ខេត្តបន្ទាយមានជ័យ ៖ ស្ត្រីចំណាស់ម្នាក់ បានត្រូវនគរបាលព្រំដែនគោកលេខ៩១១ប៉ុស្តិ៍បឹងសាគូ សហការជាមួយនគរបាលប៉ុស្តិ៍សង្កាត់ប៉ោយប៉ែតឃាត់សួរនាំ ក្រោយពីមានសេចក្តីរាយការណ៍ពីអាជ្ញាធរភូមិថា ជាប់ពាក់ព័ន្ធនឹងករណីឆបោកប្រាក់ពីភិក្ខុសង្ឃជាច្រើនអង្គ ពីរឿងយកប្រាក់ទៅរត់ការឲ្យធ្វើជាមន្ត្រីគយប្រចាំច្រកទ្វារអន្តរជាតិប៉ោយប៉ែត។ ស្ត្រីរូបនេះឈ្មោះ នាង…
ខេត្តបន្ទាយមានជ័យ ៖ ស្ត្រីចំណាស់ម្នាក់ បានត្រូវនគរបាលព្រំដែនគោកលេខ៩១១ប៉ុស្តិ៍បឹងសាគូ សហការជាមួយនគរបាលប៉ុស្តិ៍សង្កាត់ប៉ោយប៉ែតឃាត់សួរនាំ ក្រោយពីមានសេចក្តីរាយការណ៍ពីអាជ្ញាធរភូមិថា ជាប់ពាក់ព័ន្ធនឹងករណីឆបោកប្រាក់ពីភិក្ខុសង្ឃជាច្រើនអង្គ ពីរឿងយកប្រាក់ទៅរត់ការឲ្យធ្វើជាមន្ត្រីគយប្រចាំច្រកទ្វារអន្តរជាតិប៉ោយប៉ែត។
ស្ត្រីរូបនេះឈ្មោះ នាង ធីតា អាយុ៥២ឆ្នាំ មានទីលំនៅក្នុងភូមិឫស្សីកែវ ឃុំឫស្សីកែវ ស្រុកព្រែកប្រសព្វ ខេត្តក្រចេះ ។ ករណីឃាត់សួរនាំនេះ ធ្វើឡើងនៅក្នុងបរិវេណវត្តខេមរាសីមារាម ទំនប់ក៥ ស្ថិតក្នុងភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត កាលពីយប់ថ្ងៃទី១០ ខែវិច្ឆិកា ។ ស្ត្រីឈ្មោះ នាង ធីតា រងការចោទប្រកាន់ថា បានឆបោកប្រាក់ពីមនុស្ស៣នាក់ទើបសឹក និងមានភិក្ខុសង្ឃ២អង្គផ្សេងទៀត ដោយម្នាក់ៗនិង១អង្គៗអស់ប្រាក់ខ្លះ១.០០០ដុល្លារ ខ្លះ៥០០ដុល្លារ ខ្លះ១០០ដុល្លារ លើករណីរត់ការឲ្យបានធ្វើជាមន្ត្រីគយឈរជើងនៅច្រកទ្វារអន្តរជាតិប៉ោយប៉ែត ។
ជនរងគ្រោះ៣នាក់ដែលទើបសឹកពីបួស បានប្រាប់កោះសន្តិភាពថា ស្គាល់ស្ត្រីម្នាក់នេះតាមហ្វេសប៊ុក ប៉ុន្តែមិនដែលឃើញផ្ទាល់ទេ ក្រោយមកក៏លេចចេញការឆ្លើយឆ្លងពីស្ត្រីរូបនេះតាមរយៈការឆាតហ្វេសប៊ុក ដែលអះអាងថាស្គាល់អ្នកធំនៅក្រសួង អាចរត់ការឲ្យចូលធ្វើគយបាន។ ជនរងគ្រោះបន្តថា ក្រោយពីស្តាប់ការនិយាយរបស់ស្ត្រីរូបនេះពួកខ្លួនក៏ជឿ ម្យ៉ាងព្រោះចង់ធ្វើគយផងក៏នាំគ្នាចំណាយប្រាក់ជាបន្តបន្ទាប់រហូតសុខចិត្តសឹកពីបួសថែមទៀត ព្រោះត្រៀមធ្វើគយ ។ ក្រៅពួកខ្លួន ក៏នៅមានភិក្ខុសង្ឃ២អង្គទៀត បច្ចុប្បន្នគង់នៅក្នុងខេត្តបាត់ដំបង ដែល១អង្គជាចៅអធិការវត្ត ក៏បានចំណាយប្រាក់ ដើម្បីចូលធ្វើជាមន្ត្រីគយ ក្នុងនោះម្នាក់៧០០ដុល្លារ និងម្នាក់ទៀត៥០០ផងដែរ ។
នៅប៉ុស្តិ៍នគរបាលរដ្ឋបាលសង្កាត់ប៉ោយប៉ែត នៅពេលសាកសួរផ្ទាល់ ស្ត្រីរូបនេះទទួលស្គាល់ថា គាត់បានទទួលប្រាក់ពីជនរងគ្រោះខាងលើមែន ដោយសន្យាថានឹងនាំចូលធ្វើមន្ត្រីគយ ។ គាត់អាចនាំអ្នកពាក់ព័ន្ធចូលធ្វើមន្ត្រីគយបានមែន ព្រោះមានខ្សែស្រឡាយជាអ្នកធំនៅក្រសួង ប៉ុន្តែសុំមិនបញ្ចេញឈ្មោះ ។ គាត់និយាយទាំងខឹងសម្បាផងដែរថា ថ្ងៃកំណត់បានចូលធ្វើការគឺថ្ងៃទី២០ ខែវិច្ឆិកាខាងមុខ ហេតុអីមិនទាន់ដល់ថ្ងៃផង បែរជាប្តឹងគាត់ថាជាជនឆបោកទៅវិញ ?
