រាជធានីភ្នំពេញ ៖ នាវេលាល្ងាចថ្ងៃទី០៩ វិច្ឆិកានេះ កម្លាំងសមត្ថកិច្ចនគរបាលរាជធានីភ្នំពេញ បានធ្វើការចាប់ឃាត់ខ្លួនលោកឧកញ៉ា ជួប ច័ន្ទ តាមដីកាបង្គាប់ឲ្យនាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ។ លោកឧកញ៉ា…
រាជធានីភ្នំពេញ ៖ នាវេលាល្ងាចថ្ងៃទី០៩ វិច្ឆិកានេះ កម្លាំងសមត្ថកិច្ចនគរបាលរាជធានីភ្នំពេញ បានធ្វើការចាប់ឃាត់ខ្លួនលោកឧកញ៉ា ជួប ច័ន្ទ តាមដីកាបង្គាប់ឲ្យនាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ។ លោកឧកញ៉ា ជួប ច័ន្ទ មានអាយុ៤៥ឆ្នាំ មុខរបរជាពាណិជ្ជករ មានទីលំនៅផ្ទះលេខ៥២ ផ្លូវលេខ១២៣ ភូមិ៤ សង្កាត់ទួលទំពូង១ ខណ្ឌចំការមន ត្រូវបានលោក គឹម រ័ត្នណារិន ចៅក្រមស៊ើបសួរចេញដីកាបង្គាប់ឲ្យនាំខ្លួនចុះថ្ងៃទី០៨ វិច្ឆិកា ២១០៧ ពាក់ព័ន្ធពីបទមិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅចំណុចក្រុមហ៊ុន គឹម ហាប់ខូអិលធីឌី ផ្ទះលេខ៥៤ ផ្លូវលេខ៣៨៨ សង្កាត់ទួលទំពូង២ ខណ្ឌចំការមន រាជធានីភ្នំពេញ។ លោកឧកញ៉ា ជួប ច័ន្ទ ត្រូវបានតំណាងអយ្យការចោទប្រកាន់ពីបទមជ្ឈឹម ដែលច្បាប់កំណាត់ផ្តន្ទាទោសដាក់ពន្ធនាគារ និងបានបង្កឲ្យមានព្យសនកម្មធ្ងន់ធ្ងរ ប៉ះពាល់ដល់ផលប្រយោជន៍របស់អ្នកដទៃជាបុគ្គលឯកជន និងប៉ះបាល់សណ្តាប់ធ្នាប់សាធារណៈ។
ដើម្បីចៀសវាងការរត់គេចខ្លួនរបស់ជនត្រូវចោទ និងធានាដល់ការស៊ើបសួរឲ្យបានពេញលេញ គប្បីសម្រេចខាំខ្លួនឈ្មោះ ជួប ច័ន្ទ មកចំពោះមុខចៅក្រមស៊ើបសួរដើម្បីបំភ្លឺការពិត។ គួរំលឹកថា ដើមចមបណ្តាលឲ្យសមត្ថកិច្ចចាប់ខ្លួនលោកឧកញ៉ា ជួប ច័ន្ទ វិញនោះ កាលពីព្រលប់ថ្ងៃទី១២ កញ្ញា ២០១៧ សមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ បានធ្វើការឃាត់ខ្លួនឧកញ៉ា ជួប ច័ន្ទ ដែលគេច្រើនស្គាល់ថា ជាឧកញ៉ារកស៊ីទិញលក់ដី ពាក់ពន្ធចេញមូលប្បទានបត្រអត់សាច់ប្រាក់(សែកស្អុយ)១លានដុល្លារអាមេរិក ឲ្យទៅកូនសេដ្ឋីម្នាក់ទៀត។ តាមប្រភពព័ត៌មានបានឲ្យដឹងថា លោកឧកញ៉ា ជួប ច័ន្ទ ត្រូវបានរងនូវពាក្យបណ្តឹងរបស់លោក លីវ វុទ្ធី តំណាងឲ្យក្រុមហ៊ុន គឹម កៅ ដែលជាកូនប្រុសលោកឧកញ៉ា គឹម ហាប់ ថាបានចេញមូលប្បទានបត្រគ្មានសាច់ប្រាក់ចំនួន១លានដុល្លារអាមេរិក។
ប្រភពបន្តថា ឧកញ៉ា ជួប ច័ន្ទ ជាប់ពាក់ពន្ធលុយកាក់រកស៊ីជាមួយគ្នា នឹងក្រុមហ៊ុនលោកឧកញ៉ា គឹម កៅ លើទឹកប្រាក់ប្រមាណ៣លានកន្លះដុល្លារអមេរិក ប៉ុន្តែក្រោយមក លោកឧញ៉ា គឹម កៅ បានទារយកប្រាក់បំណុលនោះវិញ ទើបលោកឧកញ៉ា ជួប ច័ន្ទ ចេញសែកឲ្យទៅឧកញ៉ា គឹម កៅ ដែលមានទឹកប្រាក់១លានដុល្លារអាមេរិក ដោយបានកំណត់ឲ្យម្ចាស់បំណុល ដើម្បីយកទៅបើកពីធនាគារនៅថ្ងៃទី៣០ ខែកក្កដា ២១០៧ លុះពេលភាគីឧកញ៉ា គឹម កៅ យកសែកនោះទៅបើកលុយ ស្រាប់តែធនាគារបញ្ជាក់មកវិញថា មូលប្បទានបត្រនេះគ្មានសាច់ប្រាក់ទេ។ ក្រោយពីមានពាក្យបណ្តឹងរបស់លោក លីវ វុទ្ធី តំណាងឲ្យលោកឧកញ៉ា គឹម កៅ លោកឧកញ៉ា ជួប ច័ន្ទ ត្រូវបានសមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ ចេញលិខិតមួយឲ្យចូលបំភ្លឺលើពាក្យបណ្តឹងឧកញ៉ា គឹម កៅ នោះ ខណៈពេលឧកញ៉ា ជួប ច័ន្ទ ចូលបំភ្លឺក៏ត្រូវសមត្ថកិច្ចឃាត់ខ្លួនតែម្តងទៅ។
លុះដល់ថ្ងៃទី១៣ កញ្ញា សមត្ថកិច្ចបានបញ្ជូនលោកឧកញ៉ា ជួប ចន្ទ័ ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ដែលសំណុំរឿងនេះ បានស្ថិតនៅដៃលោក ស៊ីន វីរៈ ព្រះរាជអាជ្ញារង នៃអយ្យការអមសាលាដំបូងធ្វើការសាកសួរ។ ក្រោយពីសាកសួរតំណាងអយ្យការបានសម្រេចមិនធ្វើការចោទប្រកាន់ទេ និងបានអនុញ្ញាតឲ្យលោកឧកញ៉ា ជួប ច័ន្ទ វិលត្រឡប់ទៅផ្ទះវិញ ដោយតម្រូវដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ៕
ចែករំលែកព័តមាននេះ