រាជធានីភ្នំពេញ ៖ នៅរសៀលម៉ោង២ថ្ងៃសៅរ៍ទី១១ វិច្ឆិកា ស្អែកនេះ កម្មវិធីប្រកួតប្រដាល់នៅលើសង្វៀនទូរទស្សន៍អាស៊ីអាគ្នេយ៍ដល់កំណត់ត្រូវប្រកួតដណ្ដើមពិន្ទុអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា ២រូប និងថៃ២រូបប៉ះគ្នា។ អ្វីដែលគេកត់សម្គាល់គឺការប្រកួតលើកនេះកីឡាករកម្ពុជាល្បីឈ្មោះ ប៉ះសុទ្ធតែជាមួយកីឡាករជើងចាស់មកពីប្រទេសថៃដែលមិនទាន់ដឹងថាអ្នកណានឹងយកបាន៣ពិន្ទុនៅឡើយទេសម្រាប់ការប្រកួតដ៏ក្តៅគគុកនេះ ។
ការប្រកួតនៅរសៀលស្អែកនេះ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលរសៀលថ្ងៃសម្រាក ដែលជាថ្ងៃមនុស្សម្នាក្នុងក្រុងនិយមមកទស្សនាដល់ស្ទីឌីយោ ហើយនៅចន្លោះការប្រកួតរបស់គូនីមួយៗក៏មានការប្រគំតន្ត្រីផង ដែលតាមការជាក់ស្ដែងការប្រដាល់ជាទម្រង់អន្តរជាតិបែបនេះ អ្នកទស្សនារមែងមកកកកុញស្រាប់ ដោយសារតែមុនការប្រដាល់គឺជាវេទិកាតន្ត្រីបន្តផ្ទាល់។
កីឡាករកម្ពុជា២រូប គឺជើងខ្លាំងផាន់ គ្រាន់ និងកីឡាករវ័យក្មេងធន់ ចាន់តាក់ នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅក្នុងថ្ងៃនោះ ដោយសារជ័យជម្នះលើកនេះ គឺជាការកាត់ក្ដីមួយយ៉ាងប្រសើរក្នុងការបោះជំហានបន្ត ។ អ្នករៀបចំការប្រកួតបានអះអាងថា កីឡាករទាំង៤រូបត្រូវប៉ះគ្នាក្នុងវគ្គសន្សំពិន្ទុ ។ លោកថា កីឡាករកម្ពុជាទាំងពីររូបត្រៀមខ្លួនយ៉ាងម៉ត់ចត់មុនពេលការប្រកួតមកដល់ដោយបានចំណាយពេលច្រើនជាងមួយ
សប្ដាហ៍ក្នុងការហ្វឹកហាត់នោះផង ។ អ្នកគាំទ្រភាគច្រើនលែងហ៊ានប្រកាសថា ភាគីណាមួយនឹងឈ្នះដោយច្បាស់ក្នុងចិត្តដូចមុនទៀតហើយ បន្ទាប់ពីការប្រកួតរបស់កីឡាករម្ខាង សុទ្ធតែមានទំនុកចិត្តមិនធម្មតារៀងខ្លួនបែបនេះ ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា៤រូបដែលមានឈ្មោះដណ្ដើមយកខ្សែក្រវាត់ក្នុងព្រឹត្តិការណ៍ប្រដាល់នោះ កីឡាករ ផាន់ គ្រាន់ គឺជាជើងខ្លាំងវ័យក្មេងម្នាក់ដែលលោករំពឹងខ្ពស់ បើទោះជាគេត្រូវប្រឈមនឹងកីឡាករថៃល្អជាគូប្រកួតក្ដី ។ គេត្រូវប៉ះប្រកួតជាមួយកីឡាករថៃឈ្មោះ ផា យ៉ាក់ឡេក ក្នុងនាមជាគូឯកអន្តរជាតិដណ្ដើមពិន្ទុ នៅថ្ងៃសៅរ៍ស្អែក ។ លោកថា ជំនួបរវាងពួកគេជារឿងសំខាន់ ដោយសារអ្នកណាឈ្នះក្រៅពីបានពិន្ទុហើយ គឺត្រូវទទួលបានទំនុកចិត្តពីអ្នកគាំទ្រទៅទៀត ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ។
