រាជធានីភ្នំពេញ ៖ នៅក្នុងពិភពកីឡាកាយវប្បកម្មគេកត់សម្គាល់កីឡាករល្បីឈ្មោះ៣រូប បើទោះជាមានវ័យជ្រេបន្តិចទៅហើយក្ដី ក៏ពួកគាត់នៅតែយកចិត្តទុកដាក់ហ្វឹកហាត់លើកសម្រស់សាច់ដុំរបស់ខ្លួនមិនដែលធ្វេសប្រហែសនោះដែរ ។ អ្នកទាំងបីបានអះអាងថា សុខចិត្តមិនខ្វល់ពីការងារផ្សេងឱ្យតែបានហ្វឹកហាត់ធ្វើឱ្យសាច់ដុំឡើងធំ ថែមទាំងជំទាស់នឹងការយល់ឃើញរបស់មនុស្សមួយចំនួនដែលថា ការពង្រីកសាច់ដុំឱ្យធំជារឿងអាក្រក់មើល និងបាត់បង់ភាពសង្ហារនោះផង ។ កីឡាករ៣រូបដែលស្រឡាញ់សាច់ដុំខ្លាំងជាងអ្វីៗទាំងអស់នោះគឺ៖
– សុខ សុភ័ក្ត្រ ៖ គឺជាកីឡាករកាយវប្បកម្មម្នាក់ដែលមានកេរ្តិ៍ឈ្មោះបោះសំឡេងមិនធម្មតាដោយសារតែលោកមានឱកាសបានចេញទៅប្រកួតនៅក្រៅប្រទេសក្នុងព្រឹត្តិការណ៍ដណ្ដើមជើងឯកបុរសដែលមានសាច់ដុំល្អញឹកញាប់ហើយក៏ទទួលបានពានច្រើនដែរ ។ លោកជាកីឡាករម្នាក់ដែលយកចិត្តទុកដាក់នឹងការហ្វឹកហាត់ដំឡើងសាច់ដុំជារៀងរាល់ថ្ងៃ ទោះបីសាច់ដុំរបស់លោកត្រូវគេកត់សម្គាល់ថា មានទំហំធំទៅហើយក្ដី។ លោកនិយាយថា ខ្លួនសុខចិត្តអត់បាយ និងអត់មានលុយដើរលេង តែមិនសុខចិត្តអត់លុយទៅហ្វឹកហាត់ដំឡើងសាច់ដុំ និងទិញថ្នាំបំប៉នសាច់ដុំនោះទេ ដោយសារតែលោកយល់ថា សាច់ដុំដែលលោកចង់បានគឺមិនទាន់គ្រប់គ្រាន់ និងនៅតែចង់ឱ្យមានសាច់ដុំស្អាតជាងនេះទៅទៀត ។
លោកថា អ្នកខ្លះថាលោកនឹងបាត់រូបរាងទាក់ទាញ បើបន្តហ្វឹកហាត់ធ្វើឱ្យសាច់ដុំឡើងធំជាងនេះ តែលោកអត់ខ្វល់នោះទេ ក្នុងពេលមហិច្ឆតារបស់លោកចង់បានសាច់ដុំណែន និងធំជាងនេះបន្ថែមទៀត ដោយលោកយល់ថា សាច់ដុំកាន់តែធំ គឺកាន់តែធ្វើឱ្យលោកលេចធ្លោ ។ សម្រាប់បុរសភាគច្រើនដែលគ្រាន់តែចង់បានរូបរាងសង្ហារ លោកថាបញ្ហាសាច់ដុំគឺមិនចង់បានធំនោះទេ ប៉ុន្តែសម្រាប់លោកបើទោះមិនមានគម្រោងចេញប្រកួតក៏នៅតែចង់បានសាច់ដុំធំ ស្ងួត និងណែនល្អជាងនេះ ។ លោកបានចំណាយពេលមិនតិចជាង១០ឆ្នាំនោះទេ ទម្រាំទទួលបានលទ្ធផលមានសាច់ដុំ និងរាងកាយដូចដែលបានឃើញ ។
