រាជធានីភ្នំពេញ៖ សន្និបាតបញ្ញវន្តពិភពលោក លើកទី៣ ដែលនឹងប្រារព្ធធ្វើឡើងនាថ្ងៃទី ១៧-១៨ វិច្ឆិកាឆ្នាំនេះ មានលក្ខណៈធំ និងពិសេសជាងឆ្នាំមុនៗ ហើយប្រធានបទដែលគ្រោងលើកយកមកជជែកពិភាក្សា គឺមានលក្ខណៈទូលំទូលាយ ដែលអាចឱ្យអ្នកចូលរួមទទួលបានប្រយោជន៍ និងចំណេះល្អៗពីវាគ្មិនផងដែរ។ នេះជាការលើកឡើងរបស់លោក ម៉ៅ ស្រេង នាយក IDP Education ប្រចាំប្រទេសកម្ពុជា។
លោក ម៉ៅស្រេង មានប្រសាសន៍ក្នុងសន្និសីទសារព័ត៌មានកាលពីថ្ងៃទី ៧ វិច្ឆិកា នៅសណ្ឋាគារសុខាភ្នំពញថា៖ «សន្និបាតបញ្ញវន្តពិភពលោកនៅឆ្នាំ២០១៧នេះ ការរៀបចំមានរយៈពេលពីរថ្ងៃ ដោយនៅក្នុងនោះរួមមានការតាំងពិព័រណ៍ការសិក្សានៅក្រៅប្រទេស ហើយពិសេសជាងនេះប្រធានបទ ដែលយើងជ្រើសរើសយកមកជជែកគ្នាមានលក្ខណៈល្អ និងទូលំទូលាយទាំងក្នុង និងក្រៅប្រទេស ហើយយើងសង្ឃឹមថា នឹងមានអ្នកចូលរួមច្រើនជាងឆ្នាំមុនៗ»។
លោកបន្តថា៖ « សន្និបាតបញ្ញវន្តពិភពលោក ផ្តល់ប្រយោជន៍ច្រើនដល់អ្នកចូលរួម និងបញ្ញវន្ត ។ ដូចនេះខ្ញុំយល់ថា ចំណេះដែលទទួលបានពីការចូលរួមនៅក្នុងសន្និបាតបញ្ញវន្តពិភពលោកនេះ វាពិបាកនឹងទទួលបានពីសាលា ព្រោះអ្នកដែលចូលរួមសុទ្ធតែអ្នកមានបទពិសោធន៍ច្រើន មានជំនាញ និងអ្នកខ្លះជាថ្នាក់ដឹកនាំនៅក្នុងជួរាជរដ្ឋាភិបាល ដែលផ្តល់ឱកាសពិសេសសដល់អ្នកចូលរួម ដើម្បីទទួលបានប្រយោជន៍ពីកម្មវិធីនេះ»។
លោកបន្តថា តំណាងក្រុមហ៊ុនឧបត្ថម្ភបានលើកឡើងថា មូលហេតុដែលបណ្តាក្រុមហ៊ុនសម្រេចចិត្តគាំទ្រដល់សន្និបាតបញ្ញវន្តពិភពលោកលើកទី៣ឆ្នាំនេះ ដោយសារតែ សន្និបាតនេះប្រមូលផ្តុំទៅដោយបញ្ញវន្តដែលបានរៀនចប់មកពីប្រទេសផ្សេងៗគ្នា មកជជែក ឬចែករំលែកនូវបទពិសោធន៍ ក៏ដូចជាចំណេះដឹងដែលធ្លាប់ឆ្លងកាត់។លើសពីនេះសន្និបាតបញ្ញវន្តនេះមានលក្ខណៈល្អជាងកម្មវិធីផ្សេងៗ ព្រោះកម្មវិធីនេះមិនត្រឹមតែប្រមូលផ្តុំអ្នកមកពីវិស័យអប់រំនោះទេ ថែមទាំងប្រមូលផ្តុំបញ្ញវន្តមកពីវិស័យផ្សេងមកជួបជុំគ្នាផងដែរ។
យោងតាមសេចក្តីប្រកាសព័ត៌មានឱ្យដឹងថាសន្និបាតមានការរៀបចំជាអង្គវេទិកាជជែកពិភាក្សា ព្រមជាមួយនឹងសំណួរចម្លើយលើប្រធានបទនានាដែលផ្តោតជាសំខាន់លើបញ្ហាដែលទាក់ទងនឹងប្រទេសកម្ពុជា។ ប្រធានបទនេះនឹងគ្របដណ្តប់លើបញ្ហាពាក់ព័ន្ធលើគ្រប់វិស័យជាមួយអ្នកតំណាង ដែលចូលរួមក្នុងការពិភាក្សានេះ។
ប្រធានបទសំខាន់ៗគឺមានដូចជា ៖ The Future of Agribusiness, Business Communications in the Digital Age, Domestic v International Business: Profits and Pitfalls, Attraction and Retention: Is there more to life than money?, Innovation-Driven Leadership, Cambodia’s Rising Stars, Trendsetters: The Race for Emerging Consumer Markets, Why is CSR good for business?, Rise of Creative Industries, Rise of Intra-Regional Travel, Cambodia Property: Boom or Bust?, and Labour Mobility: Blessing or Curse?។
គួររំលឹកថាសន្និបាតបញ្ញវន្តពិភពលោកឆ្នាំនេះមានការចូលរួមពីវាគ្មិនកិត្តិយសដូចជាឯកឧត្ដម ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកឧត្ដមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា៕
ចែករំលែកព័តមាននេះ