ខេត្តប៉ៃលិន ៖ «អាងជីងចក់» ស្ថិតនៅក្បែរជើងភ្នំខៀវ ក្នុងភូមិអូរច្រាកើត សង្កាត់បយ៉ាខា ទួលល្វា ក្រុងប៉ៃលិន នឹងក្លាយទៅជាតំបន់ទេសចរថ្មី ទាក់ទាញភ្ញៀវទេសចរជាតិ…
ខេត្តប៉ៃលិន ៖ «អាងជីងចក់» ស្ថិតនៅក្បែរជើងភ្នំខៀវ ក្នុងភូមិអូរច្រាកើត សង្កាត់បយ៉ាខា ទួលល្វា ក្រុងប៉ៃលិន នឹងក្លាយទៅជាតំបន់ទេសចរថ្មី ទាក់ទាញភ្ញៀវទេសចរជាតិ និងអន្តរជាតិទៅលេងកម្សាន្ត ។ ជាពិសេសតំបន់នោះត្រូវអាជ្ញាធរណែនាំឱ្យម្ចាស់ដីរៀបចំធ្វើខ្យូស និងទប់ទឹកក្នុងអាងដើម្បីដាក់ទូក ឱ្យអ្នកទេសចរទៅជិះកម្សាន្ត ។
ម្ចាស់ដីម្នាក់ឈ្មោះសុផា រិទ្ធិ អាយុជាង៥០ឆ្នាំ ស្នាក់នៅលើមាត់អាងនោះកាលពីពេល ថ្មីៗកន្លងមកឱ្យដឹងថា អាងជីងចក់នាពេលនេះ ចាប់ផ្តើមមានភ្ញៀវទេសចរទៅលេងកម្សាន្តទាំងថ្ងៃបុណ្យចូលឆ្នាំខ្មែរប្រពៃណីជាតិ បុណ្យភ្ជុំបិណ្ឌ និងបុណ្យទាន ផ្សេងៗ ។
លោកបានសង់ខ្យូសសម្រាប់ឱ្យភ្ញៀវទេសចរចូលទៅកម្សាន្ត និង ដាក់ទូកសម្រាប់ភ្ញៀវទេសចរជិះលេងចំនួន៧គ្រឿង ។ មានស្ពាន២សង់ភ្ជាប់ពីមាត់អាងម្ខាងទៅមាត់អាងម្ខាងទៀត ដើម្បីងាយស្រួលឱ្យភ្ញៀវទេសចរដើរលេងកម្សាន្តឆ្លងពីត្រើយម្ខាងទៅត្រើយម្ខាងទៀត ។
នៅរដូវបុណ្យទាន ម្តងៗ លោកសុផា រិទ្ធិ ឱ្យដឹងថា មានភ្ញៀវទេសចរក្នុងស្រុក និងភ្ញៀវទេសចរពីតាមបណ្តាខេត្តជាច្រើនទៀត ដូចជាបន្ទាយមានជ័យ សៀមរាប បាត់ដំបង កំពង់ធំ ពោធិ៍សាត់ និងពីរាជធានីភ្នំពេញទៅកម្សាន្តជាបន្តបន្ទាប់ ។
អាជ្ញាធរមូលដ្ឋានឱ្យដឹងថា តំបន់ទេសចរនៅក្នុងខេត្តប៉ៃលិន កំពុងពង្រីកបន្ថែមទៀត ក្រៅពីទឹកធ្លាក់ភ្នំខៀវ រមណីយដ្ឋានចម្ការខ្នុរ រមណីយដ្ឋានភ្នំយ៉ាត ព្រមទាំងរមណីយដ្ឋានអាងតាជាវ ។ ជារៀងរាល់ឆ្នាំភ្ញៀវទេសចរជាតិ និងអន្តរជាតិទៅលេងកម្សាន្តក្នុងខេត្តប៉ៃលិនច្រើនកុះករគួរឱ្យកត់សម្គាល់ ហើយក៏មានជនជាតិចិន ថៃ កូរ៉េទៅលេងរាល់ឆ្នាំ ។ វិស័យទេសចរណ៍គឺជាឧស្សាហកម្មគ្មានផ្សែងផ្តល់ចំណូលដល់ប្រជាពលរដ្ឋរស់នៅក្នុងខេត្តប៉ៃលិន ៕
ចែករំលែកព័តមាននេះ