រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា (FFC) ត្រៀមរៀបចំការប្រកួតបាល់ទាត់ថ្នាក់ជាតិចំនួន៣ពានរង្វាន់នៅចុងខែវិច្ឆិក នេះ គឺការប្រកួតជ្រើសរើសជើងឯកយុវជនអាយុក្រោម១៤ឆ្នាំ ក្រោម១៦ឆ្នាំ និងការប្រកួតបាល់ទាត់នារីជ្រើសរើសជើងឯកប្រចាំឆ្នាំ២០១៧ ។
លោក ម៉ៃ តុលា អគ្គលេខាធិការស្ដីទីសហព័ន្ធកីឡាបាល់ទាត់កម្ពុជា បានឱ្យដឹងថាគោលបំណងសហព័ន្ធកីឡាបាល់ទាត់កម្ពុជារៀបចំឱ្យមានការប្រកួតបាល់ទាត់ជ្រើសរើសជើងឯកយុវជនអាយុក្រោម១៤ឆ្នាំ-១៦ឆ្នាំ និងបាល់ទាត់នារីនេះឡើង ដើម្បីឱ្យស្របនឹងកំណែទម្រង់ និងអភិវឌ្ឍកីឡាបាល់ទាត់ ឆ្ពោះទៅកាន់ការប្រកួតកីឡាស៊ីហ្គេមលើកទី៣២ ឆ្នាំ២០២៣ ពេលដែលកម្ពុជាធ្វើជាម្ចាស់ផ្ទះ ។
បើតាមសេចក្ដីជូនដំណឹងរបស់សហព័ន្ធកីឡាបាល់ទាត់កម្ពុជាឱ្យដឹងថា សម្រាប់ការប្រកួតបាល់ទាត់នារីដំណាក់កាលទី១នឹងត្រូវចាប់ផ្ដើមពីថ្ងៃទី២៦វិច្ឆិកា ដល់ថ្ងៃទី៣១ធ្នូ ឆ្នាំ២០១៧។ដំណាក់កាលទី២ចាប់ពីថ្ងៃទី១២ មករា ដល់ថ្ងៃទី១៤ មករា ឆ្នាំ២០១៨ ដែលមានកីឡាករចំនួន១២ចូលរួមប្រកួតនិងត្រូវបែងចែកជា២ពូល ។
ពូលAមានខេត្តបាត់ដំបង សៀមរាប បន្ទាយមានជ័យ កំពង់ឆ្នាំង ព្រះវិហារ និងខេត្តកំពង់ចាម ។
ពូលBមានក្រុមខេត្តស្វាយរៀង ក្រចេះ កណ្ដាល កំពង់ស្ពឺ តាកែវ និងភ្នំពេញក្រោន ។
ចំណែកការប្រកួតបាល់ទាត់យុវជនអាយុក្រោម១៤ឆ្នាំ និង១៦ឆ្នាំវិញមានកីឡាករ១៦ក្រុមដូចគ្នាចូលរួមប្រកួតនិងបែងចែកជា៤ពូលនិង២ដំណាក់កាលដូចបាល់ទាត់នារីអ៊ីចឹងដែរ។ ដំណាក់កាលទី១ប្រកួតវគ្គវិលជុំតាមពូលធ្វើឡើងរៀងរាល់ថ្ងៃចាប់ពីថ្ងៃទី២៦វិច្ឆិកាដល់ថ្ងៃទី៣១ធ្នូឆ្នាំ២០១៧រីឯដំណាក់កាលទី២ចាប់ផ្ដើមពីថ្ងៃទី៨ដល់ថ្ងៃទី១៨មិនាឆ្នាំ២០១៨ ។
ចំពោះក្រុមទាំង១៦ប្រកួតដណ្ដើមពានរង្វាន់យុវជនអាយុក្រោម១៤ឆ្នាំ និងក្រោម១៦ឆ្នាំ ពូលA មានក្រុមខេត្តស្វាយរៀង ព្រៃវែង កំពង់ចាម និងត្បូងឃ្មុំ ។ ពូលBមានក្រុមខេត្តកំពត កែប ព្រះសីហនុ និងកោះកុង ។ ពូលC មានក្រុមខេត្តកណ្ដាល កំពង់ស្ពឺ តាកែវ និងក្រុមសាលាបាល់ទាត់រាជធានីភ្នំពេញ និងពូលDមានក្រុមព្រះខ័នរាជស្វាយរៀង ក្រសួងការពារជាតិភ្នំពេញក្រោន និងក្រុមបឹងកេត ។
លោក ម៉ៃ តុលា បានឱ្យដឹងទៀតថា សម្រាប់ការប្រកួតបាល់ទាត់យុវជនទាំងអាយុក្រោម១៤ឆ្នាំ និង១៦ឆ្នាំគឺតាមបណ្ដាខេត្តនីមួយៗត្រូវទទួលធ្វើជាម្ចាស់ផ្ទះម្ដងម្នាក់ ៕
ចែករំលែកព័តមាននេះ