ទីក្រុងបាងកក ៖ លោកឧបនាយករដ្ឋមន្ត្រី Somkid Jatusripitak បានបញ្ជាទៅការិយាល័យគោលនយោបាយហិរញ្ញវត្ថុ ឲ្យពិចារណាបន្ថែមប្រយោជន៍ពន្ធដើម្បីជួយផ្តល់ការងារ និងអាជីវកម្មរបស់មនុស្សចាស់ក្នុងប្រទេស ។
រដ្ឋមន្ត្រីហិរញ្ញវត្ថុ Apisak Tentivorawong បានថ្លែងថា ៖« ក្នុងរយៈពេល៤ ឬ៥ឆ្នាំខាងមុខទៀត ចំនួនមនុស្សចាស់ក្នុងប្រទេសថៃនឹងកើនដល់កម្រិតខ្ពស់ ហើយវានឹងជាបន្ទុកមួយដល់ប្រទេស ។ ជាលទ្ធផល លោកឧបនាយករដ្ឋមន្ត្រីបានបញ្ជាឲ្យការិយាល័យគោលនយោបាយហិរញ្ញវត្ថុពិចារណាចេញវិធានការបន្ថែម ដែលអាចជួយដល់ការងារមនុស្សចាស់ ឬអាជីវកម្មពួកគេពេលចូលនិវត្តន៍ » ។
ក្រសួងហិរញ្ញវត្ថុកំពុងស្វែងរកវិធីជួយពលរដ្ឋថៃ រក្សាស្តង់ដារស់នៅខ្ពស់បន្ទាប់ពីចូលនិវត្តន៍ ខណៈដាក់កម្រិតថវិកាសម្រាប់សេវាថែទាំសុខភាពមនុស្សចាស់ ។
ក្នុងឆ្នាំ២០១៥ រដ្ឋាភិបាលបានជំរុញឲ្យបង្កើតមូលនិធិសន្សំប្រាក់ជាតិ ។ មូលនិធិបម្រុងកាតព្វកិច្ចដែលរង់ចាំជាយូរមកហើយ នឹងកំណត់ឱ្យចូលជាធរមាននៅឆ្នាំ២០១៨ ។
ច្បាប់នេះតម្រូវឲ្យក្រុមហុ៊នដែលមានបុគ្គលិក១០០នាក់ ឬច្រើនជាងនេះ ផ្គូផ្គង់ការរួមចំណែករបស់បុគ្គលិកខ្លួន ក្នុងរយៈពេល៤ឆ្នាំដំបូងបន្ទាប់ពីការអនុម័ត ។
រដ្ឋាភិបាលព្យាករថា មនុស្សមានអាយុ៦០ឆ្នាំ និងលើសពីនេះ នឹងស្មើ១៦,៨%នៃចំនួនពលរដ្ឋសរុបក្នុងឆ្នាំ២០២០ ច្រើនជាងឆ្នាំ២០១៥ ស្មើតែ១៣,៨% ។ គេព្យាករថា អត្រានេះនឹងកើនដល់២០%ក្នុងឆ្នាំ២០២៥ ។
ជាមួយគ្នានេះ ធនាគារ Bank of Agriculture and Agricultural Cooperatives នឹងផ្តល់កម្មវិធីហ្វឹកហាត់់ជនក្រីក្រក្នុងផ្នែកកសិកម្ម ខណៈធនាគារ Government Savings Bank មើលថែអ្នករស់នៅក្នុងទីប្រជុំជន ។ កម្មវិធីទាំងនេះនឹងផ្តល់ជំនាញសម្រាប់វិស័យឯកជន ។
លោក Apisak បន្តថា ធនាគារទាំងពីរនឹងផ្តល់នូវការសន្សំ និងកម្ចីសម្រាប់ជនក្រីក្រ ដោយមានអត្រាការប្រាក់ពិសេសទៀតផង ។
រដ្ឋាភិបាលបានចាប់ផ្តើមគម្រោងសុខុមាលភាពនៅខែតុលា ដោយផ្តល់ប្រាក់ជំនួយដល់ពលរដ្ឋ១១,៧% ដែលបានចុះឈ្មោះជាមួយរដ្ឋជាអ្នករកប្រាក់ចំណូលទាប ឬគ្មានការងារធ្វើ ។
លោក Apisak បន្ថែមថា ក្រសួងហិរញ្ញវត្ថុគ្រោងនឹងស្នើសុំការអនុម័តពីគណៈរដ្ឋមន្ត្រី ដើម្បីបង្វែរប្រាក់ឧបត្ថម្ភមនុស្សចាស់ ទៅឱ្យមនុស្សចាស់ក្រីក្រ ។ ការបែងចែកនឹងមានប្រសិទ្ធភាពចាប់ពីថ្ងៃទី១ ធ្នូ ៕
ចែករំលែកព័តមាននេះ