រាជធានីភ្នំពេញ ៖ សកម្មភាពពុះដីឡូត៍លក់ជូនអ្នកដែលមិនទាន់មានផ្ទះសម្បែងផ្ទាល់ខ្លួន ដើម្បីសាងសង់នៅពេលមានលទ្ធភាព ឬអ្នកកំពុងស្វែងរកការវិនិយោគដើម្បីទាញផលចំណេញ បាននិងកំពុងកើតឡើងយ៉ាងគគ្រឹកគគ្រេង ជាពិសេស នៅតំបន់ជាយរាជធានីភ្នំពេញ និងបណ្ដាខេត្តសក្ដានុពល ។ សកម្មភាពទាំងនេះ មានក្រុមហ៊ុនខ្លះមានអាជ្ញាប័ណ្ណត្រឹមត្រូវ ឯក្រុមហ៊ុនខ្លះគ្មានអាជ្ញាប័ណ្ណ និងច្បាប់ទម្លាប់ពីអាជ្ញាធរទេ ដែលជាហេតុធ្វើឲ្យបងប្អូនប្រជាពលរដ្ឋស្វែងរកដីសម្រាប់សង់ផ្ទះខាតបង់ ទទួលរងនូវការបោកប្រាស់ពីក្រុមហ៊ុនទាំងនោះ ។
រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ លោក ជា សុផារ៉ា បានក្រើនរំលឹកដល់ពលរដ្ឋដែលកំពុងស្វែងរកដីធ្លីសម្រាប់សង់ផ្ទះ ជាពិសេសដីឡូត៍ សូមឲ្យមានការប្រុងប្រយ័ត្នខ្ពស់ និងស៊ើបឲ្យបានច្បាស់ មុននឹងសម្រេចចិត្តទិញគម្រោងដីឡូត៍ពីអ្នកវិនិយោគទាំងនោះ ។
លោកបានមានប្រសាសន៍ថា កន្លងមក សកម្មភាពបោកប្រាស់បងប្អូនប្រជាពលរដ្ឋពីសំណាក់អ្នកលក់ដីឡូត៍ បានកើតឡើងរួចហើយ និងមានការតវ៉ាជាច្រើនផងដែរពីបងប្អូនរងនូវការបោកប្រាស់នោះ ។
លោកបញ្ជាក់ថា ៖« មានអ្នកខ្លះអត់ទាំងមានដីខ្លួនឯង អត់ទាំងមានទុនផង ស្រាប់តែចេញប្លង់ពុះដីឡូត៍លើកស្លាកប្រកាសលក់ឲ្យប្រជាពលរដ្ឋ ហើយហ៊ានទទួលយកប្រាក់កក់ពីអតិថិជនទៅទៀត ។ នៅពេលទទួលបានប្រាក់កក់ច្រើនគួរសមហើយក៏រត់បាត់ ទុកឲ្យអ្នកបង់ប្រាក់កក់នាំគ្នាស្រែកតវ៉ា » ។
លោកបន្តថា ប្រជាពលរដ្ឋ គួរតែយល់ដឹងនិងប្រុងប្រយ័ត្នខ្ពស់ ដោយស៊ើបឲ្យបានច្បាស់មុននឹងសម្រេចចិត្តទិញ កុំឃើញដីរាងធូរថ្លៃនាំគ្នាដាក់កក់ ដោយមិនដឹងថា ទីតាំងដីនោះនៅឯណា មានប្លង់ត្រឹមត្រូវឬក៏អត់ ។
លោកក៏បានស្នើឲ្យប្រជាពលរដ្ឋដែលកំពុងស្វែងរកទិញគម្រោងផ្ទះល្វែង ឬគម្រោងនានាផងដែរ សូមប្រុងប្រយ័ត្នដូចគ្នា ព្រោះមិនថាដីឡូត៍ទេដែលមានបញ្ហានោះ គម្រោងផ្ទះល្វែងមួយចំនួនក៏មានបញ្ហាដែរ ដែលតែងតែមានជនខិលខូចចង់រកស៊ីចំណេញរហ័ស ។
លោកថ្លែងថា ៖« បងប្អូនប្រជាពលរដ្ឋ ដែលរកទិញផ្ទះល្វែង ឬដីឡូត៍ សូមទាក់ទងទៅអាជ្ញាធរ ឬសមត្ថកិច្ច បើសិនជាគម្រោងណាមួយដែលបងប្អូនមិនទុកចិត្ត តែចង់ទិញគម្រោងនោះ » ។