អ៊ីចឹងហើយទើបលោកប្រឆាំងដាច់ខាតចំពោះបុគ្គលដែលបានហាមប្រាមមិនឱ្យលោកបន្តហាត់យកសាច់ដុំបន្ថែម ដោយសូម្បីតែក្រុមគ្រួសារ និងភរិយារបស់លោកផ្ទាល់ ក៏មិនហ៊ានដាក់បម្រាមមួយនេះចំពោះលោកនោះដែរ ដោយសារតែលោកស្រឡាញ់សាច់ដុំជាងអ្វីទាំងអស់នៅក្នុងជីវិត ។ លោកអះអាងថាត្រឹមតែហាត់យកសាច់ដុំស្មា ក្រោយឆ្អឹងស្មា និងដើមទ្រូងជាដើមគឺមិនគ្រប់គ្រាន់ទេ ប្រសិនបើហាត់បានសាច់ដុំទាំងនោះហើយមិនបន្តបង្វឹកខ្លួនរក្សាសាច់ដុំនោះឱ្យកាន់តែធំកាន់តែណែន ដើម្បីឱ្យពេញលក្ខណៈជាកីឡាករផ្នែកកាយវប្បកម្ម ។
លោកបានចំណាយពេលក្នុងវិស័យមួយនេះដោយការអត់ធ្មត់បំផុតតាំងពីឆ្នាំ២០០៥ ដោយលោកសុខចិត្តទម្លាក់ចោលការងារ ព្រោះតែស្រឡាញ់សាច់ដុំ ហើយខំហាត់ប្រាណយ៉ាងយកចិត្តទុកដាក់ដោយការតាំងចិត្តរហូតបានក្លាយជាកីឡាករអាជីព បន្ទាប់ពីលោកប្រឹងហាត់យកសាច់ដុំបានស្អាត ហើយក៏ត្រូវបានសហព័ន្ធកីឡាកាយវប្បកម្មជ្រើសរើសជាសមាជិក ។ លោកបានរំលឹកថា កាលពីដំបូងលោកគ្រាន់តែជាយុវវ័យមួយរូបដែលចង់បានរាងស្អាតពីការហាត់ប្រាណតែប៉ុណ្ណោះ ប៉ុន្តែនៅក្រោយៗមកលោកក៏បែរជាស្រឡាញ់សាច់ដុំទៅវិញ ដោយខំហ្វឹកហាត់រហូតទទួលបានសាច់ដុំប៉ោងធំ ហើយបានចេញទៅប្រកួតនៅក្រៅប្រទេស ។ លោកប្រកាសក្ដែងៗថា អត់អីអត់ចុះឱ្យតែបានសាច់ដុំប៉ោងធំ ដោយលោកថែមទាំងជំរុញយុវវ័យក្មេងៗឱ្យបង្កើនការហ្វឹកហាត់ដូចលោកដើម្បីឱ្យបានសាច់ដុំធំស្អាតពេញលក្ខណៈជាបុរសនោះផង ។ លោក សុខ សុភ័ក្ត្រ បញ្ជាក់ថា នៅក្នុងប្រទេសកម្ពុជាសម្រាប់អ្នកហាត់យកសាច់ដុំដោយមិនខ្វល់ពីរឿងប្រែប្រួលរូបរាងសង្ហារច្រើនឡើង ប៉ុន្តែសម្រាប់នារីវិញនៅមិនទាន់មាននោះទេ ទើបលោកយល់ថាវិស័យមួយនេះនៅក្នុងប្រទេសកម្ពុជានៅមិនទាន់រីកចម្រើនពេញលេញដូចគ្នានឹងប្រទេសជិតខាង ដែលគ្មានការរើសអើង ។ លោកថា មនុស្សភាគច្រើននៅតែយល់ថា អ្នកមានសាច់ដុំដូចលោក គឺមើលទៅដូចកង្កែប ទើបអ្នកខ្លះនៅតែមិនសូវឱ្យតម្លៃលើបញ្ហានេះដូចលោក ។
