រាជធានីភ្នំពេញ ៖ ក្នុងដំណាក់កាលបច្ចេកវិទ្យាកាន់តែរីកចម្រើនឥតឈប់ឈរ ឬយុគ សម័យបដិវត្តន៍ឧស្សាហកម្មទី៤ បាននាំមកនូវកាលានុវត្តភាព និងបញ្ហាប្រឈម ។ បញ្ហាប្រឈមធំៗនៃយុគសម័យបច្ចេកវិទ្យារីកចម្រើននេះ នឹងធ្វើឱ្យអ្នកមានជំនាញទាបនៅតាមប្រទេសជាសមាជិកអាស៊ាន…
រាជធានីភ្នំពេញ ៖ ក្នុងដំណាក់កាលបច្ចេកវិទ្យាកាន់តែរីកចម្រើនឥតឈប់ឈរ ឬយុគ សម័យបដិវត្តន៍ឧស្សាហកម្មទី៤ បាននាំមកនូវកាលានុវត្តភាព និងបញ្ហាប្រឈម ។
បញ្ហាប្រឈមធំៗនៃយុគសម័យបច្ចេកវិទ្យារីកចម្រើននេះ នឹងធ្វើឱ្យអ្នកមានជំនាញទាបនៅតាមប្រទេសជាសមាជិកអាស៊ាន បាត់បង់ការងាររបស់ខ្លួន ដែលបង្កឡើងដោយការធ្វើស្វ័យប្រវត្តិកម្ម និងភាពកាន់តែទំនើបជឿនលឿននៃបច្ចេកវិទ្យា។ នេះបើយោងតាមរបាយការណ៍របស់ធនាគារអភិវឌ្ឍន៍អាស៊ី(ADB) ចេញផ្សាយកាលពីថ្ងៃទី៧ វិច្ឆិកា កន្លងមក ។
របាយការណ៍គូសបញ្ជាក់ថា ៖« ការងារដដែលៗ ប្រើជំនាញកម្រិតទាប ដូចជា កម្មករក្នុងខ្សែសង្វាក់ផលិតកម្មផ្នែកបង្គុំ គឺជាអ្នកងាយប្រឈមនឹងហានិភ័យ ។ លើសពីនេះ ការងារផ្តល់សេវា ក៏កាន់តែទទួលរងការគំរាមកំហែងផងដែរ » ។
របាយការណ៍លើកឡើងថា ដើម្បីឆ្លើយតបបន្ទាន់ទៅនឹងការរីកចម្រើននៃបច្ចេកវិទ្យានេះ ត្រូវផ្តល់លទ្ធភាពឱ្យកម្មករគ្មានជំនាញអាចបង្កើនកម្រិតជំនាញរបស់ខ្លួន ។ វានឹងជួយទប់ទល់បញ្ហាគ្មានការងារធ្វើនៅតាមប្រទេសបញ្ជូនពលករ ក៏ដូចជាជួយធ្វើឱ្យកំណើនសម្រេចបានក្នុងប្រទេសទទួលពលករ បន្តនិរន្តរភាពទៅមុខទៀត ។ ជាមួយគ្នានេះ ក៏អាចជួយកាត់បន្ថយបញ្ហាវិសមភាពសេដ្ឋកិច្ចដែលកំពុងបន្តកើនឡើងរវាងតំបន់និងតំបន់ ឬរវាងប្រទេសមួយនិងប្រទេសមួយទៀត ។
លើសពីនេះ ការផ្លាស់ប្តូរក្នុងល្បឿនលឿនបែបនេះ តម្រូវឱ្យផ្តល់ការបណ្តុះបណ្តាល និងឱកាសរៀនសូត្រពេញមួយជីវិតដល់មនុស្សពេញវ័យ ពោលគឺមិនត្រឹមតែជាការអប់រំក្នុងវ័យដំបូងៗនៃជីវិតប៉ុណ្ណោះទេ ។
លោកជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ ធ្លាប់មានប្រសាសន៍ថា ៖« មុខវិជ្ជាបច្ចេកវិទ្យានេះ បើសិនជាក្មេង [និស្សិត] ចេះមានគំនិតច្នៃប្រឌិត និងវាងវៃបន្ថែមបន្តិចនោះ ឱកាសទទួលបានការងារស្រួលរកមែនទែន ព្រោះនៅគ្រប់កន្លែងការងារនិងអាជីវកម្ម គឺប្រើប្រាស់បច្ចេកវិទ្យា ។ នៅពេលឆាប់ៗនេះ យើងនឹងបើកមជ្ឈមណ្ឌលមួយដើម្បីភ្ជាប់នឹងជំនាញរបស់ខ្លួន ធ្វើយ៉ាងម៉េច ងាយស្រួលរកការងារ » ។
លោកសាកលវិទ្យាធិការបញ្ជាក់ថា ៖«សម្រាប់និស្សិតរៀនមុខវិជ្ជា IT បន្ទាប់ពីខ្ញុំចូលមកកាន់នៅទីនេះរយៈពេល៣ឆ្នាំ គឺអត់មានការធ្លាក់ចុះទេ បើទោះបីនៅឆ្នាំប្រឡងបាក់ឌុបដែលក្រសួងអប់រំរឹតបន្តឹងខ្លាំង ហើយសិស្សធ្លាក់ច្រើនក្តីក៏សាលាទទួលបាននិស្សិតចូលរៀនច្រើនដែរ ។ អីចឹង ជំនាញនេះមានប្រជាប្រិយភាព ហើយសាលាផ្សេងទៀត ក៏ទទួលបានច្រើនដូចគ្នាដែរ » ។
នៅក្នុងវេទិកាសេដ្ឋកិច្ចពិភពលោក ស្តីពីអាស៊ាននៅកម្ពុជា កាលពីដើមឆ្នាំនេះ ប្រធានបទនៃការជំរុញកំណើនសេដ្ឋកិច្ចតាមបែបច្ចេកវិទ្យា ត្រូវបានលើកឡើង និងផ្តោតយ៉ាងស៊ីជម្រៅ ដែលបរិបទពិភពលោក បានហៅសេដ្ឋកិច្ចបច្ចុប្បន្នថា ជាសេដ្ឋកិច្ចបច្ចេកវិទ្យា ដែលជាបដិវត្តន៍ឧស្សាហកម្មដំណាក់កាលទី៤ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថាដោយសារការនាំមកនូវបច្ចេកវិទ្យា ចំណេះដឹង និងបទពិសោធន៍ថ្មីៗពីវិនិយោគិន និងអ្នកជំនាញមកពីបរទេស បានផ្តល់ផលចំណេញដល់កម្ពុជាទាំងលើទុន និងចំណេះដឹង ដែលកម្ពុជាត្រូវរៀនសូត្របន្ថែមទៀត ៕
ចែករំលែកព័តមាននេះ