ខេត្តកំពង់ធំ ៖ បច្ចុប្បន្នបទល្មើសព្រៃឈើកាប់ និងការដឹកជញ្ជូនចេញពីទឹកដីស្រុកសណ្តាន់យ៉ាងអនាធិបតេយ្យ សមត្ថកិច្ចជំនាញលែងបង្ក្រាប បែរជាទុកឲ្យផ្នែកផ្សេងៗបង្ក្រាបម្តងវិញ ដេកចាំតែស្តាប់ទូរស័ទ្ទកត់ក្បាលឡាន គោយន្ត និងរថយន្តបុកស័រយកលុយស្រួសខ្លួនជាង។ ជាក់ស្តែងរថយន្តបុកស័រដឹកឈើរបស់មេឈ្មួញរកស៊ីឈើឡើងដុះស្លែដឹកចេញពីស្រុកសណ្តាន់សមត្ថកិច្ចជំនាញព្រៃឈើមិនបង្ក្រាបទុកចិញ្ចឹមឆ្នាំង តែត្រូវបានកម្លាំងនគរបាលស្ទាក់ចាប់បាន។
លោកវរៈសេនីយ៍ទោ អ៊ួង ម៉ូលី អធិការនគរបាលស្រុកសណ្តាន់បានឲ្យ កោះសន្តិភាព ដឹងនៅរសៀលថ្ងៃទី១២ ខែវិច្ឆិកា ឆ្នាំ២០១៧ នេះថា រថយន្តដឹកឈើក្តារបន្ទះខាងលើនេះ ជាប្រភេទរថយន្តបុកស័រកែច្នៃមួយគ្រឿងបានធ្វើសកម្មភាពដឹកឈើអត់ច្បាប់ចេញមកពីចំណុចភូមិរ៉ងខ្នាយ ឃុំទំរីង ស្រុកសណ្តាន់ជារបស់មេឈ្មួញរកស៊ីឈើម្នាក់ឈ្មោះ ចែ ហ៊ង រស់នៅភូមិទំអរ ឃុំទំរីង ស្រុកសណ្តាន់ ត្រូវបានកម្លាំងរបស់លោកសហការណ៍គ្នាបង្ក្រាបបានកាលពីវេលាម៉ោង០៩ ណិង៥០នាទីយប់ ថ្ងៃទី១១ ខែវិច្ឆិកា ឆ្នាំ២០១៧ នៅចំណុចមុខប៉ុស្តិ៍រដ្ឋបាលទំរីង ស្ថិតក្នុងភូមិខោស ឃុំទំរីងស្រុកសណ្តាន់ ហើយបានប្រគល់ទៅឲ្យផ្នែរដ្ឋបាលព្រៃឈើសណ្តាន់កាលពីព្រឹកថ្ងៃទី១២ ខែវិច្ឆិកានេះ ដែលមានឈើក្តារចំនួន៥៥០សន្លឹក ស្មើនឹង៨,៨ម៉ែត្រគូប យកទៅចាត់ការតាមផ្លូវច្បាប់។ ប្រជាពលរដ្ឋនាំគ្នានិយាយរិះគន់ដល់សមត្ថកិច្ចរដ្ឋបាលព្រៃឈើស្រុកសណ្តាន់ថា មេឈ្មួញរកស៊ីឈើ ឈ្មោះ ចែ ហ៊ង នេះ រកស៊ីឈើឡើងដុះស្លែជាយូរយារណាស់មកហើយ ដឹកឈើចេញពីក្នុងភូមិសាស្ត្រស្រុកសណ្តាន់ ដែលគ្រប់គ្រងដោយលោក សៅ វណ្ណី នាយផ្នែករដ្ឋបាលព្រៃឈើសណ្តាន់នេះ គឺមិនដែលធ្វើការបង្ក្រាបរថយន្តដឹកឈើរបស់ ចែ ហ៊ង នេះបានម្តងនោះទេ គឺដេកចាំយកតែលុយ។
ពួកគាត់បានសំណូមពរដល់លោក វេង សុខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទសូមមេត្តាមើលកូនចៅរបស់លោកផង ថាហេតុអ្វីបានជាបទល្មើសព្រៃឈើនៅក្នុងទឹកដីស្រុងសណ្តាន់បង្ក្រាបមិនចេះអស់ គឺដោយសារតែមន្ត្រីផ្លែល្វាថ្នាក់ក្រោមរបស់លោកស៊ីប្រាក់ខែរបស់រដ្ឋដែលបានមកពីញើសឈាមរបស់រាស្ត្រ តែបែរជាមិនបង្ក្រាបហើយដេកចាំយកតែលុយ និងមើលផ្លូវឲ្យឈ្មួញរកស៊ីបទល្មើសព្រៃឈើទៅវិញ។ ពាក់ព័ន្ធនឹងបទល្មើសខាងលើនេះ លោក សៅ វណ្ណី នាយផ្នែករដ្ឋបាលព្រៃឈើសណ្តាន់ និងលោក ប៊ុន សុធី នាយរងខណ្ឌរដ្ឋបាលព្រៃឈើខេត្តកំពង់ធំស្តីទី កោះសន្តិភាព ពុំអាចសុំការបំភ្លឺបានទេនៅរសៀលថ្ងៃទី១២ ខែវិច្ឆិកា ឆ្នាំ២០១៧នេះ ដោយសារតែទូរស័ព្ទរបស់លោកខលចូលតែមិនមានអ្នកទទួល។ លោក ធីវ វណ្ណធី ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ បានប្រាប់កោះសន្តិភាព ឲ្យដឹងនៅរសៀល ថ្ងៃដដែលនេះថា ចំពោះបញ្ហាបទល្មើសព្រៃឈើខាងលើលោកនឹងចាត់ឲ្យមន្ត្រីរដ្ឋបាលព្រៃឈើចុះទៅសហការណ៍គ្នាបង្ក្រាប និងទប់ស្កាត់បទល្មើសនៅក្នុងស្រុងសណ្តាន់ ស្រុកសន្ទុក និងស្រុកមួយចំនួនទៀតដែលមានបទល្មើសកើតឡើង៕
ចែករំលែកព័តមាននេះ