– រស់ សោភ័ណ្ឌ ៖ លោកជាគ្រូបង្វឹកផ្នែកសាច់ដុំនៅតាមក្លិបធំៗ និងត្រូវបានគេកត់សម្គាល់ថាជាកីឡាករមួយរូបដែលស្រឡាញ់សាច់ដុំមិនចាញ់ស្រឡាញ់ជីវិតខ្លួននោះផង ដោយសារតែលោកបញ្ជាក់ថា សាច់ដុំគឺជាឆ្នាំងបាយរបស់លោក ព្រោះតែលោកមានសាច់ដុំធំៗនោះហើយ ទើបមានគេជួលឱ្យបង្ហាត់តាមក្លិបជាប្រចាំ និងមានប្រាក់ចំណូលរាល់ថ្ងៃ ។
លោកថា ខ្លួនស្រឡាញ់សាច់ដុំតាំងពីក្មេង ហើយដោយសារតែហ្វឹកហាត់ទៅស្រាប់តែមានគេទាក់ទងឱ្យទៅបង្ហាត់ពីរបៀបហាត់សាច់ដុំឱ្យស្អាត ទើបលោកកាន់តែស្រឡាញ់សាច់ដុំហើយប្រឹងប្រែងហ្វឹកហាត់មិនដែលប្រហែសខ្លួន ។ ជាក់ស្ដែង បើទោះជាលោកចាប់ផ្ដើមមានទីផ្សារក្នុងការថតកុន ក្រោយពីបានសម្ដែងជាតួអង្គស្ដេចកន ក្នុងរឿង«ហ្លួងព្រះស្ដេចកន» ទៅហើយក្ដី ក៏លោកនៅតែយល់ថា ត្រូវតែហាត់យកសាច់ដុំឱ្យធំបន្ថែមទៀត ដោយមិនខ្វល់រឿងសាច់ដុំឡើងធំនឹងធ្វើឱ្យលោកបាត់បង់រាងសង្ហារនោះទេ ។ លោកថា រាល់ថ្ងៃអត់ខ្វល់រឿងអត់ការងារសម្ដែងនោះទេ ប៉ុន្តែអ្វីដែលលោកត្រូវគិតគឺអត់មានការងារជាគ្រូបង្វឹកលើកសាច់ដុំ ដែលជាឆ្នាំងបាយរាល់ថ្ងៃ ។
អ៊ីចឹងហើយទើបលោកស្រវាស្រទេញនឹងការហ្វឹកហាត់បែបនេះច្រើនជាងការងារផ្សេង ដោយសារតែពេលលោកបានបង្ហាត់សិស្ស ក៏បានហ្វឹកហាត់ខ្លួនឯងជាមួយឧបករណ៍ទំនើបៗក្នុងក្លិប ដើម្បីដំឡើងសាច់ដុំឱ្យធំស្អាតនោះដែរ ។ លោក រស់ សោភ័ណ្ឌ
និយាយថា រាល់ថ្ងៃលោកមមាញឹកនឹងការបង្ហាត់កូនសិស្សលើកសាច់ដុំ និងរវល់លើកសាច់ដុំថែរក្សារូបរាងរបស់ខ្លួនច្រើនជាង ដោយក្នុងមួយថ្ងៃៗលោកត្រូវបែងចែកពេលវេលាហ្វឹកហាត់ខ្លួនឯងផង និងរត់ទៅបង្ហាត់កូនសិស្ស៤-៥កន្លែងបណ្ដាក់គ្នាផង ។ ក្នុងមួយថ្ងៃលោកត្រូវដាក់ម៉ោងបង្ហាត់អ្នកនេះបង្ហាត់អ្នកនោះ និងបង្ហាត់នៅក្នុងក្លិបនេះក្លិបនោះមិនសូវទំនេរនោះទេ ទើបលោកទទួលបានប្រាក់ខែជាប្រចាំច្រើនគួរសម ដែលធ្វើឱ្យលោកមិនសូវខ្វល់រឿងមានគេហៅសម្ដែង ឬមិនហៅ ។
