ទីក្រុងបាងកក ៖ ហ្វេសប៊ុកនិយាយថា អ្នកទីផ្សារគួរចំណាយប្រាក់ជាច្រើនលើទូរស័ព្ទចល័ត និងវាស់វែងតាមលទ្ធផលដើម្បីបង្កើនការទិញពីអតិថិជន ។
លោក John Wagner នាយកគ្រប់គ្រងក្រុមហ៊ុនហ្វេសប៊ុកប្រចាំប្រទេសថៃ និយាយថា ៖« សព្វថ្ងៃ មានគម្លាតរវាងចំនួនទឹកប្រាក់ចំណាយលើការផ្សាយពាណិជ្ជកម្មតាមទូរស័ព្ទ និងពេលវេលាដែលពលរដ្ឋថៃចំណាយលើទូរស័ព្ទ ។ ក្នុងចំណោមការចំណាយផ្សាយពាណិជ្ជកម្មឌីជីថលនៅថៃប្រមាណ១៥ ទៅ២០% គឺមានតែ៧%ប៉ុណ្ណោះជាការផ្សព្វផ្សាយពាណិជ្ជកម្មលើទូរស័ព្ទ ខណៈពលរដ្ឋថៃចំណាយពេល៤ម៉ោងក្នុង១ថ្ងៃលើទូរស័ព្ទស្មាតហ្វូន » ។
ប្រព័ន្ធផ្សព្វផ្សាយបែបប្រពៃណីបានគ្របដណ្តប់ការផ្សាយពាណិជ្ជកម្ម ទោះបីជាមនុស្សចំណាយពេលតិចក្នុងការទស្សនាវាក្តី ។
សន្ទស្សន៍បណ្តាញសកលឆ្នាំ២០១៧ រាយការណ៍ថា ពលរដ្ឋថៃបានចំណាយពេល៤ម៉ោងក្នុង១ថ្ងៃលើទូរស័ព្ទស្មាតហ្វូន, ៣ម៉ោងមើលទូរទស្សន៍, ២ម៉ោងលើកុំព្យូទ័រ, ១ម៉ោងអានកាសែត និង៥៥នាទីទៀតស្តាប់វិទ្យុ ។ សន្ទស្សន៍នេះផ្អែកលើការស្ទង់មតិអ្នកឆ្លើយឆ្លងប្រមាណ ៣.២០០នាក់ក្នុងប្រទេសថៃ ។
លោក Wagner បន្តថា ៖« យើងរំពឹងថា ក្រុមហ៊ុននៅថៃនឹងបម្រុងថវិកាផ្សព្វផ្សាយតាមប្រព័ន្ធអេឡិចត្រូនិកដល់២០%នៅឆ្នាំ២០១៨ ព្រោះពលរដ្ឋថៃចំណាយពេលកាន់តែច្រើនលើឧបករណ៍ទាំងនេះ » ។
លោកបន្តថា អ្នកទីផ្សារអាចប្រើបណ្តាញសង្គមសម្រាប់បំពេញតម្រូវការអតិថិជន ដោយមិនចាំបាច់រង់ចាំ ។
យោងតាម eMarketer 2017 ឲ្យដឹងថា ជាមធ្យម ក្រុមហ៊ុនមួយនៅថៃ បានចំណាយថវិកាពី១៥ ទៅ២០%ដើម្បីផ្សាយពាណិជ្ជកម្មតាមប៉ុស្តិ៍ឌីជីថល ។
នៅប្រទេសអូស្ត្រាលី ក្រុមហ៊ុននានាបានបែងចែកថវិការបស់ពួកគេ៥០% សម្រាប់ការផ្សាយពាណិជ្ជកម្មឌីជីថល ។ លោក Wagner និយាយថា ថៃនៅតែមានឱកាសលូតលាស់ ខណៈប្រទេសនេះ អ្នកប្រើប្រាស់ហ្វេសប៊ុកកើនដល់៤៨លាននាក់ ស្មើ៩៦% ។
ហ្វេសប៊ុកក៏អាចដើរតួនាទីជាវេទិកាសម្រាប់ម៉ាកទើបបង្កើតផងដែរ ។ យោងតាមការសិក្សារបស់ TNS លើអ្នកប្រើបណ្ដាញសង្គមថៃចំនួន១ពាន់នាក់មានអាយុលើសពី១៨ឆ្នាំ ឲ្យដឹងថា ជនជាតិថៃ៩៣% បានរកឃើញផលិតផល និងម៉ាកថ្មីៗនៅលើបណ្តាញសង្គម ។
យោងតាមទិន្នន័យផ្ទៃក្នុងរបស់ហ្វេសប៊ុកថា ចាប់ពីខែតុលា ដល់ខែធ្នូឆ្នាំមុន ការទិញ៧២% គឺតាមបណ្តាញហ្វេសប៊ុកក្នុងទូរស័ព្ទដៃ ហើយអតិថិជនថៃ៦២% មានអាយុពី១៨ ទៅ៣៤ឆ្នាំ ៕
ចែករំលែកព័តមាននេះ