បទពាក្យ ប្រាំបី (សូត្របែប ប្រជាប្រិយ ចំអក ចងកំហឹង)
១- ស្លាបព្រាចោះចង បន្ដោងពាក់ក អង្រឹងបាវល្អ ខ្សែព្រ័ទ្ធវេញថ្មី
បង្គីល្អះល្អង ក្រងពីឬស្សី ដងរ៉ែកគ្មានបី ឬស្សីសិតសម ។
២- ចបមុខសរស្ងាច ដងដើមដៃខ្លា ខាត់យ៉ាងសង្ហារ ត្បូងមានចង្កំ
ចានកំសៀវមួយ កាម៉ែលមួយផ្សំ នេះហៅថាហំ សមអ្នកមានទ្រព្យ ។
៣- អាវខ្មៅមានមួយ ឡេវច្រើនជាងហារ ដេរភ្ជាប់តគ្នា សមភ្នែកគួរគាប់
ខោរិតកៅស៊ូរ ខ្សែរចងផ្សំជាប់ ស្បែកជើងទ្រនាប់ កាត់ពីកង់ឡាន ។
៤- ក្រម៉ាកញ្ចាស់ បំណះជាងរយ ថង់ខ្សាច់ថែមមួយ មួកស្លឹកហំហាន
ចង្កៀងខ្លាញ់ត្រី គ្មានអ្វីប្រៀបបាន នេះហៅថាមាន ដល់មហាសម្បត្ដិ ។
៥- ទ្រព្យទាំងអស់នេះ ថ្លៃជាងជីវិត ត្រូវនៅជាប់និត្យ ពុំអាចបាត់ស្ងាត់
ឃ្លាតគ្នាពេលណា ពេលនោះម្ចាស់ខ្ចាត់ អង្គការស្វែងស្វាត់ រកដាក់ម្ចាស់ថ្មី ។
៦- មនុស្សស្លាប់ងាប់ចុះ របស់នៅមាំ មិត្ដបងយើងនាំ មិនបាច់និយាយ
ចែកអោយយើងប្រើ មិត្ដតាមិត្ដយាយ មិត្ដម៉ែមីងក្ដី កុំគិតតវ៉ា ។
៧- ស្លាបព្រាអង្រឹង ចបនិងបង្គី ម្ដេចគេគិតគ្នេរ ថ្លៃជាងសង្ខារ
ថោកអីថោកម្លេះ ជីវិតប្រជា នេះឬអង្គការ ហៅមហាលោតផ្លោះ ។
សិរីសោភ័ណ ០២ តុលា ២០០៨
ម៉ោង ០៣:០៥ ល្ងាច
ឃុត ណារិនកាន់បូ
ចែករំលែកព័តមាននេះ