រាជធានីភ្នំពេញ ៖ សមត្ថកិច្ចប៉ុស្តិ៍ទន្លេបាសាក់សហការគ្នាជាមួយសន្តិសុខកោះពេជ្រធ្វើការដេញចាប់បានមុខសញ្ញាឆក់ទូរស័ព្ទដៃចំនួន២នាក់យកទៅសួរនាំ ហេតុការណ៍នេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី៩ ខែវិច្ឆិកា ឆ្នាំ២០១៧ តាមបណ្តោយផ្លូវបេតុងនៅក្នុងមជ្ឃមណ្ឌលកោះពេជ្រ ស្ថិតនៅក្នុងសង្កាត់ទន្លេបាសាក់ ខណ្ឌចំការមន ។
ជនសង្ស័យទី១-ឈ្មោះ ណាត សីម៉ា ភេទប្រុស អាយុ១៧ឆ្នាំ ស្នាក់នៅសង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិថ្មី ឃុំរកាធំ ស្រុកច្បារមន ខេត្តកំពង់ស្ពឺ ជាអ្នកបើកម៉ូតូ និងទី២-ឈ្មោះ ឈុន លីហួត ភេទប្រុស អាយុ១៧ឆ្នាំ ស្នាក់នៅភូមិចំបក់ ឃុំវាស់ស ស្រុកកំណើតសំរោងទង ខេត្តកំពង់ស្ពឺ ជាអ្នកឆក់ ។ ចំណែកជនរងគ្រោះវិញមានឈ្មោះ ផន ផល្លា ភេទប្រុស អាយុ៣០ឆ្នាំ មុខរបរធ្វើការនៅភោជនីដ្ឋានចិននៅក្នុងកោះពេជ្រ ស្នាក់នៅផ្ទះជួលគ្មានលេខ សង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីជនរងគ្រោះបានឱ្យដឹងថា មុនពេលកើតហេតុគាត់បានដើរជាមួយប្អូនស្រី និងអ្នកធ្វើការប្រុសម្នាក់ទៀតសរុបទាំងអស់៣នាក់ទើបតែចេញមកពីធ្វើការហើយគោលបំណងដើរទៅផ្ទះនៅម្តុំផ្សារកាប់គោ ខណៈដើរជិតដល់បារាស់កោះពេជ្រហើយជនរងគ្រោះបានលើកទូរស័ព្ទដៃម៉ាកសាំសុងកាឡាក់ស៊ីណូតមកនិយាយជាមួយនឹងបងស្រីដែលរស់នៅឯប្រទេសថៃ លុះពេលដើរបានមួយសន្ទុះក្រោយមកក៏ស្រាប់តែមានជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ភ្នំពេញ ១DE-៤៥១៥ បានធ្វើសកម្មភាពឆក់ទូរស័ព្ទដៃពីជនរងគ្រោះហើយបម្រុងនឹងគេចខ្លួនត្រូវជនរងគ្រោះស្រែកថា ចោរៗ ត្រូវសន្តិសុខកោះពេជ្រនាំគ្នាបិទបារាស់ជុំវិញរួចដេញចាប់ជនសង្ស័យធ្វើឱ្យជនសង្ស័យភ័យស្លន់ស្លោបានផ្តួលម៉ូតូរត់ឡើងលើអគារសំណង់ដែលកំពុងតែសាងសង់មិនទាន់រួចនៅឡើយនោះទើបកម្លាំងអន្តរាគមន៍ខណ្ឌចំការមន និងប៉ុស្តិ៍ទន្លេបាសាក់ក្របួចបានជនសង្ស័យទាំង២នាក់ និងម៉ូតូជិះធ្វើសកម្មភាពមួយគ្រឿងយកទៅសួរនាំ ។
ក្រោយពេលទៅដល់ប៉ុស្តិ៍នគរបាលទន្លេបាសាក់រួចជនសង្ស័យបានឆ្លើយសារភាពប្រាប់សមត្ថកិច្ចថា ខ្លួនពិតជាបានធ្វើសកម្មភាពឆក់ទូរស័ព្ទដៃពិតមែន ។ ចំណែកជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលទន្លេបាសាក់ដើម្បីដាក់បន្ទុកជនសង្ស័យចាត់ការទៅតាមច្បាប់ ៕
ចែករំលែកព័តមាននេះ