ប្រទេសកូរ៉េខាងជើង ៖ កាសែតរុស្ស៊ី NEZAVISSIMAIA GAZETA បានចេញផ្សាយនាពេលថ្មីៗនូវអត្ថបទមួយដែលសរសេរថា មន្ទីរប៉ង់តាហ្គោនយល់ថា ការតាមរក និងការកម្ទេចរាល់ទីតាំងនុយក្លេអ៊ែររបស់កូរ៉េខាងជើងនឹងអាចទៅរួចទាល់តែបញ្ជូនកងទ័ពជើងគោកអាមេរិកចូលប្រទេសនេះ ។ តាមសេចក្តីរាយការណ៍របស់កាសែតវ៉ាស៊ីនតោនប៉ុស្តិ៍ ។ ការសន្និដ្ឋាននេះមានក្នុងរបាយការណ៍មួយដែលប្រគល់ដល់សភាអាមេរិក ដោយនាយសេនាធិការរងកងទ័ពអាមេរិក ឧត្តមនាវី MICHAEL DUMONT ដែលរួមបញ្ចូលទាំងបណ្តាផលវិបាកនៃសកម្មភាពយោធារវាងអាមេរិក និងកូរ៉េខាងជើងផង ។
ព្រឹទ្ធសមាជិក លោក RUBEN GALLEGO និងលោក TED LIEU បានស្នើដល់មន្ទីរប៉ង់តាហ្គោនឱ្យធ្វើការវាយតម្លៃពីការបាត់បង់ខាងយោធា និងស៊ីវិលរបស់សហរដ្ឋអាមេរិក និងរបស់បណ្តាសម្ព័ន្ធ មិត្តក្នុងករណីមានសង្គ្រាមប្រឆាំងក្រុងព្យុងយ៉ាង ព្រមទាំងព័ត៌មានទាំងឡាយពីសេណារីយ៉ូនៃការវិវត្តន៍ជាយថាហេតុនៃជម្លោះ ។
យោងតាមកាសែតនេះថា មន្ទីរប៉ង់តាហ្គោននៅតែរារែកផងដែរចំពោះប្រតិកម្មជាយថាហេតុរបស់រុស្ស៊ី និងរបស់ចិន ។ បើតាមបណ្តានាយទាហានអាមេរិកថា រុស្ស៊ី ឬចិនអាចសម្រេចចៀសវាងជម្លោះ ឬអាចនៅខាងយើង ។ ដូចការបញ្ជាក់របស់របាយការណ៍នេះ មន្ទីរប៉ង់តាហ្គោនគាំទ្រនយោបាយប្រកាន់យកដោយរដ្ឋមន្ត្រីការបរទេសអាមេរិក លោក REX TELLERSON ដែលសំដៅធ្វើការគាបសង្កត់លើអាជ្ញាធរកូរ៉េខាងជើង តាមរយៈការដាក់ទណ្ឌកម្មខាងសេដ្ឋកិច្ច និងការទូត ។
ការវាយប្រហារតាមអាកាសប្រឆាំងបណ្តាទីតាំងនុយក្លេអ៊ែរកូរ៉េខាងជើងហាក់ពុំច្បាស់ខ្លាំង ព្រោះក្រុងព្យុងយ៉ាងរក្សាបានយ៉ាងល្អការលាក់បាំងទីតាំងនុយក្លេអ៊ែររបស់ខ្លួន ហើយអាចតបតវិញដោយបាញ់ចេញបណ្តាអាវុធសម្លាប់រង្គាលដូចជាអាវុធគីមី និងជីវសាស្ត្រជាដើម ។
ការវាយប្រហារតាមជើងគោកមួយពិតជាការប្រថុយប្រថានខ្លាំងជាមួយកូរ៉េខាងជើង ដែលមានទាហានពី៨៥០.០០០នាក់ទៅ១,៣លាននាក់ ដែលមិនទាន់គិតពីមនុស្សបំរុងជិត៤លាននាក់ថែមទៀតផងទេ ។
អត្ថបទនេះធ្វើការសន្និដ្ឋានថា ទោះបីជាប្រធានាធិបតីអាមេរិកនិយាយថា កងទាហានអាមេរិកខ្លាំងជាងគេបំផុតលើពិភពលោក ពេលលោកថ្លែងនៅឯមូលដ្ឋានអាកាសចរណ៍ YOKOTA ប្រទេសជប៉ុនក្តី ក៏គ្មាននរណាម្នាក់ហ៊ានប្រថុយបញ្ជូនកងទាហានទៅកាន់កូរ៉េខាងជើង ទោះបីជាកងទាហានអាមេរិកដែលទទួលការហ្វឹកហ្វឺនខ្ពស់បំផុតក្តី ។ សម្រាប់ពេលនេះលោកគីម ជុងអ៊ុន អាចដេកលក់យ៉ាងស្រួល ៕
ចែករំលែកព័តមាននេះ