ខណៈពេលដែលមនុស្សគ្រប់គ្នាដឹងអំពីបញ្ហាកង្វះអាហារូបត្ថម្ភអាចបណ្តាលឱ្យមានជំងឺជាច្រើនដល់រាងកាយ ប៉ុន្តែមានមនុស្សតិចបំផុតដឹងពីការទាក់ទងយ៉ាងខ្លាំងក្លារវាងអាហារូបត្ថម្ភ និងជំងឺបាក់ទឹកចិត្ត ។ យើងសន្មតខុសថាជំងឺបាក់ទឹកចិត្តមានមូលហេតុដោយសារផ្លូវចិត្តតែប៉ុណ្ណោះ ។
ទោះជាយ៉ាងណាក្តី ការសិក្សាជាច្រើនបានរកឃើញថាអាហារូបត្ថម្ភពិតជាដើរតួនាទីយ៉ាងសំខាន់ក្នុងការចាប់ផ្តើមនៃជំងឺបាក់ទឹកចិត្តរួមជាមួយនឹងភាពធ្ងន់ដែលវាអាចកើតឡើង ។ អ្នកជំនាញបានរកឃើញថាកង្វះអាហារូបត្ថម្ភទាំង៥ប្រភេទនេះអាចបណ្តាលឱ្យកើតជំងឺបាក់ទឹកចិត្ត ។
១-កង្វះជាតិដែក
ការសិក្សាជាច្រើនបានរកឃើញថាស្ត្រីងាយនឹងមានជំងឺបាក់ទឹកចិត្តជាងបុរស ។ នេះដោយសារតែជំងឺស្លេកស្លាំងទូទៅកើតឡើងចំពោះស្ត្រីដែលមានអាយុចាប់ពី២៥ដល់៤៥ឆ្នាំ ។ កង្វះជាតិដែកត្រូវបានគេដឹងថាបណ្តាលឱ្យមានជំងឺបាក់ទឹកចិត្ត និងអស់កម្លាំង ។
២-ស័ង្កសី
ក្នុងរយៈពេលប៉ុន្មានទសវត្សចុងក្រោយនេះ ការសិក្សាយ៉ាងហោចណាស់៥បានសន្និដ្ឋានថាជាតិស័ង្កសីមានកម្រិតទាបចំពោះអ្នកជំងឺដែលមានជំងឺបាក់ទឹកចិត្ត ។ វាត្រូវបានគេសង្កេតបន្ថែមទៀតថាថ្នាំគ្រាប់ស័ង្កសីអាចធ្វើឱ្យការព្យាបាលដោយប្រើប្រាស់ថ្នាំប្រឆាំងនឹងជំងឺបាក់ទឹកចិត្តមានប្រសិទ្ធភាពកាន់តែប្រសើរ ។ ចំណុចសំខាន់មួយទៀតគឺជាតិស័ង្កសីក៏ការពារកោសិកាខួរក្បាលប្រឆាំងនឹងការបំផ្លាញ ដោយរ៉ាឌីកាល់សេរី ។
៣-អាស៊ីតហ្វូលិក
វេជ្ជបណ្ឌិតជាច្រើនបានសង្កេតឃើញថាអ្នកដែលមានជំងឺបាក់ទឹកចិត្តមានកម្រិតអាស៊ីតហ្វូលីក២៥%ទាបជាងមនុស្សដែលមានសុខភាពល្អ ។ ប្រសិនបើអ្នកលេបថ្នាំប្រឆាំងនឹងជំងឺបាក់ទឹកចិត្ត និងមានកង្វះជាតិអាស៊ីតហ្វូលិក អ្នកស្រាវជ្រាវនិយាយថាអ្នកជំងឺនឹងទទួលបានលទ្ធផលមិនល្អពីការព្យាបាលនេះ។ ប៉ុន្តែការទទួលទានអាស៊ីតហ្វូលិក៥០០មីលី្លក្រាមជាមួយនឹងថ្នាំប្រឆាំងនឹងជំងឺបាក់ទឹកចិត្ត អ្នកស្រាវជ្រាវនិយាយថាវានឹងបង្កើនប្រសិទ្ធភាពរបស់ថ្នាំនេះ ។
៤-ប្រូតេអ៊ីន
ការទទួលទានប្រូតេអ៊ីនគឺមិនត្រឹមតែមានសារសំខាន់សម្រាប់រាងកាយប៉ុណ្ណោះទេ ប៉ុន្តែក៏ជួយដល់មុខងារខួរក្បាលរបស់អ្នក និងសុខភាពផ្លូវចិត្តផងដែរ ។ ដោយសារតែសរសៃប្រសាទជាច្រើននៅក្នុងខួរក្បាលត្រូវបានផលិតចេញពីអាស៊ីតអាមីណូដែលត្រូវបានរកឃើញនៅក្នុងប្រូតេអ៊ីន ។ ប្រសិនបើអ្នកទទួលទានរបបអាហារមិនល្អ ហើយមិនទទួលបានជាតិប្រូតេអ៊ីនគ្រប់គ្រាន់ នោះអ្នកក៏កំពុងតែប្រឈមមុខនឹងការកើតជំងឺបាក់ទឹកចិត្តផងដែរ ។
៥-អាស៊ីតខ្លាញ់អូមេហ្គា៣
ខួរក្បាលរបស់អ្នកគឺជាផ្នែកមួយនៃសរីរាង្គដែលមានកម្រិតជាតិខ្លាញ់ខ្ពស់ ។ ខួរក្បាលពណ៌ប្រផេះមានអាស៊ីតខ្លាញ់៥០% ។ ការស្រាវជ្រាវជាច្រើនបានបង្ហាញថាអាស៊ីតខ្លាញ់អូមេហ្គា ៣ អាចកាត់បន្ថយរោគសញ្ញានៃជំងឺបាក់ទឹកចិត្ត និងធ្វើឲ្យអារម្មណ៍របស់មនុស្សមានភាពប្រសើរឡើង ៕
ចែករំលែកព័តមាននេះ