតិខ្មែរ១៦នាក់ត្រូវបានសៀម ចាប់ដាក់គុកនៅក្នុងប្រទេសគេមិនទាន់រួច នៅឡើយមកទល់ពេលនេះ គឺអស់រយៈពេល ជិត១ឆ្នាំហើយ។ អំពើអាក្រក់របស់ក្រុម ឈ្មួញមិនត្រឹមតែធ្វើឱ្យប្រជាពលរដ្ឋក្រីក្រ ទៅជាប់គុកនៅប្រទេសសៀមប៉ុណ្ណោះទេ ថែមធ្វើឱ្យអាប់ឱនដល់មុខមាត់ប្រទេសជាតិ ទៀតផង ។
លោកប៉ុល ខាំណារ៉េ នាយខណ្ឌរដ្ឋបាល ព្រៃឈើខេត្ដឱ្យដឹងថា ចំពោះឈ្មួញទាំង នោះត្រូវបានស្គាល់ឈ្មោះ និងស្គាល់អាសយ ដ្ឋានអស់ហើយ ពេលនេះសមត្ថកិច្ចព្រៃឈើ កំពុងកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់។ ចំណែក ប្រជាពលរដ្ឋទាំង៧នាក់ ដោយមានការ យោគយល់ពីព្រះរាជអាជ្ញា ព្រមទាំងសមត្ថ កិច្ចចំរុះ និងមានការធានាពីអាជ្ញាធរស្រុក ត្រញំងប្រាសាទ សមត្ថកិច្ចចំរុះខេត្ដព្រះវិហារ ពុំបានឃុំខ្លួនបន្ដទៀតទេ ដោយបានធ្វើការ អប់រំ និងឱ្យធ្វើកិច្ចសន្យាផ្ដិតមេដៃឈប់ ប្រព្រឹត្ដបែបនោះបន្ដទៀត ហើយបញ្ជូនទៅ កាន់មូលដ្ឋានរបស់ពួកគេវិញ ។ ដោយ ឡែកឈើគ្រញូងចំនួន៦កំណាត់ដែលពួកគេ បានអូសទំលាក់ពីលើភ្នំត្រូវសមត្ថកិច្ចកង ទ័ពវរៈ២ប្រមូលយកទៅរក្សាទុកជាបណ្ដោះ អាសន្ននៅទីបញ្ជាការវរៈ២ក្បែរតំបន់អាន សេះ ។
ចែករំលែកព័តមាននេះ