លោកថា ជំនួបរបស់ពួកគេត្រូវដាក់យ៉ាងពិសេសសម្រាប់ថ្ងៃសៅរ៍សប្ដាហ៍ទី២ក្នុងខែ១១នេះតែម្ដង ដើម្បីឱ្យអ្នកតាមដានកាន់តែចង់ទស្សនា ។ លោកថា កីឡាករ ផាន់ គ្រាន់ អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបផាន់ គ្រាន់ ជាមួយកីឡាករថៃជាដៃគូពិតជាមិនធម្មតាសម្រាប់ការប្រកួតទាំងមូល ។ កីឡាករកម្ពុជារូបនេះត្រូវបានលោកសរសើរថាមានការឈានឡើងសមត្ថភាព ហើយការប្រកួតប៉ុន្មានលើកចុងក្រោយក៏ល្អផងដែរ ទើបលោកយល់ថាគេអាចបាន៣ពិន្ទុពីការប្រកួតនៅថ្ងៃស្អែក បើទោះជាមុននេះបន្តិចគេវាយជាមួយថៃល្អខ្លះ និងមិនសូវល្អខ្លះ នៅលើសង្វៀនអន្តរជាតិក៏ដោយ ។
លោកនិយាយថា ផាន់ គ្រាន់ នៅតែចាត់ទុកថាជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតលើកនេះ ។ កីឡាករថៃដែលត្រូវប្រកួតជាមួយផាន់ គ្រាន់ ធ្លាប់ប្រកួត១០៤លើក ឈ្នះ៧៨លើក ចាញ់២៥លើក និងស្មើ១០លើកក្នុងពេលដែលកីឡាករកម្ពុជា ធ្លាប់ប្រកួតរហូតដល់១០១លើក ឈ្នះ៨៣លើក ចាញ់១៦លើក និងស្មើ២លើក ។
សម្រាប់កីឡាករ ធន់ ចាន់តាក់ លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីថៃផងដែរឈ្មោះ កង សាយ៉ាម នៅក្នុងព្រឹត្តិការណ៍ប្រដាល់អន្តរជាតិដណ្ដើមពិន្ទុនេះដែរ ក្នុងនាមជាគូរងឯក ។ លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលធន់ ចាន់តាក់ គឺជាកីឡាករមិនធម្មតា ដោយលោកបានចាត់ទុកថាគឺជាជើងខ្លាំង និងធនធានកីឡាករវ័យក្មេងដ៏កម្រនោះផង ។ ជាក់ស្ដែងគេឈ្នះជាប្រចាំគ្រប់ពេលគេឡើងប្រកួតជាមួយកីឡាករបរទេសនាពេលកន្លងមក ទើបមានមុខបានឡើងនៅក្នុងព្រឹត្តិការណ៍នេះ។
លោកថា កីឡាករថៃជាដៃគូគេគឺជាកីឡាករវ័យក្មេង ប៉ុន្តែល្បីឈ្មោះ តែគេមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជាជាធំ ។ កីឡាករថៃធ្លាប់ប្រកួត៧៨លើក ឈ្នះ៦៤លើក ចាញ់១៣លើក និងស្មើ១លើក រីឯកីឡាករកម្ពុជាធ្លាប់ប្រកួត៦២លើក ឈ្នះ៥២លើក ចាញ់តែ១០លើក និងមិនធ្លាប់ស្មើ ។
នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនទូរទស្សន៍អាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិបែបនេះមិនខុសគ្នា ខណៈដែលនៅប៉ុស្តិ៍លេខ៥ព្រែកកំពិសក៏មានការប្រកួតជម្រុះ១៦នាក់យក៨នាក់ក្នុងសប្ដាហ៍ទី២ ចាប់ពីម៉ោង៥ល្ងាចតទៅ ៕
ចែករំលែកព័តមាននេះ