រាជធានីភ្នំពេញ ៖ លោកប្រាក់ សុវណ្ណារ៉ា គ្រូបង្គោលក្រុមជម្រើសជាតិកម្ពុជា បានមានប្រសាសន៍ក្នុងសន្និសីទសារព័ត៌មាន នៅពហុកីឡដ្ឋានជាតិអូឡាំពិកកាលពីព្រឹកថ្ងៃទី៨ វិច្ឆិកា ថា សម្រាប់ការជួបប្រកួតជាមួយក្រុមជម្រើសជាតិមីយ៉ានម៉ា…
រាជធានីភ្នំពេញ ៖ លោកប្រាក់ សុវណ្ណារ៉ា គ្រូបង្គោលក្រុមជម្រើសជាតិកម្ពុជា បានមានប្រសាសន៍ក្នុងសន្និសីទសារព័ត៌មាន នៅពហុកីឡដ្ឋានជាតិអូឡាំពិកកាលពីព្រឹកថ្ងៃទី៨ វិច្ឆិកា ថា សម្រាប់ការជួបប្រកួតជាមួយក្រុមជម្រើសជាតិមីយ៉ានម៉ា នៅល្ងាចនេះ ក្រុមជម្រើសជាតិកម្ពុជា ក៏គិតរឿងលទ្ធផលដែរ ទោះបីប្រកួតក្នុងលក្ខណៈមិត្តភាពកម្ដៅសាច់ដុំក្ដី ។
លោកប្រាក់ សុវណ្ណារ៉ា បានបញ្ជាក់ថា ក្រុមរបស់លោកបានត្រៀមខ្លួនយ៉ាងល្អសម្រាប់ការប្រកួតនៅល្ងាចថ្ងៃទី៩ វិច្ឆិកា ។ នេះជាការប្រកួតមួយដែលកីឡាករទាំងអស់ត្រូវបញ្ចេញសមត្ថភាពឱ្យអស់ ដើម្បីទទួលក្រុមជម្រើសជាតិហ្សកដានី ដែលជាការប្រកួតផ្លូវការ ។ ចំពោះលទ្ធផលវិញលោកក៏ត្រូវគិតផងដែរ ទោះបីមីយ៉ាន់ម៉ា និងកម្ពុជា យកការប្រកួតនេះជាការប្រកួតកម្ដៅសាច់ដុំត្រៀមប្រកួតAFC Asian Cupដូចគ្នាដោយក្រុមកម្ពុជាត្រូវទទួលក្រុមហ្សកដានី បន្ទាប់ពីការប្រកួតនេះទៅ។
លោកបានឱ្យដឹងទៀតថា សម្រាប់ការប្រកួតលើកនេះ ក្រុមទាំងពីរមិនសូវចាប់អារម្មណ៍ពីរឿងលទ្ធផលប៉ុន្មានទេ ។ ប៉ុន្តែលោកគិតថា ជាការប្រកួតមួយដ៏ល្អ ព្រោះយើងមានឱកាស ស្វែងរកបទពិសោធន៍ ក៏ដូចជាបានកម្ដៅសាច់ដុំត្រៀមប្រកួតជាមួយក្រុមជម្រើសជាតិហ្សកដានី ជើងទី២ ក្នុងវគ្គជម្រុះ AFC Asian Cup ដែលនឹងត្រូវធ្វើឡើងនៅលើទីលានពហុកីឡដ្ឋានជាតិនាល្ងាចថ្ងៃទី១៤ វិច្ឆិកា ខាងមុខនេះ ។ លោកថា ក្រុមទាំងពីរធ្លាប់ជួបគ្នាជាច្រើនដងរួចមកហើយក្នុងរយៈពេល២០ឆ្នាំមកនេះ ប៉ុន្តែកម្ពុជាធ្លាប់យកឈ្នះមីយ៉ានម៉ាតែម្ដងគត់ដោយលទ្ធផល៣-១ កាលពីឆ្នាំ១៩៩៧ ក្នុងព្រឹត្តិការណ៍កីឡាស៊ីហ្គេមនៅទីក្រុងហ្សាការតាប្រទេសឥណ្ឌូណេស៊ី។ ចំណែកការប្រកួតលើកនេះលោកមិនសង្ឃឹមឈ្នះប៉ុន្មានទេ ប៉ុន្តែក្រុមរបស់លោកនឹងប្រឹងប្រែងឱ្យអស់ពីសមត្ថភាពដើម្បីបំពេញចិត្តអ្នកគាំទ្រ ។
លោក ប្រាក់ សុវណ្ណារ៉ា បញ្ជាក់ថា លោកនឹងដាក់កីឡាករចំនួន២រូបដែលបានដកចេញពីក្រុមជម្រើសជាតិកាលពីពេលថ្មីៗកន្លងទៅនេះ គឺកីឡាករហួយ ផល្លីន និងកីឡាករច្រឹង ពលរដ្ឋ និងកីឡាករដែលមិនជាប់ជម្រើសជាតិចំនួន៧រូបឱ្យចូលលេង គឹកីឡាករសារ៉េត គ្រីយ៉ា មកពីក្លិបព្រះខ័នរាជ ស្វាយរៀង កីឡាករ អ៊ុក សុធី មកពីក្លិបភ្នំពេញក្រោន កីឡាករ តាំង សុភ័ក្ដ្រ មកពីក្លិបTiger កីឡាករ កែវ សុខង៉ន មកពីក្លិបភ្នំពេញក្រោន កីឡាករ រឹង ប៊ុនហៀង មកពីក្លិបក្រសួងការពារជាតិ កីឡាករ ស៊ិន កក្កដា មកពីក្លិបភ្នំពេញក្រោន និងកីឡាករ គួច សុកុម្ភះ មកពីក្លិបភ្នំពេញក្រោន ។ ក្រៅពីនោះលោកក៏នឹងដាក់បញ្ចូលកីឡាករក្មេងៗជាច្រើនរូបឱ្យចូលលេងផងដែរ។
ចំណែកលោក Gerd Zeise គ្រូជម្រើសជាតិមីយ៉ាន់ម៉ាបានថ្លែងថា បើទោះជាស្ថានភាពពេលនេះក្រុមជម្រើសជាតិកម្ពុជាមានការរីកចម្រើនច្រើនក៏ពិតមែន ម្យ៉ាងវិញទៀតទោះបីការប្រកួតលើកនេះជាលក្ខណៈមិត្តភាពក៏ដោយ ក៏ក្រុមរបស់លោកមកកម្ពុជាពេលនេះគឺដើម្បីឈ្នះតែប៉ុណ្ណោះ ។ យ៉ាងណាក៏ដោយគ្រូបង្វឹកជនជាតិអាល្លឺម៉ង់រូបនេះនិយាយថា វាមិនមែនជារឿងងាយស្រួលឡើយក្នុងការយកឈ្នះក្រុមម្ចាស់ផ្ទះកម្ពុជា ។ ប៉ុន្តែវាជារឿងល្អបំផុតសម្រាប់ក្រុមទាំងពីរដើម្បីត្រៀមខ្លួនប្រកួតជាផ្លូវការមកដល់ ព្រោះក្រុមរបស់លោកក៏ត្រូវត្រៀមប្រកួតជាមួយក្រុមឥណ្ឌា ៕
ចែករំលែកព័តមាននេះ