រាជធានីភ្នំពេញ ៖ នៅក្នុងពិភពលោក ដំឡូងមីត្រូវបានគេទទួលស្គាល់ថា ជាកសិផលប្រចាំសតវត្សរ៍ទី២១ ដែលបានដាំដុះរាប់តាំងពីលក្ខណៈគ្រួសារ រហូតដល់ការនាំចេញទ្រង់ទ្រាយធំ ដើម្បីបម្រើឧស្សាហកម្មម្ហូបអាហារ និងការផលិតប្រេងឥន្ធនៈអេតាណុល ។ នៅថ្ងៃអនាគត ដំឡូងមីនឹងមានតម្រូវការខ្ពស់ទាំងនៅក្នុងតំបន់ និងពិភពលោក។ នេះបើតាមការលើកឡើងរបស់មន្ត្រីជាន់ខ្ពស់ក្រសួងពាណិជ្ជកម្ម ។
ថ្លែងក្នុងទិវាដំឡូងមីលើកទី២ ដែលប្រារព្ធធ្វើនៅខេត្តប៉ៃលិនកាលពីថ្ងៃទី៧ វិច្ឆិកា ម្សិលមិញ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា និន្នាការ និងការរំពឹងទុកនៃតម្រូវការដំឡូងមីសម្រាប់ទីផ្សារក្នុងតំបន់ និងពិភពលោក នឹងមានកំណើនកាន់តែខ្ពស់ ដែលនេះគឺជាកាលានុវត្តភាពថ្មីសម្រាប់កម្ពុជា ដើម្បីអភិវឌ្ឍន៍សង្វាក់តម្លៃដំឡូងមី តាមរយៈការពង្រឹង និងពង្រីកផលិតកម្ម ការកែច្នៃចំណិតដំឡូងមី និងសមត្ថភាពនាំចេញ សំដៅឆ្លើយតបតម្រូវការទីផ្សារនាពេលអនាគត ។
« ដើម្បីចាប់យកកាលានុវត្តភាពនេះ កម្ពុជាចាំបាច់ត្រូវវិនិយោគបន្ថែម និងការឯកភាពជាធ្លុងមួយរវាងរដ្ឋាភិបាល និងភាគីពាក់ព័ន្ធ ដើម្បីដោះស្រាយបញ្ហាប្រឈម និងហានិភ័យនានាដូចជា ភាពទន់ខ្សោយនៃខ្សែសង្វាក់តម្លៃ កង្វះព័ត៌មានទីផ្សារ ការផ្គត់ផ្គង់មិនទៀងទាត់ និងគុណភាពប្រែប្រួលនៃដំឡូងមី ដែលជាកត្តារាំងស្ទះដល់ការលូតលាស់នៃឧស្សាហកម្មដំឡូងមីនៅកម្ពុជា » ។ នេះបើតាមការបញ្ជាក់របស់លោករដ្ឋមន្ត្រី ។
ថ្លែងនាឱកាសនោះដែរ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកយកកំណើនការដាំដុះ និងសក្តានុពលដំឡូងមី ដែលជាដំណាំយុទ្ធសាស្ត្ររបស់កម្ពុជា ព្រមទាំងកត្តាប្រឈមមួយចំនួនដែលទាមទារឲ្យមានគោលនយោបាយជាក់លាក់ និងស៊ីជម្រៅ ស្របតាមមូលដ្ឋាននៃការអភិវឌ្ឍបៃតង ដែលមានការចូលរួមពីគ្រប់ភាគីពាក់ព័ន្ធដូចជា គ្រឹះស្ថានអប់រំកសិកម្ម អង្គការក្រៅរដ្ឋាភិបាល និងវិស័យឯកជន ជាដើម ។