លោកនៅតែអះអាងថា ការសម្ដែងគ្រាន់តែជាចំណូលចិត្តមួយដែលលោកចង់ប្រឡូកឱ្យតែមានបទពិសោធន៍ប៉ុណ្ណោះ ប៉ុន្តែសម្រាប់ការហាត់ប្រាណគឺជាអ្វីដែលលោកចូលចិត្តផុតលេខ ហើយមិនអាចបោះបង់បាន លើកលែងតែលោកជរាជាងនេះ ហើយបន្តអាជីពមួយនេះលែងបាន ។
– សំបូរ ណាន ៖ កីឡាកររូបនេះរឹតតែយកចិត្តទុកដាក់នឹងការដំឡើងសាច់ដុំដងខ្លួន ព្រោះលោកគឺជាសមាសភាពរបស់កម្ពុជាដែលត្រូវចេញទៅប្រកួតនៅក្រៅប្រទេសជាប្រចាំមិនដែលខាន ដោយសារតែប្រភេទទម្ងន់លោកត្រូវស្ដង់ដារអន្តរជាតិ ហើយមានសាច់ដុំធំប៉ោង ណែន និងស្ងួតល្អ ។ លោកថា រាល់ថ្ងៃបើមិនឱ្យលោកបានហូបមួយពេលក៏មិនអីដែរ តែបើឱ្យលោកខានហាត់ គឺអត់តែម្ដង ។ លោកបានទាំងប្រកាសថា សុខចិត្តបាត់បង់ឱកាសការងារផ្សេង សំខាន់កុំឱ្យតែលោកលាឈប់ពីការងារកាយវប្បកម្ម គឺគ្រប់គ្រាន់ហើយ ។
លោកសំបូរ ណាន បន្តថា រាល់ថ្ងៃស្រឡាញ់ការហាត់ប្រាណខ្លាំងណាស់ ហើយការស្រឡាញ់របស់លោកគឺមិនមែនដើម្បីឱ្យបានរាងស្អាតសង្ហារនោះទេ ប៉ុន្តែគឺចង់បានសាច់ដុំធំៗ បើទោះជាត្រូវគេចោទថាមានរាងដូចកង្កែបមិនសូវទាក់ទាញនោះក៏ដោយ។ លោកថា អត់ខ្វល់រឿងអ្នកណាថាហាត់ដូចលោកមានរាងមិនស្អាត ប៉ុន្តែអ្វីដែលលោកចង់បានគឺរាងកាយមានសាច់ដុំធំៗតាំងពីដើមដៃរហូតដល់ទ្រូង ។ លោកថា សម្រាប់រូបលោកគឺមានក្ដីសុខបំផុតបើអាចហ្វឹកហាត់ហើយធ្វើឱ្យរាងកាយមានសាច់ដុំធំ អ៊ីចឹងហើយបទើបលោកសម្រេចចិត្តបើកជាក្លិបហាត់ប្រាណនៅស្រុកនោះផង ក្រោយពីឈប់ធ្វើការនៅថៃ ដោយសារតែលោកចង់មានឧបករណ៍ហ្វឹកហាត់គ្រប់គ្រាន់ កុំឱ្យពិបាកធ្វើដំណើរទៅហាត់នៅក្លិបឆ្ងាយផ្ទះ ដែលបង្កឱ្យលោកខកខាននូវការហ្វឹកហាត់៕
ចែករំលែកព័តមាននេះ