រាជធានីភ្នំពេញ ៖ តារាចម្រៀងយេៗដែលមានក្តីសុខកន្លងមកជាមួយគូដណ្តឹងរហូតដល់រួមរស់ជាមួយគ្នាបែបប្តីប្រពន្ធនោះ ឥឡូវភាពផ្អែមល្ហែមបានរលត់ហើយ ។ ពួកគេបែកគ្នាតែមុខជំនួញនៅបន្តជាមួយគ្នា ។ នាងធីណាតា កាលពីពេល ថ្មីៗកន្លងមកឱ្យដឹងថា បីខែមកហើយដែលពួកនាងចែកផ្លូវគ្នា ។
ការបែកបាក់គ្នានោះ ធី ណាតា និយាយថា«ប្រឹងរកដំណោះស្រាយដែរ តែមិនអាចភ្ជាប់វិញបាន ។ យើងគ្មានសល់អ្វីក្រៅពីមុខរបររកស៊ីដែលយើងបានសហការបើករួមគ្នាតាំងពីពេញចិត្តគ្នាមកនោះទេ។ គ្មានសល់ពាក្យថាវិលរកស្នេហ៍ដូចពីមុនក្រៅពីមុខជំនួញរាល់ថ្ងៃនាំចូលផលិតផលផ្តាច់មុខមកពីប្រទេសអូស្ត្រាលីទេ ។ នាងខ្ញុំនាំចូលជាប្រភេទគ្រឿងសំអាង គាត់ជាប្រភេទអាហារបំប៉ន » ។
ធី ណាតា ចង់សម្រាកឱ្យឆ្ងាយពីពេលវេលាក្រៀមក្រោះនេះ ។ អំឡុងខែធ្នូនាងត្រូវចេញទៅសម្តែងនៅប្រទេសអូស្ត្រាលីជាលើកទី៦រយៈពេល៣ខែ ហើយប្រហែលជាបន្តនៅទីនោះ៦ខែទៀត ។ មូលហេតុគឺទៅលម្ហែកាយបំភ្លេចស្នេហ៍ភ្លើងចំបើងមួយនេះដែលនាងផ្តើមឡើងរហូតដល់រួមរស់បែបជាប្តីប្រពន្ធ ក្រោមដំបូលតែមួយ ។ ស្នេហ៍មួយនេះមុននឹងភ្ជាប់ពាក្យគឺស្រឡាញ់គ្នារយៈពេលខ្លីដែរ ។
ពេលទៅប្រទេសអូស្ត្រាលីនោះធី ណាតានិយាយថា«ប្រសិនបើចៃដន្យជួបជាមួយបុរសណាល្អគាត់សុំនាងខ្ញុំស្អំបេះដូង នាងខ្ញុំនឹងពិចារណាឱ្យច្បាស់ ហើយប្រហែលជាត្រូវរ៉ូវគ្នាអាចនឹងរស់នៅទីនោះតែម្តងយោងទៅលើហេតុផលថា អូស្ត្រាលីជាប្រទេសមួយដែលនាងខ្ញុំស្រឡាញ់ពេញចិត្តយូរមកហើយ ព្រោះនាងខ្ញុំដើរបានបួនដប់ប្រទេសមានតែអូស្ត្រាលីមួយនេះទេចូលចិត្តជាងគេ» ។
កញ្ញាធី ណាតា ជាតារាចម្រៀងសិចស៊ីមួយដួង ជាប្អូនជីដូនមួយរបស់អ្នកនាងឆៃលី ដាឡែន ។ នាងធ្លាប់សម្តែងតាមទូរទស្សន៍នាពេលកន្លងមក ហើយបាត់មុខក្រោយពេលភ្ជាប់ពាក្យ និងបង្កើតមុខរបររកស៊ីជាមួយគ្នា ៕
ចែករំលែកព័តមាននេះ