អ្នកវាយតម្លៃ និងភ្នាក់ងារអចលនទ្រព្យជាច្រើន ក៏បានឲ្យជាយោបល់មួយចំនួនដល់ប្រជាពលរដ្ឋដែលស្វែងរកទិញគម្រោងអចលនទ្រព្យ ដូចជា ដីធ្លី និងផ្ទះសម្បែងផងដែរ ហើយអ្វីដែលពលរដ្ឋត្រូវគិតមុននឹងទិញគម្រោងអចលនទ្រព្យនោះ ត្រូវមើលថា តើអ្នកណាជាអ្នកអភិវឌ្ឍន៍គម្រោង ។ ជាការកត់សម្គាល់ អ្នកមានប្រវត្តិល្អក្នុងវិស័យអចលនទ្រព្យ តែងតែបញ្ចប់គម្រោង និងផ្ដល់ជូននូវគម្រោងអតិថិជនដែលទិញនោះដោយជោគជ័យ និងគ្មានបញ្ហាអ្វីទេ ប៉ុន្តែសម្រាប់អ្នកគ្មានបទពិសោធន៍ និងមិនដឹងប្រភពមកពីណា មកវិនិយោគគម្រោងអចលនទ្រព្យទាំងដីឡូត៍ និងផ្ទះសម្បែង តែងតែទាមទារពីពលរដ្ឋឲ្យសងប្រាក់ទៅវិញ ដោយសារមិនគោរពតាមកិច្ចសន្យា ឬមានតែគម្រោង ប៉ុន្តែគ្មានការអភិវឌ្ឍពិតប្រាកដ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍របស់ក្រុមហ៊ុន Emerging Markets Consulting បានឲ្យដឹងថា អ្វីដែលប្រជាពលរដ្ឋត្រូវសួររកពេលទិញផ្ទះ ឬគម្រោងដីឡូត៍ពីក្រុមហ៊ុនអភិវឌ្ឍន៍នោះ គឺប្លង់ និងភាពស្របច្បាប់នៃគម្រោង ។ ពេលខ្លះ បុគ្គលអ្នកលក់ និងម្ចាស់អចលនទ្រព្យជាមនុស្សផ្សេងគ្នា ហើយពេលខ្លះ អ្នកទាំងពីរអាចគ្មានទំនាក់ទំនងអ្វីនឹងគ្នាក៏មានដែរ ។ ដូចនេះហើយ បើសិនជាមិនបានសួរនាំឲ្យបានច្បាស់មុននឹងទិញទេ វាអាចនឹងមានបញ្ហានៅក្រោយពេលទិញរួច ។
លោកថា ៖« មានគម្រោងខ្លះយកប្លង់ទៅដាក់នៅធនាគារបាត់ ដើម្បីយកលុយមកពុះដីឡូត៍ ឬឈូសឆាយដី រួចហើយប្រកាសលក់ ហើយនៅពេលគម្រោងនោះមិនជោគជ័យ ម្ចាស់រត់បាត់ ធ្វើឲ្យធនាគារមករឹបអូសយកក៏មានដែរ » ។
លោក ប៉ូ អ៊ាវគង់ នាយកប្រតិបត្តិក្រុមហ៊ុនអចលនទ្រព្យ Advance បានឲ្យដឹងថា ប្រជាពលរដ្ឋក៏គួរតែមើលឲ្យបានច្បាស់ផងដែរ មុននឹងសម្រេចចិត្តទិញគម្រោងដីឡូត៍។
គម្រោងដីឡូត៍ខ្លះពុះលក់ព្រោងព្រាត ទាំងដែលមិនទាន់មានប្រព័ន្ធទឹកភ្លើងទៅដល់ ឬគ្មានប្រព័ន្ធលូត្រឹមត្រូវ ។ អ្វីដែលពលរដ្ឋត្រូវមើលបន្ថែមទៀតគឺ គម្រោងនោះមានសក្ដានុពលលើអ្វី ហើយអ្នកទិញនោះគាត់មានបំណងរស់នៅ ឬសម្រាប់វិនិយោគបន្ត ៕
ចែករំលែកព័តមាននេះ