លោករដ្ឋមន្ត្រីថ្លែងថា ៖« កម្ពុជា គឺជាប្រទេសផលិតដំឡូងមីលំដាប់ទី៨លើពិភពលោក និងលំដាប់ទី៤នៅក្នុងតំបន់ ។ ការអនុវត្តគោលនយោបាយយុទ្ធសាស្ត្រ និងកម្មវិធីពាក់ព័ន្ធតាមវិស័យនានា តម្រង់ឆ្ពោះទៅរកទីផ្សារក្នុងបណ្តាឆ្នាំកន្លងមក បានជួយជំរុញកំណើននាំចេញកសិផលកម្ពុជាទៅកាន់ទីផ្សារក្នុងតំបន់ និងពិភពលោក ក្នុងល្បឿនមួយគួរជាទីមោទនៈ » ។
ប្រទេសកម្ពុជា ការដាំដុះដំឡូងមីបានរីកចម្រើនយ៉ាងគំហុក ចាប់ពី១៦ពាន់ហិកតានៅក្នុងឆ្នាំ២០០០ ដល់ទៅជាង៦០០ពាន់ហិកតា ហើយបានផ្តល់ទិន្នផលសរុប១៣លានតោនកាលពីឆ្នាំ២០១៦ ប៉ុន្ដែវិស័យមួយនេះនៅតែមានបញ្ហាប្រឈមនៅឡើយ ពិសេសគឺបញ្ហាទីផ្សារ និងតម្លៃ ។ ដោយមើលឃើញនូវឱកាស និងបញ្ហាប្រឈមទាំងនេះ លោករដ្ឋមន្ត្រីក្រសួងពាណិជ្ជកម្មបានអំពាវនាវដល់វិស័យឯកជន និងស្ថាប័នពាក់ព័ន្ធ បង្កើនការវិនិយោគលើការអភិវឌ្ឍសង្វាក់តម្លៃដំឡូងមី ដើម្បីធានានិរន្តរភាពពាណិជ្ជកម្មដំឡូងមីនៅកម្ពុជា ។
ថ្លែងនៅក្នុងពិធីសម្ពោធជាផ្លូវការនៃ «វេទិកាធុរកិច្ច និងវិនិយោគដំឡូងមី» ដែលរៀបចំឡើងកាលពីព្រឹកថ្ងៃទី៦ វិច្ឆិកា នៅឯមជ្ឈមណ្ឌលសន្និសីទសុខាអង្គរ ខេត្តសៀមរាប លោក ប៉ាន សូរស័ក្ដិ បានមានប្រសាសន៍ថា ដំឡូងមី គឺជាពាណិជ្ជកម្មដ៏សំខាន់ និងមានសក្តានុពលបំផុត ដែលអាចបង្កើតការងារពហុវិស័យជូនប្រជាពលរដ្ឋ និងនាំមកនូវប្រាក់ចំណូលយ៉ាងច្រើនសម្រាប់សេដ្ឋកិច្ចជាតិ ។
លោកថ្លែងថា ៖« វាតម្រូវឱ្យមានការវិនិយោគកាន់តែច្រើនពីវិស័យឯកជន និងភាគីពាក់ព័ន្ធលើខ្សែសង្វាក់តម្លៃ រាប់តាំងពីវិទ្យាស្ថានស្រាវជ្រាវ និងអភិវឌ្ឍន៍កសិកម្ម, ក្រុមហ៊ុនផលិតជី និងគ្រាប់ពូជ, អ្នកផលិត និងកែច្នៃម្ហូបអាហារ, ភ្នាក់ងារផ្សព្វផ្សាយទីផ្សារ និងជំរុញការនាំចេញ ព្រមទាំងក្រុមហ៊ុនភ័ស្តុភារ និងដឹកជញ្ជូន » ។
បន្ថែមលើសនេះ លោករដ្ឋមន្ត្រីបានគូសបញ្ជាក់អំពីទំនាក់ទំនងរវាងពាណិជ្ជកម្ម និងការវិនិយោគ និងបានបង្ហាញអំពីដំណោះស្រាយសមស្របចំពោះការផ្លាស់ប្តូរចំនួន៣ ដែលកម្ពុជាកំពុងប្រឈមសព្វថ្ងៃនៅក្នុងវិស័យដំឡូងមី រួមមាន ៖
១-ការកើនឡើងយ៉ាងឆាប់រហ័សរបស់ប្រទេសកម្ពុជា និងរបៀបដែលកម្ពុជាអាចទាញយកផលប្រយោជន៍ពាណិជ្ជកម្ម និងលំហូរវិនិយោគ ដើម្បីពន្លឿនកំណើនលូតលាស់ និងការអភិវឌ្ឍនៅក្នុងសេដ្ឋកិច្ចពិភពលោក ។
