រាជធានីភ្នំពេញ ៖ ស្រីតូចមានសំឡេងពីរោះលំនាំអ្នកស្រីរស់ សេរីសុទ្ធា គឺកុមារីអ៊ុក សុវណ្ណារី ។ ក្មេងស្រីនេះអ្នកគាំទ្រជាច្រើន្រឡាញ់ពេញចិត្តខ្លាំងណាស់ចំពោះទឹកដមសំឡេងរបស់នាង ។ សុវណ្ណារីទទួលបានការសរសើរថា មានទឹកដមសំឡេងពីរោះពីធម្មជាតិកម្ររកបាន ។
អ៊ុក សុវណ្ណារី មានឪពុកជាមន្ត្រីនគរបាល និងម្តាយជាស្ត្រីមេផ្ទះ ។ កុមារីសំឡេងពីរោះរណ្តំរូបនេះមានចំណូលចិត្តខ្លាំងក្នុងការសិក្សារៀនភាសាអង់គ្លេស ប៉ុន្តែដោយសារតែជីវភាពមិនសូវអំណោយផល នាងបានត្រឹមតែរៀនក្នុងសាលារដ្ឋប៉ុណ្ណោះ មិនបានរៀននៅសាលាឯកជនល្បីៗទេ ។
អ៊ុក សុវណ្ណារី កាលពីពេលថ្មីៗកន្លងមកឲ្យដឹងថា សព្វថ្ងៃនាងរៀនថ្នាក់ទី៧ ។ នាងបានផ្អាករៀនអង់គ្លេសមួយរយៈដោយសារតែខ្វះប្រាក់បង់សាលាឯកជន ។ ចំណែកផ្ទះដែលនាងរស់នៅសព្វថ្ងៃជាផ្ទះរបស់ជីតាខាងឳពុក គឺអត់មានផ្ទះជាកម្មសិទ្ធិរបស់ឳពុក ម្តាយនាងទេ ។ ម្ល៉ោះហើយនាងតែងតែចូលរួមច្រៀងតាមទូរទស្សន៍មួយចំនួន កាលពីមុនពេលចូលរួមប្រឡងកម្មវិធីធំលំដាប់អន្តរជាតិរបស់ទូរទស្សន៍ហង្សមាស ដើម្បីបានប្រាក់ខ្លះជួយជីវភាពរស់នៅរបស់ក្រុមគ្រួសារ ។
មុនពេលប្រឡងនៅទូរទស្សន៍ហង្សមាសអ៊ុក សុវណ្ណារី ធ្លាប់ប្រឡងនៅក្នុងកម្មវិធី«ទេពកោសល្យកុមារ» របស់ទូរទស្សន៍អ៊ីធីវីកាលពីអាយុ១០ឆ្នាំជាប់ជ័យលាភីចំណាត់ថ្នាក់លេខ១ច្រៀងបទ«ដូនជីអភ័ព្វ» ។
អ៊ុក សុវណ្ណារី ចេះច្រៀងតាំងពីអាយុ៥ឆ្នាំដោយតែងតែច្រៀងលេងក្នុងផ្ទះបាយ តែអ្នកផ្ទះមិនសូវជាចាប់អារម្មណ៍ទេ ។ ក្រោយប៉ា ម៉ាក់ដឹងកូនស្រីមានសំឡេងល្អក៏ឲ្យចូលរួមប្រឡងចម្រៀងជាបន្តបន្ទាប់តាមការស្នើសុំរបស់នាង ។
ពេលនេះកុមារីអ៊ុក សុវណ្ណារី ចង់បានកន្លែងច្រៀងមួយសមរម្យ ប្រសិនបើមានគេចាប់អារម្មណ៍ ប៉ុន្តែបើច្រៀងប្រចាំនៅតាមហាង ឬបៀរហ្គាឌិន ម្តាយនាងមិនអនុញ្ញាតទេ ព្រោះនៅក្មេងពេក ។ ម្ល៉ោះហើយទើបរំពឹងថាបណ្តាផលិតកម្មមួយចំនួននឹងចាប់អារម្មណ៍ចំពោះទឹកដមសំឡេងរបស់នាង ។
ម្តាយរបស់អ៊ុក សុវណ្ណារី ថ្លែងថា «ពេលឃើញកូនមានគេស្គាល់ មានស្នាដៃ ក្នុងនាមជាម្តាយមានតែលើកម្រាមដៃដប់ បើសិនជាមានទូរទស្សន៍ ឬក្រុមហ៊ុនណាចង់យកកូនរបស់ខ្ញុំទៅច្រៀង គឺពេញចិត្តឲ្យប្រឡូកតែបើសិនជាចង់ឲ្យច្រៀងនៅតាមហាង គឺខ្ញុំមិនរើសអើងទេ តែក៏មិនឲ្យទៅដែរព្រោះនៅក្មេងជាកូនស្រីទៀតអាណិតគាត់ បើសិនជាគ្មានផលិតកម្មណាទទួលខ្ញុំ និងស្វាមីក៏មិនអន់ចិត្តដែរ គឺមានតែតាមហ្នឹងចុះធ្វើម៉េចបើបែបនេះ ។
ខ្ញុំ និងស្វាមីទោះជាលំបាកយ៉ាងណានឹងស៊ូឲ្យកូនបានរៀន ចិញ្ចឹមឲ្យបានល្អដើម្បីឲ្យគ្នាសប្បាយចិត្ត និងកក់ក្តៅពេលនៅក្បែរអ្នកមានគុណ» ។
អ៊ុក សុវណ្ណារី ពេលប្រឡងនៅទូរទស្សន៍ហង្សមាសវគ្គទី១ច្រៀងបទ«ឱភូមិបាក់ព្រា»ត្រូវគណៈកម្មការទាំង៣ចុចយក ហើយនាងបានជ្រើសរើសសុគន្ធ និសា ជាគ្រូបង្វឹក ។ ប៉ុន្តែនាងបានធ្លាក់ចេញពីការប្រកួតត្រឹមវគ្គពាក់កណ្តាលផ្តាច់ព្រ័ត្រ ៕
ចែករំលែកព័តមាននេះ