ខេត្តព្រះសីហនុ ៖ បន្ទាប់ពីមានវិវាទគ្នានៅតំបន់កោះខ្យង ស្រុកព្រៃនប់ ពីការបោះបង្គោលចិញ្ចឹមគ្រែងឈាម ធ្វើឱ្យទំហំផ្ទៃនេសាទទឹករាក់កាន់តែរួញតូច នាំឱ្យអ្នកនេសាទលើកគ្នាតវ៉ាមិនឈប់ឈរនោះ នាព្រឹកថ្ងៃទី១០ ខែវិច្ឆិកា ក្រុមការងារចម្រុះដឹកនាំដោយលោក សរ កក្កដា អភិបាលស្រុកព្រៃនប់ បានចុះត្រួតពិនិត្យនិងវាស់វែងទីតាំងចិញ្ចឹមគ្រែងឈាមចំនួន៣កន្លែង ស្ថិតនៅភូមិកោះខ្យង ឃុំអូរជ្រៅ ស្រុកព្រៃនប់ ។
លោកអភិបាលស្រុកបានថ្លែងថា ក្រោយពេលចុះពិនិត្យទីតាំងចឹញ្ចឹមគ្រែងឈាមទាំង៣កន្លែង ជាលទ្ធផលគឺបានចុះវាស់វែងទីតាំងតាមការចង្អុលបង្ហាញរបស់ម្ចាស់ដែលមាន
ឈ្មោះ ផេង នី ឈ្មោះ លីវ លីម និងឈ្មោះ ស៊ូ ចាន់ផន ។ ទីតាំងទាំង៣ខាងលើ ម្ចាស់បានស្នើសុំអនុញ្ញាតច្បាប់រួចហើយ ប៉ុន្តែបើតាមការពិនិត្យជាក់ស្តែងឃើញថា ទំហំដែលស្នើសុំ និងការបោះបង្គោលហ៊ុមព័ទ្ធមានការខុសគ្នា៖
១-ឈ្មោះ ផេង នី ស្នើសុំ១០ហិកតា ជាក់ស្តែងបោះបង្គោលហ៊ុមព័ទ្ធប្រមាណ២០ហិកតា
និងមានសង់រោងចំនួន៣នៅលើទីតាំង ។
២-ឈ្មោះ លីវ លីម ស្នើសុំ៥ហិកតា ជាក់ស្តែងបោះបង្គោលហ៊ុមព័ទ្ធប្រមាណ៦ហិកតា និងមានសង់រោងចំនួន១នៅលើទីតាំង ។
៣-ឈ្មោះ ស៊ូ ចាន់ផន ស្នើសុំ៥ហិកតា ជាក់ស្តែងបោះបង្គោលហ៊ុមព័ទ្ធប្រមាណ១០ហិកតា និងមានសង់រោងចំនួន១នៅលើទីតាំង ។
លោក សរ កក្កដា បានបញ្ជាក់់ថា ចំពោះទីតាំងចឹញ្ចឹមគ្រែងទាំង៣កន្លែងនេះ លោកនឹងចាត់ការទៅតាមនីតិវិធីច្បាប់ដែលបានកំណត់ប្រកបដោយតម្លាភាព ចៀសវាងការឆ្លើយដាក់គ្នា ដោយអាចតម្រូវឲ្យម្ចាស់ទីតាំងទាំងអស់អនុវត្តទៅតាមទំហំនៃការស្នើសុំ ។
ជុំវិញបញ្ហានេះដែរ លោក ឯម ភា នាយសង្កាត់រដ្ឋបាលជលផលព្រៃនប់ បានឲ្យដឹងថាចំពោះទីតាំងទាំង៣ខាងលើសុទ្ធតែបានសុំច្បាប់ទៅមន្ត្រីជំនាញរៀងៗខ្លួន ប៉ុន្តែនៅមានចន្លោះប្រហោងបន្តិចបន្តួចចំពោះម្ចាស់ទីតាំងដូចជា ឈ្មោះ ស៊ូ ចាន់ផន មានតែច្បាប់អនុញ្ញាតដែលចេញដោយជលផល ពុំទាន់មានច្បាប់ចេញដោយក្រសួងបរិស្ថានដូចលោក លាវ លឹម ទេ ។
មិនតែប៉ុណ្ណោះ ម្ចាស់ទីតាំងខាងលើពុំបានគោរពទៅតាមអ្វីដែលបានស្នើសុំឡើយ គឺហ៊ុមព័ទ្ធយកលើស៥ហិកតានិង ឈ្មោះ ផេង នី លើស១០ហិកតា ដែលចំនួននេះនឹងត្រូវអនុវត្តតាមផ្លូវច្បាប់ ។
ប្រភពដដែលបានបន្ថែមថា ចំពោះច្បាប់ចឹញ្ចឹមកូនគ្រែងឈាមនេះ អាជីវករទាំងអស់ត្រូវសុំច្បាប់មួយឆ្នាំម្តង ។ ដូចនេះយោងតាមច្បាប់ថ្មី អាជីវករដែលពុំទាន់មានច្បាប់អនុញ្ញាតត្រូវសុំច្បាប់បន្ថែមពីក្រសួងបរិស្ថាន ព្រោះក្រសួងបរិស្ថានជាស្ថាប័នអនុញ្ញាតទីតាំង ឯក្រសួងកសិកម្មជាអ្នកអនុញ្ញាតច្បាប់បច្ចេកទេស ។
បញ្ហាចម្រូងចម្រាសនៅតំបន់កោះខ្យងនេះពិតជាមានភាពស្មុគស្មាញពេកណាស់ ដែលលោកអភិបាលស្រុកចាស់ដោះមិនចេញ ។ ចាំមើលមើល៍ អាជ្ញាធរស្រុកដែលមានលោក សរ កក្កដាទើបចូលកាន់តំណែងថ្មីជិតមួយឆ្នាំនឹងចាត់វិធានការបែបណាចំពោះសកម្មភាពកន្ទេលធំបន្លំដេកនេះ ។ ចាំមើលទៀត បន្លំដេកបានយូរប៉ុណ្ណាទៀតទៅ ?
ចែករំលែកព័តមាននេះ