២-របៀបដែលពាណិជ្ជកម្ម និងការវិនិយោគ ត្រូវបានផ្សារភ្ជាប់គ្នាកាន់តែខ្លាំងឡើងនៅក្នុងសេដ្ឋកិច្ចដំឡូងមី ។
៣-របៀបដោះស្រាយបញ្ហាប្រឈមចេញពីទស្សនវិស័យគោលនយោបាយ ។
លោក នីក ប៊ឺរេសហ្វត (Nick Beresford) នាយកកម្មវិធីអភិវឌ្ឍន៍សហប្រជាជាតិ (UNDP) បានមានប្រសាសន៍ថា ផលិតកម្មដំឡូងមីបានកើនឡើងយ៉ាងឆាប់រហ័ស ដោយសារតែមានតម្រូវការខ្ពស់ពីទីផ្សារសកល ដើម្បីកែច្នៃជាផលិតផលសម្រេចផ្សេងៗ។ កត្តានេះ បានផ្តល់នូវប្រភពកំណើនថ្មីសម្រាប់កម្ពុជា ឱកាសសម្រាប់អភិវឌ្ឍន៍តំបន់ជនបទ និងការបង្កើនប្រាក់ចំណូលប្រជាពលរដ្ឋដែលមិនត្រឹមតែសម្រាប់ឧស្សាហកម្មទេ ប៉ុន្តែក៏សម្រាប់គ្រួសារកសិករដែលមានប្រាក់ចំណូលទាបផងដែរ ។
«យើងមើលឃើញករណីអាជីវកម្មច្បាស់លាស់មួយសម្រាប់ការវិនិយោគវិស័យឯកជនលើដំឡូងមីនៅក្នុងប្រទេសកម្ពុជា ដែលផ្តល់តម្លៃប្រកួតប្រជែងខ្ពស់សម្រាប់ដំឡូងមីឆៅ និងកែច្នៃ ។ ប្រទេសនេះសម្បូរដីមានជីវជាតិ អាចផលិតបានដំឡូងមី២០តោនក្នុង១ហិកតា ខ្ពស់ជាងឧស្សាហកម្មស្តង់ដាទាំង១២ផ្សេងទៀត»។ នេះបើតាមលោក នីក ប៊ឺរេសហ្វត បានគូសបញ្ជាក់ ។
លោកនាយកអង្គការ UNDP ក៏បានសង្កត់ធ្ងន់ពីតួនាទីសំខាន់របស់រាជរដ្ឋាភិបាលកម្ពុជា ជាពិសេស ក្រសួងពាណិជ្ជកម្ម ក្នុងការផ្តល់នូវបរិយាកាសចាំបាច់សម្រាប់កាត់បន្ថយហានិភ័យ និងស្រូបទាញការវិនិយោគឯកជនកម្រិតខ្ពស់ ដូចជា ការបង្កើតគោលនយោបាយច្បាស់លាស់ និងការវិនិយោគសាធារណៈនៅក្នុងវិស័យសំខាន់ៗដើម្បីតភ្ជាប់កសិករ និងក្រុមហ៊ុនឯកជន ជាមួយកាលានុវត្តភាពសេដ្ឋកិច្ច ។
យោងតាមទិន្នន័យក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ការនាំចេញផលិតផលដំឡូងមីកម្ពុជា ត្រូវបានពង្រីកទីផ្សារពី៤ប្រទេសក្នុងឆ្នាំ២០១៤ ទៅ១៦ប្រទេសក្នុងឆ្នាំ២០១៦ ។
ទិន្នន័យដដែលបញ្ជាក់ថា ការនាំចេញផលិតផលដំឡូងមី (ដំឡូងមីស្រស់, ចំណិតដំឡូងមីក្រៀម និងម្សៅដំឡូងមី) បានកើនឡើងពី០,២២លានតោនក្នុងឆ្នាំ២០១២ ដល់ជាង៣,៦លានតោនក្នុងឆ្នាំ២០១៦ ។ ចំណែកនៅក្នុងរយៈពេល៩ខែដើមឆ្នាំ២០១៧ ការនាំចេញដំឡូងមី សម្រេចបានជាង១,៨លានតោន ៕
ចែករំលែកព័តមាននេះ