ទីក្រុងវ៉ាស៊ីនតោន ៖ ទីផ្សារបច្ចុប្បន្នងាយស្រួលពន្យល់ទាក់ទងនឹងកត្តាសំខាន់ៗដូចជា ប្រាក់ចំណូលកំពុងកើនឡើង ការទប់ស្កាត់អតិផរណា ហើយសេដ្ឋកិច្ចសកលហាក់មានភាពទូលំទូលាយ និងពង្រីក ។ កាលពីខែតុលា មូលនិធិរូបិយវត្ថុអន្ដរជាតិបានធ្វើបច្ចុប្បន្នភាពទស្សនវិស័យសកល ដើម្បីទស្សន៍ទាយថា មានតែប្រទេសតូចៗមួយចំនួនប៉ុណ្ណោះដែលនឹងទទួលរងនូវសេដ្ឋកិច្ចធ្លាក់ចុះនៅឆ្នាំក្រោយ ខណៈធនាគារកណ្តាលធំៗកំពុងរៀបចំផែនការ ឬបានចាប់ផ្តើមរួចទៅហើយ ដើម្បីរឹតបន្តឹងគោលនយោបាយរូបិយប័ណ្ណ ហើយអត្រាការប្រាក់នឹងនៅតែមានកម្រិតទាបក្នុងពេលបច្ចុប្បន្ន ។
ទោះជាយ៉ាងណា វិបត្តិនយោបាយទំនងជាមិនផ្លាស់ប្តូរការគណនាសេដ្ឋកិច្ចរបស់វិនិយោគិនទេ ។ សូម្បីតែបន្ទាប់ពីគ្រោះមហន្តរាយដ៏ធំបំផុតនៃសតវត្សរ៍ទី២០ ទីផ្សារបានងើបមកវិញលឿនគួរសម ។ បន្ទាប់ពីការវាយប្រហាររបស់ជប៉ុនលើកំពង់ផែ Pearl Harbor ផ្សារហ៊ុនអាមេរិកបានធ្លាក់ចុះ១០% ប៉ុន្តែបានងើបឡើងវិញក្នុងរយៈពេល៦សប្តាហ៍ ។ ដូចគ្នានេះដែរ វាយប្រហាររបស់ភេរវករនៅថ្ងៃទី១១ ខែកញ្ញា ឆ្នាំ២០០១ ភាគហ៊ុនអាមេរិកបានធ្លាក់ចុះជិត១២% ប៉ុន្តែលោតឡើងវិញក្នុងរយៈពេល១ខែ។ បន្ទាប់ពីការធ្វើឃាតប្រធានាធិបតី John F. Kennedy តម្លៃភាគហ៊ុនបានធ្លាក់ចុះជាង៣% ហើយងើបឡើងវិញនៅថ្ងៃបន្ទាប់ ។ វិបត្តិនយោបាយនីមួយៗ គឺខុសគ្នា ។ លោក Jens Nystedt វិនិយោគិនទីផ្សារជើងចាស់បានថ្លែងថា អ្នកចូលរួមទីផ្សារអាចពឹងផ្អែកលើការឆ្លើយតបពីអ្នកបង្កើតគោលនយោបាយ។ ធនាគារកណ្តាល និងក្រសួងហិរញ្ញវត្ថុ នឹងប្រញាប់លុបចោលនូវអត្រាហានិភ័យកើនឡើងតាមរយៈការកែតម្រូវអត្រាការប្រាក់ ឬគោលនយោបាយសារពើពន្ធ ហើយវិនិយោគិនដាក់ទ្រព្យសកម្មត្រឡប់ទៅរកតម្លៃមុនពេលមានវិបត្តិ ។
បច្ចុប្បន្ន ជម្លោះជាមួយកូរ៉េខាងជើង លើកម្មវិធីនុយក្លេអ៊ែរ និងមីស៊ីលរបស់ប្រទេសនេះស្ថិតនៅលើបញ្ជីវិបត្តិដ៏មានសក្ដានុពល ។ ការវាយប្រហារ ឬឧបទ្ទវហេតុនុយក្លេអ៊ែរនៅក្នុងឧបទ្វីបកូរ៉េ នឹងបង្កឱ្យមានគ្រោះមហន្តរាយមនុស្សធម៌ បង្អាក់ពាណិជ្ជកម្មជាមួយកូរ៉េខាងត្បូង ដែលជាប្រទេសសេដ្ឋកិច្ចធំបំផុតទី១៣លើពិភពលោក និងបង្កវិបត្តិសេដ្ឋកិច្ចនយោបាយនៅជុំវិញពិភពលោក ។ ក៏ប៉ុន្តែគ្រោះមហន្តរាយបែបនេះ ទំនងជាមានរយៈពេលខ្លី ហើយលទ្ធផលរបស់វាច្បាស់ជាកើតឡើងភ្លាមៗ ។ ប្រទេសមហាអំណាចសំខាន់ៗ នៅលើពិភពលោកនឹងនៅតែចាប់អារម្មណ៍ ហើយលំហូរសាច់ប្រាក់លើការវិនិយោគភាគច្រើននាពេលអនាគត នឹងគ្មានការរំខាន ។ ស្របគ្នានេះ ព្រះមហាក្សត្រអារ៉ាប៊ីសាអូឌីត Mohammed bin Salman ទើបតែដករដ្ឋាភិបាល និងផ្នែកសន្តិសុខចេញដើម្បីពង្រឹងអំណាចរបស់ព្រះអង្គ ។ ទោះបីជាមានការផ្លាស់ប្តូរភ្លាមៗនៅក្នុងប្រទេសមួយនេះ ដើម្បីផ្លាស់ប្តូរតុល្យភាពនៃអំណាចនៅមជ្ឈិមបូព៌ាក្តី ក៏អារ៉ាប៊ីសាអូឌីតនៅតែចង់រក្សាការនាំចេញរបស់ខ្លួនដដែល ។