គាត់ទទួលស្គាល់ថា ក្រៅពីអ្នកពាក់ព័ន្ធ៣នាក់ខាងលើ គឺមានព្រះសង្ឃ២អង្គទៀតមែន ដែលគាត់ទទួលប្រាក់ ប៉ុន្តែ១អង្គករណីរត់ការឯកសារបានទៅបួសរៀននៅប្រទេសថៃ និង១អង្គយកប្រាក់រត់ការចូលធ្វើការជាមន្ត្រីគយ ។ បើតាមការឲ្យដឹងពីភិក្ខុ១អង្គជាចៅអធិការវត្តមួយនៅក្នុងស្រុកភ្នំស្រុក សុំមិនបញ្ចេញនាមបានឲ្យដឹងថា ព្រះអង្គក៏លង់ព្រះកាយអស់ប្រាក់៣លានរៀលទៅលើស្ត្រីខាងលើ ដើម្បីបានធ្វើជាមន្ត្រីគយដែរ ។
ដោយឡែក ភិក្ខុ១អង្គគង់នៅវត្តបឹងរាំង ក្នុងខេត្តបាត់ដំបង ប្រាប់តាមទូរស័ព្ទថា ព្រះអង្គក៏លង់ព្រះកាយជឿអស់ជាង៧០០ដុល្លារផងដែរ ដោយដំបូងស្ត្រីរូបនេះអះអាងថា អាចរត់ការឲ្យប្តូរសញ្ជាតិពីខ្មែរទៅថៃបាន ខណៈដឹងថាព្រះអង្គមានអាហារូបករណ៍ត្រូវចេញទៅរៀនបន្ថែមនៅប្រទេសថៃ ។ ព្រះអង្គបន្តថា ក្រោយមកស្ត្រីខាងលើបាននាំព្រះអង្គដើរកម្សាន្ត ហើយនិយាយលួងលោមថា ព្រះអង្គគួរធ្វើជាមន្ត្រីគយល្អជាងចំណាយប្រាក់
ទៅបួសរៀននៅប្រទេសថៃ ។ ព្រះអង្គបន្តថាស្ត្រីខាងលើបានសុំប្រាក់៤០០ដុល្លារបន្ថែម ក្នុងនោះបានសុំប្រាក់១៥០ដុល្លារ រត់ការធ្វើលិខិតឆ្លងដែន ដើម្បីបានចេញដំណើរទៅថៃថែមទៀត ។
ជុំវិញករណីខាងលើ លោកវរសេនីយ៍ឯក ធិនស៊ិនដេត អធិការនគរបាលក្រុងប៉ោយប៉ែតបានប្រាប់តាមទូរស័ព្ទនៅរសៀលថ្ងៃទី១២ ខែវិច្ឆិកាថា បានកសាងសំណុំរឿងបញ្ជូនស្ត្រីរូបនេះទៅស្នងការដ្ឋាននគរបាលខេត្តហើយ ដើម្បីចាត់ការបន្តតាមនីតិវិធីច្បាប់ ។មិនមានការជ្រើសរើសមន្ត្រីគយដូចស្ត្រីខាងលើនេះអះអាងនោះទេ តែបើមានការជ្រើសរើសគឺឆ្លងកាត់ការប្រឡងមិនមែនស៊ីសស៊ុសដូចក្នុងទសវត្សរ៍៩០នោះឡើយ ។ដោយសារការស្វែងយល់ពីបញ្ហាសង្គមនៅមានកម្រិត ទើបធ្វើឱ្យពលរដ្ឋយើងតែងចាញ់ល្បិចអ្នកបោកប្រាស់ ៕
ចែករំលែកព័តមាននេះ