រាជធានីភ្នំពេញ ៖ អង្គការខេមរាកាលពីព្រឹកថ្ងៃទី២៥ តុលា ២០១២ បានរៀបចំពិធីចែកអំណោយដល់កុមារក្រីក្រ កំព្រា និងងាយរងគ្រោះចំនួន៤២១នាក់ មកពីសាលាបឋមសិក្សាចំនួន៧ក្នុងសង្កាត់ចំនួន៦ ក្នុងខណ្ឌឫស្សីកែវក្រោមអធិបតីភាពលោកឃ្លាំង ហួត ជំនួយការសម្តេចអគ្គមហាសេនាបតីតេជោ ហ៊ុន សែន និងជាអភិបាលខណ្ឌឫស្សីកែវ ព្រមទាំងមានការចូលរួមពីមន្ត្រីរាជការ អាជ្ញាធរមូលដ្ឋាន អង្គការ តំណាងអង្គការនានា និងអាណាព្យាបាលសិស្សយ៉ាងច្រើនកុះករ ។
អំណោយដែលនាំទៅចែកដល់កុមារក្នុងឱកាសនោះសម្រាប់កុមារដែលកំពុងសិក្សាថ្នាក់ទី៤ រហូតដល់ថ្នាក់ទី៦ នៃសាលាបឋមសិក្សាចំនួន៧មកពីសង្កាត់ទាំង៦ ក្នុងខណ្ឌឫស្សីកែវ ទទួលបានគ្រឿងឧបភោគ បរិភោគ និងសម្ភារសិក្សាសរុបជាទឹកប្រាក់ចំនួន៦.២៧៥ដុល្លារ ។
លោកស្រីកុយ ផល្លាន្នី នាយិកាអង្គការខេមរា បានអានសុន្ទរកថាឱ្យដឹងថា ការអប់រំគឺជាប្រទីបបំភ្លឺជីវិតមនុស្សឆ្ពោះទៅរកការរីកចម្រើន សុភមង្គល សុខសន្តិភាពទាំងនៅក្នុងគ្រួសារ និងក្នុងសង្គមជាតិ ដែលនេះជាការយកចិត្តទុកដាក់ខ្ពស់របស់រាជរដ្ឋាភិបាលកម្ពុជាក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការធានាឱ្យមនុស្សគ្រប់រូបទទួលបានអត្ថប្រយោជន៍ពីការអប់រំតាមមធ្យោបាយទាំងឡាយដែលអាចមាន និងអាចធ្វើបាន ។
លោកស្រីនាយិកាបានឱ្យដឹងទៀតថា ការធ្វើពិធីឧបត្ថម្ភសម្ភារសិក្សាដល់ក្មួយៗកុមារា កុមារីនាពេលនេះ ក្នុងគោលបំណង៣សំខាន់ ១-បង្កឱកាស និងលើកទឹកចិត្តដល់ក្មួយៗកុមារ ជាពិសេសកុមារក្រីក្រ កំព្រា និងកុមារងាយរងគ្រោះទទួលបានឱកាសក្នុងការសិក្សាអប់រំ ២-រួមចំណែកគាំទ្រក្មួយៗកុមារ ដើម្បីលទ្ធភាពសិក្សានាបវេសនកាលឆ្នាំសិក្សាថ្មី ៣-ជាការអំពាវនាវដើម្បីរួមចំណែកផ្តល់ការឧបត្ថម្ភគាំទ្រចំពោះការសិក្សារបស់កុមារក្រីក្រ កំព្រា និងងាយរងគ្រោះពិសេសកុមារី ៕
ចែករំលែកព័តមាននេះ