ស្រដៀងគ្នានេះ ការដួលរលំផ្នែកនយោបាយ ឬសេដ្ឋកិច្ចយ៉ាងពេញលេញនៅប្រទេសវ៉េណេស៊ុយអេឡា នឹងមានផលប៉ះពាល់ធ្ងន់ធ្ងរនៅក្នុងតំបន់ ហើយអាចបណ្តាលឱ្យមានវិបត្តិមនុស្សធម៌កាន់តែស៊ីជម្រៅនៅទីនោះ ។ ប៉ុន្តែវាទំនងជាគ្មានឥទ្ធិពលច្រើនទេលើថាមពល និងទីផ្សារហិរញ្ញវត្ថុ ។ ទោះបីនៅពេលមានវិបត្តិដូចជា ការវាយប្រហារតាមអ៊ីនធើរណេត ឬការរីករាលដាលនៃជំងឺផ្ទុះឡើងដោយនឹកស្មានមិនដល់ ការខាតបង់ទីផ្សារជាទូទៅមានរយៈពេលយូរ ដរាបណាវិនិយោគិនវាយតម្លៃឡើងវិញនូវអត្រាបញ្ចុះតម្លៃ និងការរកប្រាក់ចំណេញនាពេលអនាគត ។ ផ្ទុយទៅវិញ ការប្រែប្រួលក្នុងការសន្មតសេដ្ឋកិច្ច ដែលចែករំលែកយ៉ាងទូលំទូលាយ ទំនងជាធ្វើឱ្យមានការលក់បញ្ចុះតម្លៃកាន់តែច្រើន ហើយជំរុញឱ្យវិនិយោគិនវាយតម្លៃឡើងវិញនូវលទ្ធភាពសម្រេចបាននៃលំហូរសាច់ប្រាក់។ វិនិយោគិននឹងចាប់ផ្តើមចាប់អារម្មណ៍ពីអត្រាកំណើនកំពុងធ្លាក់ចុះ ឬធនាគារកណ្តាលខកខានការកើនឡើងនៃអតិផរណាជាថ្មីម្តងទៀត។ ការផ្លាស់ប្តូរអាចនឹងកើតឡើងភ្លាមៗទាក់ទងនឹងប្រាក់កម្ចីដ៏ច្រើន ដែលទំនងជាគ្មានការសងត្រឡប់មកវិញ ។
បច្ចុប្បន្ន សហរដ្ឋអាមេរិកកំពុងព្យាយាមឆ្លុះបញ្ចាំងនូវតួនាទីសកលថ្មីមួយសម្រាប់ខ្លួន ក្រោមការដឹកនាំរបស់លោកប្រធានាធិបតី Donald Trump ។ តាមរយៈការដកខ្លួនចេញពីកិច្ចព្រមព្រៀងអន្តរជាតិ និងការព្យាយាមចរចាកិច្ចព្រមព្រៀងពាណិជ្ជកម្មដែលមានស្រាប់ សហរដ្ឋអាមេរិកកាន់តែពិបាកក្នុងការទស្សន៍ទាយជាងមុន ។ បើនាពេលអនាគត លោក Trump និងមេដឹកនាំអាមេរិក បន្តចូលរួមជាមួយបណ្តាប្រទេសដទៃ តាមរយៈការធ្វើប្រតិបត្តិការចំណេញ-ខាត ជាជាងការបង្កើតស្ថាប័នសហការគ្នា ពិភពលោកនឹងមិនអាចប្រមូលផ្តុំឆ្លើយតបរួមគ្នានឹងភាពចលាចលក្នុងទីផ្សារសកលក្រោយទៀតបានទេ។ នៅទីបំផុត ការពឹងផ្អែកលើអាមេរិកកាន់តែតិច នឹងតម្រូវឱ្យមានអត្រាបញ្ចុះតម្លៃកាន់តែច្រើននៅគ្រប់ទីកន្លែង លើកលែងតែវដ្តសេដ្ឋកិច្ចដទៃទៀតធ្វើអន្តរាគមន៍ មុនពេលផ្លាស់ប្តូរការរំពឹងទុករបស់វិនិយោគិន ដែលនឹងជាទីបញ្ចប់នៃទីផ្សាររីកចម្រើននាពេលបច្ចុប្បន្ន ៕ ដកស្រង់ពី Project-syndicate
ចែករំលែកព័តមាននេះ