បន្ទាយមានជ័យ ៖ តុលាការចេញដិការឃាត់ខ្លួនអគ្គនាយកក្រុមហ៊ុន អូស្ត្រាលី-កម្ពុជាហ្គ្រុប(ACG) ពីបទឆបោកលុយរឿងដីធ្លី១០ម៉ឺនដុល្លារដែលត្រូវបានចាប់ខ្លួន ខណៈហៅសាកសួរកាលពីថ្ងៃទី០៨ ខែវិច្ឆិកា ឆ្នាំ២០១៧ នៅសាលាដំបូងខេត្តបន្ទាយមានជ័យ ។
ជនដែលត្រូវចាប់ខ្លួនតាមដិការមានឈ្មោះ កៅ សុធា ភេទប្រុស អាយុ៤៦ឆ្នាំ ជាអគ្គនាយកក្រុមហ៊ុនអូស្ត្រាលី-កម្ពុជាហ្គ្រុប(ACG) មានស្រុកកំណើតសង្កាត់លេខ៣ ក្រុងភ្នំពេញ ដែលរស់នៅភូមិតាង៉ូវ សង្កាត់និរោធ ខណ្ឌច្បារអំពៅ រាជធានីភ្នំពេញ ។ ការចាប់ខ្លួនឈ្មោះ កៅ សុធា ជាអគ្គនាយកក្រុមហ៊ុនអូស្ត្រាលី-កម្ពុជាហ្គ្រុប(ACG)នេះ គឺអនុវត្តន៍តាមដិការបង្គាប់របស់លោក ថេង កុសល ចៅក្រមសាលាដំបូងខេត្តបន្ទាយមានជ័យដែលជាប់ចោទពីបទឆបោកលុយរឿងដីធ្លីដែលប្រព្រឹត្តកាលពីអំឡុងឆ្នាំ២០០៧នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
តាមសេចក្តីសម្រេចរបស់សាលក្រមបានផ្តន្ទាទោសឈ្មោះ កៅ សុធា ជាអគ្គនាយកក្រុមហ៊ុនអូស្ត្រាលី-កម្ពុជាហ្គ្រុប(ACG)ដាក់ពន្ធនាគារកំណត់២ឆ្នាំ ដោយមិនឱ្យមានការព្យួរទោសនិងបង្គាប់សងការខូចខាត និងសំណងជម្ងឺចិត្តចំនួន៧០.០០០ដុល្លារអាមេរិកឱ្យទៅឈ្មោះ ផូ គឹមសួន និងបង្គាប់ចាប់ខ្លួនលើឈ្មោះនេះយកមកអនុវត្តទោសក្នុងពន្ធនាគារតាមច្បាប់ ៕
ចែករំលែកព័តមាននេះ