សារព័ត៌មានបរទេសកាលពីពេលថ្មីៗកន្លងមកផ្សាយថា នៅរដ្ឋវិជីនៀ សហរដ្ឋអាមេរិក ក្មេងប្រុសអាយុ១២ឆ្នាំម្នាក់ បានលោតធ្វើអត្តឃាតពីលើស្ពានឆ្លងផ្លូវធ្លាក់ទៅប៉ះរថយន្ត «Ford Escape» របស់នាង Marisa Harris អាយុ២២ឆ្នាំ បណ្តាលឱ្យនាងស្លាប់បាត់បង់ជីវិត ឯក្មេងប្រុសនោះរបួសធ្ងន់ និងកំពុងសម្រាកព្យាបាលនៅមន្ទីរពេទ្យ ។
ប៉ូលិសបញ្ជាក់ថា រឿងនោះកើតឡើងនៅវេលាម៉ោង៤រសៀល ថ្ងៃទី២៨ តុលា ២០១៧ ខណៈពេលបុរសជាគូរស្នេហ៍របស់នាង Harris អង្គុយនៅកន្លែងអ្នកដំណើរខាងមុខ អាចទប់ចង្កូតរថយន្ត និងឈប់បានដោយសុវត្ថិភាព ។
នាង Harris បានស្លាប់នៅកន្លែងកើតហេតុខណៈពេលគូស្នេហ៍មិនមានរបួស ។ ស្របពេលជាមួយគ្នានេះ ក្មេងប្រុសដែលលោតធ្វើអត្តឃាតពីលើស្ពានត្រូវនាំទៅមន្ទីពេទ្យ «Inova Fairfax » និងកំពុងព្យាបាលរបួសអាចឈានដល់ការស្លាប់បាត់បង់ជីវិតបាន ។
ប៉ូលិសកំពុងស៊ើបអង្កេតហេតុការណ៍ដែលកើតឡើង ប៉ុន្តែគ្មានការបង្ហើបឱ្យដឹងពីមូលហេតុថា ហេតុអ្វីបានជាក្មេងប្រុសអាយុ១២ឆ្នាំរូបនោះគិតខ្លីទេ ។
ម្តាយរបស់នាង Harris បញ្ជាក់ថា កូនស្រីរបស់ខ្លួនទើបរៀនចប់ផ្នែកពេទ្យពីមហាវិទ្យាល័យ « មែរីម៉ោន » (Marymount) ៕
ចែករំលែកព័តមាននេះ