ទីក្រុងរីយ៉ាដ ៖ កាលពីថ្ងៃចន្ទ តម្លៃប្រេងបានកើនដល់កម្រិតខ្ពស់ជាងគេក្នុងរយៈពេលជាង២ឆ្នាំមកនេះ ខណៈរាជបុត្ររបស់ប្រទេសអារ៉ាប៊ីសាអូឌីត ចេញវិធានការដោះស្រាយបញ្ហាអំពើពុករលួយ ។
តម្លៃប្រេងបានកើនដល់កម្រិតខ្ពស់តាំងពីខែកក្កដា ឆ្នាំ២០១៥មកម្ល៉េះ ខណៈវិធានការរបស់រាជបុត្រ Mohammed bin Salman បង្កឲ្យមានការចាប់ខ្លួនគ្រួសាររាជវង្ស រដ្ឋមន្ត្រី វិនិយោគិន និងមហាសេដ្ឋីធំៗដូចជា រាជបុត្រ Alwaleed bin Talal ។ ព័ត៌មាននេះបង្កការព្រួយបារម្ភថា ថវិកាមកពីមជ្ឈិមបូព៌៌ាអាចនឹងដកពីទីផ្សារហិរញ្ញវត្ថុ ។
តម្លៃប្រេងរបស់ Brent បានកើនឡើងជិត១% មកស្មើ៦២,៤៩ដុល្លារក្នុង១ធុង ខណៈតម្លៃប្រេងអាមេរិកកើនឡើង០,៥% មកស្មើ៥៥,៩១ដុល្លារក្នុង១ធុង ។
រាជបុត្រ Alwaleed គឺជាព្រះអនុជរបស់ព្រះរាជា និងជាម្ចាស់ក្រុមហ៊ុន Kingdom Holding បានវិនិយោគក្នុងក្រុមហ៊ុនជាច្រើនដូចជា CitiGroup និង Twitter ជាដើម ។
ឧត្តមមន្ត្រី៣រូបបាននិយាយកាលពីថ្ងៃសុក្រថា រដ្ឋមន្ត្រី៤រូប និងអតីតរដ្ឋមន្ត្រី១០រូប គឺត្រូវបានជាប់ឃុំ ។
លោក Jason Tuvey សេដ្ឋវិទូក្នុង Capital Economics និយាយថា ៖« ការប្រមូលអំណាចដោយរាជបុត្រ Mohammed bin Salman ធ្វើឲ្យរាជាណាចក្រងាកចេញពីការបង្កើតគោលនយោបាយជាឯកច្ឆន្ទ ។ ហានិភ័យធំជាងគេ គឺការប្រឆាំងរាជបុត្រដោយអ្នកមានអំណាចទាំងនេះ និងបង្កការលំបាកដល់ប្រទេសទាំងមូល » ៕
ចែករំលែកព័តមាននេះ